Salmo 109
109
Kararag Di Ipogaw Ta Dosaen Diyos Din Kaibaw Na
1Diyos ay daydayawek,
adi ka koman gomiginek.
2Tan din lawa di nemnem da
yan man-etek da ta omipalawlawa da.
3Lomikob da yan mankali das lawa gapo si liget da,
omibaw da olay magay gapo na.
4Say sobalit da sin layad kon daida
din omipabasbasolan da,
olay mo ikarkararagak daida.
5Lawa ya liget di sobalit da
sin kinasiged ya layad ko en daida.
6Mandotok ka si howis ay lawlawa
ay mangokom sin kaibaw ko ay sana,
pawadaem koma di mangidarum en sisya.
7Okomen da komas sisya
yan mapaneknekan ay waday basol na,
maibilang koma abe ay basol din kararag na.
8Aptik koma din biyag na
ya maiskat di odom sin saad na
9ta maolila din aan-ak na
ya malasang din asawa na.
10Lomikeliked da koma ay manpalimos din aan-ak na,
maipakaan da sin nadadael ay beey da.
11Sapay koma ta din nangiotang en sisya
yan alaena amin ay sanikwa na
ya alaen di mangili amin ay in-oblaana.
12Sapay koma ta maga polos di maseg-ang en sisya
ya sin naolila ay aan-ak na.
13Matey koma amin din anak na
ta maponas din ngadana manipod sin timpo da.
14Nemnemen koman Diyos din basbasol di ap-apo na
ya adi polos mapakawan din basol ina na.
15Polos koma ay adi linglingan Diyos din basbasol da,
ngem pap-engena pay koma
di kanemnemneman din ngadan da isnan daga.
16Maga polos di seg-ang na,
pinaligat na ya pinse na
din nabiteg, kakkaasi ya nadismaya.
17Laylaydena ay manbaos, isonga mabaosan koma,
sigaana ay mankedaw si bindisyon Diyos para sin iib-a na,
et adi koma mabindisyonan sisya.
18Kaman din kalakan di panbadoana,
nalaka abe ay manbaos sisya.
Kaman koma din danom ay inomena
ay omoneg sin awak na din baos na
yan kaman lana ay omoneg sin tong-a na.
19Kaman koman bado ya bilko ay komakaman sin awak na.
20Say iyat mo koma ay manosa, Apo,
sin mangipalawlawa en sak-en ay kalaban ko.
21Ngem sik-a, Yahweh ay Diyos ko,
bomadang ka koma ta say madaydayaw din ngadan mo,
omisalakan ka gapo sin kinasiged mo
ya adi manbalbaliw ay layad mo.
22Tan nay kakkaasiak ya palaloy sakit di nemnem ko.
23Dandani ay mamagaak ay kaman alidong sin masdem
ya kaman dodon ay itayaw di dagem.
24Nakapsot nan peweg ko gapo si dagaang ko,
enggay mabilang di tadlang ko.
25Somiyek ya manwegweg din ipogaw ay omila.
26Yahweh ay Diyos ko, bomadang ka koma,
begew sin adi manbalbaliw ay layad mo, omisalakan ka.
27Ipaammom koma sin kalaban ko
ay sik-a din omisalakan, Apo.
28Mabalin ay bomaos da,
ngem sik-a pay yan bomindisyon ka.
Sapay koma ta maabak din pomalpaligat,
ngem sak-en pay ay mansilsilbin sik-a yan manragsakak.
29Kaman da koman malned si bain da din kalaban ko,
din bain da yan kaman dan inbabado.
30Apo, ipidwapidwak ay man-iyaman en sik-a,
sin sangoanan di gimong, idaydayaw kos sik-a.
31Tan din kakkaasi yan ikalintegam,
isalakan mo sin mangikeddeng si ena kateyan.
Currently Selected:
Salmo 109: KD
Highlight
Copy
Compare
Share
Want to have your highlights saved across all your devices? Sign up or sign in
© 2000, 2017 Wycliffe Bible Translators, Inc. All rights reserved.
