1 PÉTERUS 1
1
1Surat iteu' jin Péterus, Lawah Yésus Kristus surat iteu' nena' ngan kelunan éh kevéléé' Allah éh lepah piso jin tana' réh tengéé', éh purat ngan mokoo' tong tana' Pontus, Galatia, Kapadokia, Asia ngan Bitinia. 2Dalem kekat pengeloo' Allah éh Tamen uleu', ka'ah pu'un kevéléé' Néh, dokoo' keh omok kelunan éh anah Nah éh ni'ai naneu' Sahéé' Ni'ai, dokoo' ka'ah tigéh tong Yésus Kristus ngan pu'un ni'ai neu' dahaa' Néh.
Jian Allah mena' ngan keh pengejian ngan pengepawah ngan mutaa' kepéh.
Pengepelum éh reken
3Jian lu' bara' jian kenin ngan Allah, Tamen Tuhan lu' Yésus Kristus! Uban Iah pika uleu' mu'un, Iah mena' urip maréng ngan lu', neu' Néh pebetéé' Yésus Kristus jin patai Néh. Iteu' omok mena' pengepelum éh reken ngan lu'. 4Uban kenat uleu juk alaa' kekat pengejian éh pu'un petenup neu' Allah tulat irah éh anah Nah. Kekat pengejian inah pu'un nodoo' Néh tong seruga tong retek éh bé' omok tasa', borok ngan béé péh. 5Kekat pengejian inah anah ka'ah uban keh ngelan tong Allah. Uban kenat ka'ah pu'un nihau neu' penyukat Allah dokoo' ka'ah omok alaa' jalan alaa' urip éh petenup Néh ke' Néh pepoléng éh tovoo' ga' dau.
6Uban kenat jian ka'ah murung kenin, na' péh ka'ah teneng keta neu' penusah éh pinaa' arong hun iteu', kekat penusah inah pu'un éh metok awah. 7Kekat inah dokoo' pepoléng hun keh ngelan mu'un tong Tuhan hun néh bé' péh. Mas éh omok tasa' péh, penarem palaa' luten. Uban kenat pengelan keh éh pelapah jian jin Mas péh tekep penarem, dokoo' néh makin reken. Hun néh kenat, hun mah Yésus Kristus tuai kepéh, ka'ah omok alaa' kenajung, kemaren ngan penyepah jin Allah. 8Ka'ah pika Iah na' péh ka'ah bé' jak na'at Iah. Pu'un keh ngelan tong Néh na' péh hun iteu' ka'ah bé' na'at Iah. Uban kenat kemurung keh inah matek Ja'au, maren ngan bé' omok benara'. 9Éh ke' néh kenat uban Iah lepah purip sahéé' keh, inah sin pengelan keh tong Kristus.
10Jalan urip iteu' éh teneteng ngan éh kelenaa' irah nabi ngan pu'un réh bara' tong penika éh nena' Allah ngan keh. 11Sahéé' Kristus pu'un dalem irah nabi ngan sahéé' inah pu'un bara' tong pengeketa éh tekep teneng tong Kristus ngan tong Allah pu'un ngajung Iah kepéh. Irah nabi gahang kenin tatek hun néh pu'un kenat da'. 12Allah pu'un bara' ngan irah nabi tong kekat éh naneu' réh nah bé' éh tulat usah réh tengéé', bang pu'un éh tulat ka'ah. Kekat éh benara' irah nabi inah, hun iteu' lepah keh menéng éh jin irah éh bara' tong Rengah jian inah. Irah perengah éh ngan keh palaa' penyukat Sahéé' Ni'ai, éh nena' jin seruga pah avéé' irah meliket péh keloo' jam tong kekat inah.
Tekep lu' Murip ngan Barék éh Ni'ai
13Uban néh kenat jian keh ngelayau petenup, mavaa' mu'un-mu'un ngan pu'un pengepelum penoo' tong pengejian éh juk nena' ngan keh tovoo' Yésus Kristus tuai kepéh. 14Jian keh kivu sohoo' Allah, mai keh kivu kekat pengagat dalem kenin keh barei' éh neu' keh sahau hun keh bé' jak jam Allah. 15Bang barei' Allah éh tebai ka'ah pu'un ni'ai, jian ka'ah péh ni'ai dalem kekat ineu'-ineu' penganeu' keh. 16 Uban pu'un jah ha' lem surat Allah, ka' éh, Jian ka'ah ni'ai uban Akeu' éh ni'ai, ha' Tuhan.
17Pu'un keh sebayang ngan Tamen keh tong seruga, bang mai keh seruh Allah tengéé' kenin petuneng kelunan, adang Iah pekua' kenin petuneng siget-siget penganeu' réh. Hun néh kenat kelebéé' keh murip keto tong tana', jian keh seva' Iah ngan mai maneu' sa'at. 18Kejam ka'ah jalan Tuhan ngelepu ka'ah jin urip keh sahau, éh urip tepun keh. Bé' éh ngelepu keh palaa' pirek ngan mas éh omok béé. 19Ka'ah iteu' kelepu Néh neu' penyukat dahaa' Kristus. Iah mena' urip Néh barei' domba éh penatai réh éh pengena' réh ngan Tuhan éh jalan réh omok tavin Tuhan sahau, domba éh matek jian mu'un. 20Iah pu'un kevéléé' Allah hun tana' iteu' bé' jak pu'un, ngan pu'un Iah poléng kepéh sioo' tai ga' tana' dokoo' ka'ah omok alaa' urip. 21Jin Iah ka'ah ngelan tong Allah, Éh lepah pebetéé' Éh jin pematai ngan peparen Éh. Uban néh kenat hun iteu' ka'ah ngelan tong Allah ngan ngepelum tong Néh ngan kenin keh mu'un.
22Uban ka'ah kivu ha' tebaraa' éh teneng jin Allah, ka'ah pu'un ni'ai ngan ka'ah murung padéé' keh dalem Tuhan ngan semu'un kenin. Uban kenat jian keh kua' pepika ngan kekat kenin keh. 23Naneu' ha' tebaraa' Allah éh murip ngan pelinguh. Ka'ah lepah kenanak maréng, bé' éh jin kelunan bang jin tamen keh éh pelinguh. 24Barei' ha' dalem Surat Allah,
Kekat kelunan pu'un barei' ureu' awah,
ngan kekat kejian néh barei' busak awah,
barei' ureu' éh melayeu' ngan busak éh peleraa'.
25 Bang ha' tebaraa' Tuhan pu'un pelinguh.
Ngan ha' tebaraa' néh inah, inah éh Rengah Jian éh benara' réh ngan keh rai.
Currently Selected:
1 PÉTERUS 1: PNT
Highlight
Share
Copy
Want to have your highlights saved across all your devices? Sign up or sign in
Irah éh suai © 2009, Pengepemung irah éh suai Surat Tahun tong Malaysia (The Bible Society of Malaysia) Copyright © 2009 The Bible Society of Malaysia
Éh Keruwah koléé senuai © 2011 Pengepemung irah éh suai Surat Tahun tong Malaysia (The Bible Society of Malaysia) Copyright 2011 The Bible society of Malaysia