Salmo 94
94
Si Diyos Di Mangokom Sin Kaipoipogaw
1Yahweh, din Diyos ay man-ibaes yan sik-a,
din bonget mo ipailam koma.
2Sik-a di mangokom sin am-in ay ipogaw isnan daga,
et ipalak-am mo sin mangipapangatos awak da
din lebbeng na ay dosa da.
3Apo Diyos, kas-ano pay di kabayag na
ay it-it-ek din makedse din awak da?
4Amin din mangam-amag si lawa
yan it-it-ek dan basol da.
5Din pinilim ay ipogaw mo yan palpaligaten da,
6peslen da din nalasang, mangili ya olila.
7Ngem kanan da, “Si Yahweh ay Diyos di Israelita
yan adi na ammo ya adi na ilaen na.”
8Palalo sas kinaong-ong yo!
Pig-an pay di kanemneman yo?
9Ay adi makadnge ya makaila
yan sisyay nangamag si inga ya mata?
10Ay siya mo adi na dosaen din ipogaw na
yan sisya met di manosa sin kailiili isnan daga?
Ay magay ammo na aya
yan amin ay ipogaw et sisyay mangitdo en daida?
11Ammon Diyos di nemnem da,
ammo na ay magay silbin di plano da.
12Nagasat din bagbagaam, Apo,
din itdoam sin bilbilin mo,
13tan waday talnan di nemnem da
sin timpon di ligat da
enggana ay maisagana
din kaot para sin mangam-amag si lawa.
14Din ipogaw mo ay Diyos yan adi ka baybay-an,
15mawadan to kasin di kinalinteg sin pangokoman,
et amin ay nalinteg yan en da apolbalan.
16Ay wada aya di sinmalaknib sin mangam-amag si lawa?
17Mo adi ka binmadang ay Diyos, nateyak koma ay nasapa.
18Idi dandani ay matokangak, Apo,
inpapigsam sak-en begew sin adi manbalbaliw ay layad mo.
19Mo ad-adoy pandandanagak,
wada ka ay lomiwliwa ya omiparagsak.
20Adi ka met mabalin ay makikadwa
sin tuturay ay baken kosto di panangokom da
ay mangwani en kosto din lawa.
21Manbabadang da ay mamalpaligat sin nalinteg di ogali na,
kedngan da ay matey din magay basol na.
22Ngem sik-a, Yahweh ay Diyos ko,
di pankamangak ya salaknib ko.
23Ipalak-am mon to en daida
di sobalit din lawa ay inam-amag da,
dosaem daida begew sin basol da.
Currently Selected:
Salmo 94: KD
Highlight
Copy
Compare
Share
Want to have your highlights saved across all your devices? Sign up or sign in
© 2000, 2017 Wycliffe Bible Translators, Inc. All rights reserved.
