1 PÉTERUS 2
2
Tong bateu' éh murip ngan tong pohoo' kelunan éh ni'ai
1Uban kenat, Jian ka'ah bet kekat arong pengesa'at jin usah keh. Mai keh pané' kenyo la'ah, mai keh ngelayoo' maneu' jian, mai keh sakit kenin ngan kelunan ngan mai keh ngesa'at ngaran réh. 2Bang barei' anak bala mangaa' juk météé' nah, kenat péh jian ka'ah ngelayau juk mesep baa' jin Sahéé' Ni'ai, inah éh ha' tebaraa' Tuhan éh jian mu'un. Neu' ha' tebaraa' inah ka'ah omok pepit gahang ngan alaa' urip Tuhan. 3 Uban pu'un jah ha' lem surat Allah éh bara' ka', Usah ka'ah péh jam tong penika ngan pengejian Tuhan.
4Jian keh tuai tavin Tuhan, Iah bateu' éh murip, Bateu' inah nebet kelunan uban réh seruh éh bé' jian, bang Allah éh ngevéléé' Iah ngan ngajung Éh. 5La'ah ka'ah kepéh seleket bateu' éh murip, éh penakai dokoo' maneu' lamin Allah éh ni'ai. Uban néh kenat ka'ah barei imam éh kevéléé' Allah ngan éh mena' pengena' éh ni'ai éh ngepayoo' kenin Allah, neu' Yésus Kristus. 6 Barei' ha' lem Surat Allah bara', ka' éh,
Pu'un Ku' ngevéléé' jah bateu' éh pelapah jian mu'un.
Bateu' inah nepei' Ké' tong Yérusalem, ke' néh omok bateu' pengereken,
dokoo' séé' éh ngelan tong bateu' inah, bé' iah teneng menyaa'.
7 La'ah bateu' inah jian mu'un éh ngan ka'ah éh ngelan, bang tong kelunan éh bé' ngelan inah éh barei' ha' lem surat Allah bara'
Bateu' éh nebet irah tukeng lamin uban réh seruh éh bé' pu'un gunah,
Bateu' inah néh éh jian mu'un, ha' Néh.
8 La'ah pu'un jah ha' kepéh lem surat Allah
La'ah inah éh bateu' éh mihin kelunan tekaleu',
Neu' bateu' inah pinaa' réh tekaleu' avéé' réh pegup, kenat ha' Néh.
Éh ke' réh tekaleu' kenat, uban réh bé' ngelan tong ha' tebaraa' Allah, uban kenat éh pengeloo' Allah ngan réh.
9 Bang ka'ah jah pohoo' éh kevéléé' Allah, imam-imam éh mena' urip néh maneu' kereja' Allah, pohoo' éh ni'ai, kelunan éh anah Allah mu'un. Allah ngevéléé' keh dokoo' keh omok perengah penganeu' Néh éh ngebéé kenin kelunan Allah lepah tebai ka'ah musit jin merem dokoo' masek lem rema Néh éh jian mu'un. 10 Sahau bé' ka'ah kelunan éh anah Allah, bang hun iteu' ka'ah éh anah Nah. Sahau bé' ka'ah jam penika Allah, bang hun iteu' ka'ah jam tong penika Néh kepéh.
Ngerera' tong Pengeja'au
11O kekat bakéh ké', ka'ah barei' kelunan nyakai ngan kelunan tejeu' tong tana' iteu'. Uban kenat akeu' nyohoo' ka'ah dokoo' mai keh kivu kemagat éh sa'at lem kenin kelunan, éh ngelayau pekayau ngan sahéé'. 12Jian keh jian barék lem pengurip keh belah kekat kelunan éh bé' jak sakui ngelan Tuhan, kenat péh hun réh pesala' keh tong ineu'-ineu' péh, naneu' réh na'at barék keh éh jian inah, irah éh bé' ngelan Tuhan péh, omok réh seva' Allah tovoo' Dau Néh tuai kepéh petuneng kelunan.
13Dalem ngaran Tuhan jian keh ngerera' tong peritah, jian péh tong pengeja'au raja' Rum éh bau kekat réh béé. 14Kenat péh ngan gabenor éh kevéléé' pengeja'au Raja' Rum ke' néh ngukum kelunan sa'at ngan ke' néh sepah kelunan éh maneu' jian. 15Uban inah éh pengeloo' Allah hun keh maneu' kekat barék éh jian, inah jalan keh mapat kelunan éh pané éh pesala' keh awah. 16Jian keh murip barei' kelunan éh pohoo' pelepu, na' péh kenat mai keh pakai pengelepu keh inah dokoo' petavun pengesa'at, Bang jian keh murip barei' kelunan éh kivu sohoo' Allah. 17Jian keh ngerera' tong kekat kelunan béé murung tong kekat padéé' keh dalem Tuhan, Jian keh medai tong Allah ngan ngerera' tong raja'.
Kristus jah telana' dalem kekat pengeketa Néh
18Jian kekat kelunan sohoo' petem kivu sohoo' pengeja'au néh ngan ngerera' tong réh, bé' makat ngan kelunan éh jian ngan éh pika keh awah, bang ngan irah éh mahéng kenin ngan éh bé' jam pika péh. 19Adang Allah omok mena' pengejian ngan keh hun keh ngan kebit kenin ngeretep lem kekat pengeketa, éh semu'un néh bé' tekep teneng tong keh uban keh kivu pengeloo' Allah. 20Hun keh ngeretep tovoo' réh mipok keh uban keh pu'un maneu' sala', bé' iteu' omok ngegahang kenin keh ngan nolong keh. Bang hun keh ngeretep ngan kebit kenin tovoo' réh peketa keh uban keh maneu' kekat éh teneng, adang Allah omok pengejian ngan keh. 21Kenat péh Allah tebai keh, dokoo' keh omok ngeretep ngan kebit kenin lem kekat pengeketa keh, uban Kristus péh lepah keta uban Néh purip keh, ngan Iah bara' jalan ngan keh dokoo' keh omok kivu uban Néh. 22 Bé' Iah maneu' penyala' ineu'-ineu', ngan bé' pu'un séé'-séé' péh menéng ha' Néh pané kenyo. 23Hun réh menoo' Éh bé' Iah nyakat menoo' réh kepéh, hun réh peketa Éh bé' Iah nyulei' kesa'at inah kepéh ngan réh, bang Iah ngelan Allah éh petuneng ngan teneng inah. 24Kristus tengéé' tagong penyala' uleu' usah Néh tong kayeu' salib, dokoo' uleu' pelepu jin penyukat penyala', ngan murip kivu pengeloo' Allah. Kekat suhat Kristus nah éh peka'o keh. 25Sahau ka'ah barei' domba éh tawang, bang hun iteu' ka'ah lepah nihin moléé' dokoo' kivu gembala, éh mihau urip keh.
Currently Selected:
1 PÉTERUS 2: PNT
Highlight
Share
Copy
Want to have your highlights saved across all your devices? Sign up or sign in
Irah éh suai © 2009, Pengepemung irah éh suai Surat Tahun tong Malaysia (The Bible Society of Malaysia) Copyright © 2009 The Bible Society of Malaysia
Éh Keruwah koléé senuai © 2011 Pengepemung irah éh suai Surat Tahun tong Malaysia (The Bible Society of Malaysia) Copyright 2011 The Bible society of Malaysia