Aro 11
11
Mulungu wawonesha cisomo pa Aisilayeli
1Nukonsha lomba kuti, kansi Mulungu etaya ŵanthu ŵake? Na patontho kumo! Newo nane nine soti wa ku Isilayeli, yumo mwa azukulu ŵa Abulahamu, nipo wa mkoka wa Benjameni. 2Mulungu aliyotaye ŵanthu ŵake ŵecisalulilatu. Muziŵalini Malembo cakulaŵila va Eliya, mwecidandaulila kwa Mulungu kuti alange Aisilayeli? Pala elaŵila kuti, 3 “Asikulu, ŵanthu aŵa epaya aneneli ŵanu, efwaya maguwa ŵanu, na kuti newo nasala neka, na kuti opangwa kuti anipaye nane.”
4 Koma Mulungu emuyasukanji? Elaŵila kuti, “Nayisungila ŵanthu myanda isanu na iŵili (7,000) akaliyolambilapo Bala, mulungu wa wenye.” 5Lomba ni mwamene soti. Pasala Aisilayeli oŵelengeka ŵecisalula Mulungu mwa cisomo cake. 6Koma keno eŵasalula cikomo ca cisomo cake, niye kuti ni cikomolini ca vecicita ŵeve. Kuti venze tetyo, cisomo niye kuti cenzelini soti cisomo.
7Tyani lomba? Aisilayeli ekangiwa kufwana cenzosakila. Wecisalula niye ecifwana, koma wonse wosala eyuma, 8 ngani Malembo olaŵila kuti,
“Mulungu eŵapa mtima osamvwisha,
nipo mpaka lelo yamene waŵavala menso kuti asalolesha
noŵavala matu kuti asamvwe.”
9 Nipo Davide olaŵila kuti,
“Visangalalo vawo viyaluke liŵa
yoŵaponesha kuti alangiwe.
10Menso ŵawo avaliwe
kuti asaloleshe,
nipo misana yawo iŵe yovupa nsita zonse.”
Mulungu epulumusha ŵanthu asali Ayuda
11Lomba nukonsha kuti, “Kansi Ayuda ekumbulwa kuti aponeletu osauka soti?” Yayi, na patontho kumo. Koma cikomo ca kucimwa kwawo, cipulumusho ceŵafwikila soti ŵanthu ŵa mitundu iyakine, kuti Ayuda aŵacitile luyipilwa. 12Keno kucimwa kwa Ayuda kwephindulisha ŵanthu ŵa pa calo conse ca pansi, nipo keno kukangiwa kwawo kwephindulisha ngako ŵanthu ŵa mitundu iyakine, ngako–ngako lomba wonse akazomvwila Mulungu, niye kuti mashukisho akakule cendi.
13Nulaŵila na mwewo musali Ayuda. Pakuti keno nine nthumi ku ŵanthu asali Ayuda, numekela ngako utumiki wamene uyu 14mu cilolelo kuti nicitishe ukwa ŵanthu ŵa mtundu wangu, nopulumusha ayakine mwa ŵeve. 15Keno ŵanthu ŵa calo conse ca pansi ekatizyana na Mulungu cikomo yeve eŵayika pa citwa Ayuda, nga kukaŵe tyani yeve akazoŵapokela soti? Kukaŵe ngani ŵanthu akufwa owuka.
16Keno citwa cotatika ca mkate wotwaliwa ni cituŵa, niye kuti mkate wonse ni utuŵa, na kuti keno mizyu ni ituŵa niye kuti na misambo kumo ni ituŵa. 17Misambo iyakine ya cimuti cokomola yakhozolewa, na misambo ya cimuti ca ku sanga yalumikizyiwapo. Mwewo musali Ayuda muli ngani misambo ya cimuti ca ku sanga, nipo lomba muyaŵana cicetekelo ca uzimu na Ayuda. 18Tetyo, muwamilalini kutafulila ŵala ekhozolewa ngani misambo. Mungaŵe tyani olimvwa? Nimwe misambo tyala, muyavyalini mizyu, mizyu niye yuyavya mwewo.
19Lomba mukalaŵila kuti, “Misambo yekhozoka kuti anilumikizye pakati.” 20Ni cendi. Koma yakhozoka cikomo cosacetekela koma mwewo mwepanama cikomo ca cicetekelo. Tetyo, osalitama, nipo mukocita wowa. 21Pakuti Mulungu aliyolekelele misambo yene–yene ya cimuti, akakulekelelenilini namwe.
22Ziŵani kuti Mulungu ni wa lusungu ngako, koma soti ni wa ukali. Kwa ŵanthu ecimwa ni wokalipa, koma kwa mwewo ni wa lusungu malinga keno musamala lusungu yake. Keno mucitalini ivi akakukhozoleni namwe. 23Nipo keno Ayuda ayakine aleka kusacetekela vicetekelo vawo akaŵalumikizye soti ku cimuti. Pakuti Mulungu ni wa mphamvu, otwesha kuŵalumikizya soti. 24Mwewo musali Ayuda muli ngani misambo ya cimuti ca olivi ca ku sanga: Mulungu ekukhozolani ku cimuti ca ku sanga nokulumikizyani ku cimuti ca olivi cokomola. Tetyo, tuwona kuti Mulungu angatweshe kulumikizya soti yala misambo iyakine – Ayuda – ku cimuti cake cokomola cukanga kuti enze ekhozolewa kale.
Mulungu owonesha lusungu yake pa ŵanthu wonse
25Nupangwa kuti muziŵe va cokanganisha ici mwenekwasu, kuti musaŵe wolimvwa: kusamvwa kwa ŵanthu ŵa ku Isilayeli ni kwa nsita zosasilalini, koma kukasile pati ciŵelengelo cokwanila ca asali Ayuda osaluliwa akayalukile kwa Mulungu. 26Nipo umu niye mwatiakapulumukile Aisilayeli wonse, ngani mwakulaŵilila Malembo kuti,
“Wopulumusha akafumile ku Ziyoni.
Akafumye kuyipa konse kwa azukulu ŵa Yakobo.
27 Nikamvwane nawo cimvwano ici
nikayowafumyila macimo ŵawo.”
28Cikomo cokana Malizu Aweme, Ayuda ayaluka alwani ŵa Mulungu, kuti mwewo musali Ayuda muphindulepo. Koma keno Mulungu eŵasalula, ŵeve ni ayake cikomo ca makolo ŵawo ŵa macezo. 29Pakuti cawanzi ca Mulungu na kuyita kwake ni kosayaluka. 30Kale mwewo musali Ayuda mwenzomvwilalini Mulungu, koma lomba Mulungu okucitilani lusungu cikomo ca kusamvwa kwa Ayuda. 31Nawo Ayuda omvwilalini soti Mulungu, koma colinga cake ni cakuti pa nsita iyake nawo azepokele lusungu ngani yamwapokela mwewo. 32Mulungu eyalusha ŵanthu wonse akayidi pa kusamvwila kwawo, kuti aŵacitile lusungu wonse.
Mulungu ni wocinzikiwa
33Cuma ca Mulungu ni cinyinji ngako. Nzelu zake noziŵa kwake ni zotwalilila ngako. Ni ŵani angamvwishe mapinguliwe ŵake, soti njila zake ni ŵani angazifwane. 34 Ngani Malizu ŵa Mulungu olaŵililatu kuti,
“Ni ŵani woziŵa malingililo ŵa Mulungu?
Ni ŵani angamupe malangizyo Asikulu?”
35 “Ni ŵani etwalapo kanthu kwa Mulungu,
kuti Mulungu amuwezyele kanthu?”
36Pala vinthu vonse vofumila kwa yeve, ni volengewa na yeve nipo ni vake. Ulemelelo uŵe wake mpaka nsita zosasila. Amen.
Currently Selected:
Aro 11: GMN
Highlight
Copy
Compare
Share
Want to have your highlights saved across all your devices? Sign up or sign in
Nsenga New Testament © The Bible Society of Zambia, 2015.
