Salmo 108
108
Kararag Ta Abaken Diyos Din Kagobat Da
1-2Apo, napodnoak en sik-a
et mankantaak ay mangidayaw en sik-a.
Bomangonak ay masapa
ta tokarek din gitara ya arpa.
3Sin sangoanan di kaipoipogaw, man-iyamanak en sik-a,
ikantak di maipanggep en sik-a.
4Labsana ed daya din adi manbalbaliw ay layad mo,
din kinamatalek mo yan edasana din liboo.
5Apo, din kinangatom ya panakabalin mo et ipailam koma
sin am-in ay soli ed langit ya isnan daga.
6Songbatam kod din kararag ko,
isalakan mos dakami ay laylaydem ay ipogaw mo
babaen sin panakabalin mo.
7Sin Timplom yan kanam, Apo,
“Mo makdeng ay mangabakak, bingayek to
ed Sekem ya tanap ed Succot sin ipogaw ko.
8Ed Gilead ya Manasses yan okak daida,
ed Efraim yan helmet ko di kaiarigana,
sinyal aben di turay ko ed Juda.
9Ed Moab yan kaman palanggana ay pan-owasak,
ed Edom abe yan bag-en ay iturayak.
Abakek ed Filistia et manbogawak.”
10Sino pay di omiey sin siyodad ay naaladan, Apo?
Ed Edom, sino di omipango?
11Apo, ay tan enggay dinokogam tet-ewas dakami?
Ay adi ka ipango ay makigobat din sosoldado mi?
12Sin kalaban mi, bomadang ka koma,
tan din badang di ipogaw et magay silbi na.
13Mangabak kami mo wada ka ay kadwa mi,
tan sik-ay mangabak sin kalaban mi.
Currently Selected:
Salmo 108: KD
Highlight
Copy
Compare
Share
Want to have your highlights saved across all your devices? Sign up or sign in
© 2000, 2017 Wycliffe Bible Translators, Inc. All rights reserved.
