Aro 12
12
Mwatingaŵele kuti titumikile Kristu
1Lomba nukusengani mwenekwasu, mwa lusungu ya Mulungu, kuti mutwale miŵili yanu ngani nsembe ya moyo yopatuliwa, ituŵa yopokelewa kwa Mulungu, cili cilambilo canu ca uzimu. 2Osakonkhelela unkhalo wa ŵanthu omekela va pano pansi, koma Mulungu ayaluzye moyo wanu wonse pokupani mtima wa lomba. Pamene apo mukaziŵe vakupangwa Mulungu, vamene vili viweme, vangwilyo na vomtemwesha.
3Pakuti mwa cawanzi copewa kwa newo nuwuzya aliyense pakati pa mwewo kuti asalingilile pa yeve yeka kuŵa wa nzelu kupula mwangalingililile, koma akolingilila molicefya, molingana na mpimo wa cicetekelo cakumupa Mulungu. 4Ngani tonse tili na muŵili umo wamene uli na vizo vinyinji, nipo vizo ivi vonse vililini na nchito yolingana. 5Tetyo, mwa Kristu sewo tili anyinji tupanga muŵili umo, na kuti aliyense ni wolumikizyiwa na ayake. 6Tili na vawanzi vosiyana–siyana, kulingana na cisomo cawatipa Mulungu. Keno cawanzi ca munthu ni kunenela, aciseŵenzeshe kulingana na cicetekelo. 7Keno ni kutumikila, atumikile, keno ni kusambizya, asambizye. 8Keno nikutangʼisha, atangʼishe, keno ni kusonkha, ape motambulula kwanja, keno ni ucitangulila, atangulile mwa kapamphu, keno ni kuwonesha lusungu, awocita tetyo mu cinthemwa.
Vopangwika mu umoyo wa Cikristu
9Cinthemwa cukokuŵa ca cendi. Muwotinkha ciyipa, kangamilani ku ciweme. 10Muwotemwana ngako ponekwanu, nipo mocitilana mcinzi kupula mwaupangwila wemwine. 11Potumikila Asikulu osacita ulesi, nipo muzikhutule mwa uzimu notumikila Asikulu na mtima wanu wonse. 12Mukokuŵa wosangalala cikomo ca cilolelo. Muwopilila pakati pa matamano, nipo mukolomba nsita zonse. 13Mukoyavya pa vopangwa va atuŵa mtima. Muwopokela alwendo motemwa.
14Sengani Mulungu kuti ashukishe ŵala okutamanishani. Musengeni kuti aŵashukisha osaŵashamika. 15Sangalalani nawo ŵala osangalala, lilani nawo ŵala olila. 16Muwokuŵa luweme na ayanu. Osalimvwa, koma mukokuŵa wopangwa kuyanjana na ŵanthu wamba. Osaliyezya ŵa nzelu. 17Osawezyela ciyipa na ciyipa. Yezyani kuti muwocita vinthu ŵanthu wonse vakuwona kuti ni viweme. 18Keno nikotwesheka, nkhalani na mtendele na ŵanthu wonse mwamungatweshele. 19 Osawezyela kucita ciyipa mwayangu, koma siyilani mpata ukali wa Mulungu, pala Malembo olaŵila kuti,
“Leza olaŵila kuti, ‘Kuwezyela ni kwangu, nikaŵalange.’”
20 Mosiyanisha, Malembo olaŵila kuti,
“Keno mulwani wako wamvwa njala,
mupe vakulya alye.
Keno ali na njota
mupe manzi amwe.
Mukucita tetyo,
umuyikila malasha ŵa mulilo pa mutu pake.”
21Osacimfyiwa ku viyipa, koma cimfyani viyipa pocita viweme.
Currently Selected:
Aro 12: GMN
Highlight
Copy
Compare
Share
Want to have your highlights saved across all your devices? Sign up or sign in
Nsenga New Testament © The Bible Society of Zambia, 2015.
