Aro 15

Tiwotemwesha ayasu osati sewo seka

1Sewo, tili na cicetekelo cotangʼa, tukokuŵa na mtima wolezya pa ŵanthu olefuka, osati tikoyingolitemwesha sewo seka. 2Aliyense awotemwesha muyake, nomcitila viweme, kuti amutangʼishe mu cicetekelo cake. 3 Pakuti cukanga Kristu enzolitemweshalini, koma ngani Malembo olaŵililatu kuti, “Matusi aŵala okutukanani awela pali newo.” 4Pakuti ciliconse cilembewa kale, cilembewela kuti citisambizye, kuti kupitila mukupilila na kukosesha kwa Malembo tingankhale na cilolelo. 5Mulungu akupa ŵanthu mphamvu kuti atweshe kupilila noŵakosesha mtima, akupeni umvwano uweme, mokonkha venzocita Kristu Yesu, 6nipo akuyavyeni kuti na mtima umo na pa kamwa mungacinzike Mulungu na Awisi ŵa Asikulu ŵasu Yesu Kristu.

Malizu Aweme ni ŵa ŵanthu soti asali Ayuda

7Mukopokelana, ngani mwecikupokelelani Kristu, mu ulemelelo wa Mulungu. 8Pakuti nukuwuzyani kuti Kristu waŵa mtumiki wa Ayuda kuti awoneshe cicetekelo ca Mulungu, kutwesha layizyo yecipa makolo ŵawo, 9 nipo soti kwa asali Ayuda kuti acinzike Mulungu cikomo ca lusungu yake, ngani Malembo olaŵila kuti,

“Niye cikomo cake nikakutembezyeni pakati pa ŵanthu ŵa mitundu iyakine;

nikayimbe nzimbo zokweza zina yanu.”

10 Olaŵila soti,

“Sangalalani, mwewo musali Ayuda,

temwani pamo na ŵanthu ŵake ŵa Mulungu.”

11 Olaŵila soti,

“Lumbani Asikulu, mwewo musali Ayuda,

imbani nzimbo zomukweza, mwewo mwe ŵanthu monse.”

12 Yesaya naye elaŵila kuti,

“Yumo mwa mazikulu ŵa Yese akawele.”

“Yeve akapaname kuti akalamulile pa mitundu ya ŵala asali Ayuda,

nipo wonse akaŵe na cilolelo mwa yeve.”

13Mulungu otipa cilolelo, azuzye mitima yanu na cimwemwe na mtendele pamucetekela mwa yeve, kuti cilolelo cikokula na mphamvu za Mzimu Mtuŵa.

Paulo oŵalembela cikomo cecilembela mosacita wowa

14Mwenekwasu, newo nuziŵa kuti nimwe ŵanthu opangwa viweme, na kuti nimwe ŵanthu woziŵa vinthu, nipo mutwesha kulangizana. 15Nakulembelani mosacita wowa, kuti nikukumbusheni soti, cikomo ca cawanzi cecinipa Mulungu 16kuti niŵe mtumiki wa Kristu Yesu kwa ŵanthu asali Ayuda. Nutumikila ngani wansembe na Malizu Aweme ŵa Mulungu, kuti asali Ayuda aŵe ngani nsembe yowamila yeve notwaliwa mwa Mzimu Mtuŵa. 17Tetyo, pakuti nine wake wa Kristu Yesu, numekela nchito yanucitila Mulungu. 18Nikakose mtima nolaŵila tyala vawacita Kristu kupitila mwa newo, kuti niyavye asali Ayuda kumvwila Mulungu. Necita ivi na malizu ŵangu na nchito zangu, 19na viziŵikilo na vokanganisha, kupitila mu mphamvu ya Mzimu Mtuŵa. Tetyo, Malizu Aweme neŵawululilatu ku Yelusalemu na ku calo cozunguluka mpaka ku Ililiko. 20Nsiku zonse nenzoyezya kuŵilizya Malizu Aweme ku malo kwala kweka kwenze kukaliyomvwika zina ya Kristu. Nenzopangwalini kumanga pa maziko ŵeciyika munthu muyakine. 21 Pala Malembo olaŵila kuti,

“Ŵala aliyowuzyiwe va yeve akawone,

na ŵala akaliyokumvwa akazindikile.”

22Ici niye cikomo cunikangisha kuwela kwanu.

Paulo olingilila va kuya ku Roma

23Koma lomba, pakuti nchito yasila ku malo ŵano, na kuti naŵa nupangwa kwa vyaka vinyinji kuwela kwanu. 24Nili na cilolelo cokuwonani panukuya ku Sipeni. Nikatemwe kukutandalilani masiku atontho, nipo pa vuli pake nupangwa kuti mukaniyavye kupitilizya ulwendo wangu. 25Koma lomba, nikuya ku Yelusalemu kuyotwala mayavyo kwa atuŵa mtima. 26Pakuti mipingo ya ku Masedoniya, na ya ku Akayiya yetemwa kutwala mayavyo ku wozingwa pakati pa atuŵa mtima ŵa ku Yelusalemu. 27Enze otemwa kucita tetyo, na kuti yenze nchito yawo kuyavya ŵala wozingwa. Pakuti asali Ayuda eyaŵana mashukisho ŵawo ŵa uzimu na Ayuda, tetyo owamila kuyavyiwa pa vosoŵa vawo va muŵili. 28Nikayosilizya nchito iyi noziŵa kuti apokela vanaŵatakulila, nikalute ku Sipeni nokutandalilani pakuya. 29Nuziŵa kuti nikayowela kwanu, nikawele kuzoyaŵana namwe mashukisho anyinji Akristu.

30Nukukoseshani mwenekwasu, kupitila mwa Asikulu ŵasu Yesu Kristu na cinthemwa ca Mzimu, kuti tikatizyane mu malombelo ŵanu na ponilombela nane kwa Mulungu, 31kuti ningapulumushiwe ku ŵanthu ŵa kunja ŵa ku Yudeya, na kuti nchito yangu ku Yelusalemu ikapokelewe na atuŵa mtima, 32kuti mu kupangwa kwa Mulungu ningawele kwa mwewo na cimwemwe na kuti pamo na mwewo nikasangalale. 33Mulungu wa mtendele aŵe na mwewo monse. Amen.

Currently Selected:

Aro 15: GMN

Highlight

Copy

Compare