Aro 5

Mtendele na cimwemwe

1Tetyo, pakuti pocetekela tafwaniwa kuti nise wolungama pa menso pa Mulungu, niye kuti tili pa mtendele na Mulungu kupitila mwa Asikulu ŵasu Yesu Kristu. 2Kupitila mwa yeve etivulila njila kuti pocetekela tipokele cisomo ici mwawanzi, watankhazikikamo lomba. Nipo tusangalala mu cilolelo ca ulemelelo wa Mulungu. 3Ni apolini peka, sewo tusangalala soti mu kutamana kwasu, cikomo cakuti tuziŵa kuti kutamana kuleta kupilila, 4nipo kupilila kuleta unkhalo wozomelezyewa na Mulungu na kuti unkhalo uyu uleta cilolelo. 5Nipo cilolelo cukumbulwishalini cikomo cakuti cinthemwa ca Mulungu catiliwa mu mitima yasu kupitila mu Mzimu Mtuŵa wecitipa.

6Pa nsita yecisalula Mulungu, sewo petenze wolefuka, Kristu efwila ŵala asasamala va Mulungu. 7Ni ca patali munthu aliyense kufwila munthu muyake, koma keno ni muweme mtima ngako, niye kuti keno angapangwe kumufwila. 8Koma Mulungu owonesha cinthemwa cake kwa sewo pa ici: petenzetikali wocimwa, Kristu etifwila.

9Pakuti tafwaniwa kuti nise wolungama cikomo ca mlopa wa Kristu, ngako–ngako kuti akatipulumushe ku ukali wa Mulungu kupitila mwa yeve. 10Keno petenze alwani ŵa Mulungu, etiyanjanisha na yeve kupitila mu imfwa ya Mwana wake, ngako–ngako lomba, petiyanjana, tikapulumushiwe na moyo wake. 11Ni apolini peka yayi, koma tusangalala soti mwa Mulungu kupitila mwa Asikulu ŵasu Yesu Kristu, mu wala wetipokelelamo mu kuyanjana lomba.

Imfwa mwa Adamu, moyo mwa Kristu

12Ucimo weloŵa mu calo kupitila mwa munthu yumo, na imfwa kupitila mu ucimo, tetyo imfwa iwela ku ŵanthu wonse, pakuti wonse ecimwa. 13Ucimo wenzepo pa calo Matetulo akaliyopewa. Koma paliye Matetulo, macimo ŵa munthu angaŵelengewelini. 14Koma kutatika nsita ya Adamu kufwikila nsita ya Mose, imfwa yenze na ulamulilo pa ŵanthu wonse. Yenze na ulamulilo cukanga pa ŵala ŵamene kucimwa kwawo kwenzolinganalini na kucimwa kwa Adamu, efwaya Matetulo ŵa Mulungu.

Adamu olingana na wala wecilaŵila Mulungu kuti akawele soti. 15Koma viŵili ivi vulinganalini, cikomo cakuti cawanzi ca Mulungu cililini ngani kucimwa kwa Adamu. Ni cendi kuti ŵanthu anyinji ecifwa cikomo ca kucimwa kwa munthu yumo. Koma cisomo ca Mulungu, niye soti mwacilili cawanzi cake ku ŵanthu anyinji kupitila mu cisomo ca munthu yumo, Yesu Kristu. 16Pali soti kusiyana pa cawanzi ca Mulungu na cimo ca munthu yumo. Pakuti yeve pecicimwa kamo, Mulungu epingula kuti alangiwe. Koma cawanzi na cisomo ca Mulungu ni cakuti ŵanthu onkhala wolungama cukanga vocimwa vawo venze vinyinji. 17Ni vyendi kuti kupitila mu kucimwa kwa munthu yumo, imfwa yetatika kupingula cikomo ca munthu wamene uyo. Koma ni cikulu tyani cefumamo mu vecicita munthu yumo, Yesu Kristu! Wonse epokela cisomo ca Mulungu na kuti efwaniwa kuti ni wolungama mwawanzi pa menso pake, akatatike kupingula mu moyo kupitila mwa Kristu.

18Tetyo, ngani cimo imo ileta cilango pa ŵanthu wonse, soti nchito imo yolungama yuleta cilungamo kwa ŵanthu wonse noŵapa moyo. 19Ngani ŵanthu anyinji eyaluka wocimwa, cikomo ca kusamvwa kwa munthu yumo mwamene umo soti ŵanthu ofwaniwa kuti ni wolungama, cikomo comvwila kwa munthu muyakine yumo.

20Matetulo ŵa Mose eyikiliwapo kuti ucimo ungapake. Koma kwakuyikililako ucimo, cisomo cuyikiliwapo ngako, 21Tetyo, ngani cimo yenzolamulila poleta imfwa, naco cisomo ca Mulungu cupingula poleta cilungamo, notitangulila ku moyo wosasila kupitila mwa Yesu Kristu Asikulu ŵasu.

Currently Selected:

Aro 5: GMN

Highlight

Copy

Compare