Aro 14

Osapingula ayanu

1Mupokeleni luweme munthu wamene cicetekelo cake ni cosatangʼa, koma musasushane naye pa malingililo ŵake. 2Munthu yumo wocetekela kuti angalye ciliconse, koma muyakine wamene cicetekelo cake ni cosatangʼa, akulyalini nyama. 3Wala akulya ciliconse, asatafulile muyake asalya nyama, na wala asalya nyama asapingule wala akulya ciliconse, pakuti Mulungu wamupokela. 4Kansi wewo niwe ŵani, kuti upingule nyanchito wa mwine kuti wayifya? Ni pa menso pa asikulu wake pakumuwona kuti wawamya keno aliye. Nipo awamye, pakuti Asikulu otwesha kumupanga kuti awamye.

5Munthu yumo olingilila nsiku imo kuŵa yopula masiku ayakine, koma muyakine olingilila masiku wonse kuŵa wolingana. Aliyense awocita mwakusimikizyila mu malingililo ŵake. 6Wala olingilila nsiku imo kuŵa yopula masiku ayakine, ocita tetyo kuti acinzike Asikulu. Wala akulya ciliconse ocita tetyo kuti acinzike Asikulu, pakuti otembezya Mulungu cikomo ca cakulya. Wala asalya nyama ocita tetyo kuti acinzike Asikulu, nipo otembezya Mulungu pocita tetyo.

7Pakuti paliye yumo wa sewo cukanga moyo cikomo ca yeve yeka, keno kufwa cikomo ca yeve yeka. 8Keno tikuŵa na moyo ni cikomo ca Asikulu, nipo keno tikufwa ni cikomo ca Asikulu. Tetyo, cukanga tiŵe na moyo keno tifwe, nise ŵawo ŵa Asikulu. 9Pakuti Kristu emwalila nakuŵa soti na moyo, kuti aŵe Asikulu ŵa akufwa na ŵa moyo.

10Nga wewo, upingulila vinji mkwanu? Keno wewo nawe utafulila vinji mkwanu? Tonse tikapaname pafupi na mpando wa cifumu wa Mulungu kuti akatipingule. 11 Pala Malembo olaŵila kuti,

“Leza olaŵila kuti,

‘Panili na moyo, nkhokola zonse zizezifukame

nipo lilimi iliyonse izeizomelezye kuti nine Mulungu.’”

12Tetyo, aliyense mwa sewo akazikonkhololele yeka kwa Mulungu vecicita.

Osakumbulwisha Akristu ayanu

13Tiyeni tileke kupingulana lomba. Ngako–ngako musimikizye kuti mucitalini kanthu kokumbulwisha ayanu, keno kuŵacimwisha. 14Nuziŵa nipo nusimikizya na ulamulilo wa Asikulu Yesu kuti paliye cakulya cosazomelezyeka kulya pa cove ceka. Koma keno munthu wocetekela kuti ni cosazomelezyeka, niye kuti kwa munthu uyo ni cosazomelezyeka. 15Pakuti keno mkwanu ocimwishiwa naco caukulya, ucitalini mu cinthemwa. Osaceneka mkwanu wecifwila Kristu na cakulya. 16Lomba osazomelezya kuti ŵanthu ayakine aviwone kuyipa vinthu vamuwona mwewo kuti ni viweme. 17Pakuti mu Ufumu wa Mulungu, cikulu ni cakulyalini na cakumwa, koma cikulu ni cilungamo, mtendele na cimwemwe, vakutwala Mzimu Mtuŵa. 18Aliyense otumikila Kristu moteti, otemwesha Mulungu, nipo ozomelezyewa ku ŵanthu.

19Niye cikomo cake, tiyeni tisakile vingatitangulile ku mtendele na kukoseshana pakati pasu. 20Osaceneka nchito ya Mulungu cikomo copangwa kulya ciliconse. Vakulya vonse ni vozomelezyewa kuvilya, koma ni ciwemelini kulya cakulya cingakumbulwishe ayanu. 21Ni ciwemelini kulya nyama na kumwa vinyu, nocita soti ciliconse cingacimwishe ayanu. 22Vaucetekela pali ivi viŵe pakati pa wewo na Mulungu. Ni woshukishiwa wala asalisusha pa vakuzomekezya. 23Koma munthu olisusha, opinguliwa akalya, cikomo cakuti kulya kwake kulilini mu cicetekelo. Pakuti ciliconse cisafuma mu cicetekelo ni cimo.

Currently Selected:

Aro 14: GMN

Highlight

Copy

Compare