Aro 10
10
1Mwenekwasu, caupangwa mtima wangu na lombelo yangu kwa Mulungu pa Aisilayeli ni cakuti akapulumuke. 2Nuŵacitila umboni kuti ni ŵa kapamphu pa Mulungu, koma kapamphu kake aliyokamvwe luweme mwakowamila kunkhalila. 3Oziŵalini cilungamo cofumila kwa Mulungu, koma eyezya kufwaniwa kuŵa wolungama pa menso pake mwa njila yawo–yawo, osayika nzelu pa cilungamo ca Mulungu. 4Pakuti Kristu wasilizya Matetulo, kuti aliyense wocetekela afwaniwe kuti ni wolungama pa menso pa Mulungu.
Malizu ŵa cipulumusho kwa wonse
5 Pakuti Mose elemba va cilungamo cofwaniwa pa Matetulo, kuti, “Munthu ocita vakulaŵila Matetulo, akaŵe na moyo.” 6 Koma cilungamo cufwaniwa pa cicetekelo culaŵila kuti, “Mu mtima mwako usakonshe kuti, ‘Ni ŵani ŵatiakakwele Kululu?’” (Niye kuti kuyomuwuzya Kristu kuti ŵatiselukile sewo.) 7 “Usakonshe soti kuti, ‘Ni ŵani ŵatiakalute ku calo ca ŵanthu akufwa?’” (Niye kuti kuyomuwusha Kristu kwa akufwa.) 8 Koma olaŵila kuti tyani? Olaŵila kuti,
“Malizu ali pafupi nawe
ali pa kamwa pako nipo ali soti mu mtima mwako.”
(Aŵa niye malizu ŵa cicetekelo ŵatuŵilizya). 9Pakuti keno uzomelezya na pa kamwa pako kuti Yesu ni Asikulu, nipo ucetekela mu mtima mwako kuti Mulungu emuwusha kwa akufwa, ukapulumuke. 10Pakuti na mtima umo sewo tikacetekela tufwaniwa kuŵa wolungama pa menso pa Mulungu, na kuti na pa kamwa pasu tikazomelezya tupulumuka. 11 Pala Malembo olaŵila kuti, “Aliyense wocetekela mwa yeve akacitelini nsoni.” 12Pakuti paliye kusiyana pakati pa Ayuda na asali Ayuda, pakuti Mulungu niye Asikulu ŵa wonse, nipo oshukisha motambulula manja wonse oyita pa zina yake. 13 Pala Malembo olaŵila kuti, “Aliyense oyita pa zina ya Asikulu akapulumuke.”
14Nga lomba, angaite tyani pa wala waliyocetekele? Na kuti angacetekele tyani mwa wala waliyoumvwe? Na kuti angamvwe tyani kuliye woŵilizya kwa ŵeve? 15 Na kuti angaŵilizye tyani keno aliyotumiwe? Pala Malembo olaŵila kuti, “Kuwama mendo ŵa oŵilizya Malizu Aweme.”
16 Koma ni wonselini epokela Malizu Aweme aŵa. Ngani Mneneli Yesaya olaŵillilatu kuti, “Asikulu, ni ŵani wacetekela vatuŵilizya?” 17Tetyo, cicetekelo cuwela kufuma mukumvwa malizu, na kuti malizu owela kupitila mu kuŵilizya Kristu.
18 Koma nukonsha kuti, “Kansi Aisilayeli aliyoumvwe?” Yayi, kumvwa ecimvwa cendi. Ngani Malizu ŵa Mulungu olaŵila kuti,
“Lizu yawo yemvwika pa calo conse ca pansi
na kuti malizu ŵawo efwika mpaka ku nsilililo kwa calo.”
19 Koma nukonsha soti kuti, “Kansi Aisilayeli aliyomvwishe?” Potatika Mose olaŵila kuti, “Mulungu olaŵila kuti,
‘Nikakucitisheni luyipilwa
na mtundu usali mtundu ngawo–ngawo.
Nikakukalifyeni
na mtundu wa ŵanthu opusa.’”
20 Nipo Yesaya motangʼa mtima olaŵila kuti, “Mulungu olaŵila kuti,
‘Nafwaniwa na ŵala enzonisakilalini.
Naliwonesha kwa ŵala enzokonshakolini va newo.’”
21 Koma va Aisilayeli elaŵila kuti, “Nsiku yonse natambulula manja kwa ŵanthu osamvwila na onisusha.”
Currently Selected:
Aro 10: GMN
Highlight
Copy
Compare
Share
Want to have your highlights saved across all your devices? Sign up or sign in
Nsenga New Testament © The Bible Society of Zambia, 2015.
