Salmo 95
95
Dayawen Ya Onodan Tako Din Manakabalin Ay Diyos
1Omali kayo ta mankanta ya manragsak tako,
ipigsa takon pangdayaw takon Diyos Apo.
Maiarig sisyas dakdake ay bato
ay pankamangan ta maisalakan tako.
2Emey tako sin sangoanana ay man-iyaman en sisya,
manragsak tako ay mangidayaw babaen si kankanta.
3Tan si Yahweh yan manakabalin ay Diyos
ya ari ay nangatngato mo din amin ay sinan didiyos.
4Iturayana din intiro ay daga manipod sin kaonegan ay liyang
enggana sin dontog ay kakayangan.
5Oka na abe din baybay tan pinarsua na,
siya abe din daga ay inamag na.
6Omali kayo ta mandokmog ya manyakog-ong tako
ay mandayaw en Yahweh ay namarsua en datako.
7Tan sisya din Diyos tako ya datako di ipogaw na
ay maiarig si karnero ay ay-ayowanana.
Dengngen yo koma ed wani ay agew din kalin Diyos Apo.
8Kanana, “Adi yo pakenkentegen din nemnem yo
ay kaman din inyat di aap-o yo
sin agew ay kawada dad Meriba,
sin lugar ay magay omili ed Massa.#95:8 Din istorya maipanggep sin naamag ed Meriba ya Massa et madtengan sin Exodo 17:1-7 ya Bilbilang 20:1-13.
9Isdi ay pinmadpadas din aam-a yo
olay inil-ila da din inam-amag ko.
10Opatapolo ay tawen ay sinigsigaak daida.
Isonga kanak, ‘Kankanayon ay masangsangaw das lawa.
Sigaan da ay mangonod sin bilbilin ko en daida.’
11Gapo sin bonget ko inkarik ay adik polos pasgepen daida
sin pan-illengan ay enak insagana.”
Currently Selected:
Salmo 95: KD
Highlight
Copy
Compare
Share
Want to have your highlights saved across all your devices? Sign up or sign in
© 2000, 2017 Wycliffe Bible Translators, Inc. All rights reserved.
