Salmo 107
107
Iyaman Sin Kinasiged En Diyos
1Man-iyaman tako en Diyos tan siged sisya,
ya magay pap-eng din adi manbalbaliw ay layad na.
2Dakayo ay insalakan Diyos, ibagbaga yo koma
din peteg ay layad yo ay man-iyaman en sisya.
Insalakanas dakayo sin kalaban yo
3et manipod sin amin ay solin di lobong, sininop nas dakayo.
4Din odom et linmikeliked da sin lugar ay magay omili,
ngem magay maanapan da si pantean da ay ili.
5Enggay nakaan din namnama da
gapo sin dagaang ya bigaw da.
6Ngem idi maligligatan da,
nankedaw da si badang Diyos ed daya,
et insalakanas daida sin doy ay ligat da.
7Inturong nas daida sin kosto ay pandanan da
enggana ay dinmateng da sin ili ay pantean da.
8Man-iyaman da koma en Diyos sin adi manbalbaliw ay layad na
ya din nakaskasdaaw ay inam-amag na para en daida.
9Tan olay sino ay manbigaw yan pan-inomena,
ya olay sino ay mandagaang yan pakanena.
10Enggay mabolinget di kad-an di odom en daida,
nabalod da et nakadinaan da,
11gapo ta kinontra da ya en da sinigaan
din bilbilin Diyos ay Kangatoan.
12Inpababa na di nemnem da sin naligat ay obla da.
Idi naisokba da, magay bomadang en daida.
13Ngem nankedaw da si badang Diyos sin ligat da ay sana
et insalakanas daida.
14Winayawayaanas daida sin mabolinget ay kad-an da,
ya sinokpot na din kadina ay namabalod en daida.
15Man-iyaman da koma en Diyos sin adi manbalbaliw ay layad na,
ya din nakaskasdaaw ay inam-amag na para en daida.
16Tan din bronsi ay eneb yan dinadael na
ya din nanbabag ay landok et ginotlo na.
17Waday odom ay naong-ong et nadosa da
begew sin basbasol da.
18Isonga amin ay makan yan sigsigaan da
et dandani di kateyan da.
19Ngem nankedaw da si badang Diyos sin sana ay ligat da
et insalakanas daida.
20Inbilina et naagasan da,
isonga naisalakan da sin kateyan da koma.
21Man-iyaman da koma en Diyos sin adi manbalbaliw ay layad na,
ya din nakaskasdaaw ay inam-amag na para en daida.
22Masapol abe ay man-idaton da en Diyos si pan-iyamanan da
ya manragsak da ay mangikankanta sin inam-amag na.
23Din odom yan wada da sin bapor sin baybay ay makilaglagbo,
24et inila da din nakaskasdaaw ay inamag Diyos Apo.
25Tan inbilina ay mandagem si napigsa,
et dadakke ay dalloyon di nawada.
26Dinalapos da din bapor et komayang ya bomaba,
et enggay nakaan din namnama da.
27Mandapidapig da ay kaman ad-adoy ininom da,
et magay silbin din laing da.
28Ngem nankedaw da si badang Diyos sin ligat da
et insalakanas daida,
29tan inpaginek na din pewek ya dalloyon ay sana.
30Peteg di layad da tan din baybay yan tinmalna,
yan inturong Diyos daida sin kosto ay pansangladan da.
31Lebbeng na koma ay man-iyaman da
gapo sin adi manbalbaliw ay layad na,
ya din nakaskasdaaw ay inam-amag na para en daida.
32Idaydayaw da koma din kinangato na
mo matopog din kaipoipogaw ya din papangolo da.
33Mabalin ay mamgaan din ginawang mo laydena,
ya din obbog yan mabalin ay pasaldengena.
34Kabaelana ay panbalinen din siged ay lota si magay silsilbi na
gapo sin basol di man-ili sin isdi ay daga.
35Ngem kabaelana abe ay pawadaen di posong sin kadardaratan
ya obbog sin lugar ay nanamgaan.
36Ipalobos na ay isdi di pantean
din ipogaw ay madagdagaangan,
et isaad da di siyodad ay en da panbeeyan.
37Molaan da din papayew ya kaobasan da,
et ad-ado di apiten da.
38Bindisyonana din ipogaw na et omad-ado din an-ak da.
Ayowanana abe din baka da
ta magay makolkolangan en daida.
39Mo maabak din ipogaw Diyos ya maibabain da
gapo sin palalo ay pamalpaligatan di kalaban da,
40ipailan Diyos din liget na sin mamalpaligat en daida
et dosaenas daida ta say lomikeliked da
sin kadardaratan ay magay kosto ay pandanan da.
41Ngem din maligligatan et isalakana,
et paad-adoena din anak da.
42Malaylaydan da din nalinteg ay makaawat isna,
ngem din managbasol et maga di maibaga da.
43Din nalaing ay ipogaw yan nemnemen da koma dana,
ta say kosto ay maawatan da
din adi manbalbaliw ay layad Diyos ay magay pap-eng na.
Currently Selected:
Salmo 107: KD
Highlight
Copy
Compare
Share
Want to have your highlights saved across all your devices? Sign up or sign in
© 2000, 2017 Wycliffe Bible Translators, Inc. All rights reserved.
