Aro 9

Ŵanthu ŵa Mulungu osaluliwa

1Nulaŵila vyendi mwa Kristu, nutalalini wenye yayi, mtima wangu unicitila umboni mu Mzimu Mtuŵa 2kuti nili na cisoni cikulu na kuŵaŵiwa kosasila cikomo ca enekwasu Ayuda, ŵanthu ŵa mtundu wangu. 3Sembe nenze wosangalala kuti mu malo mwawo, newo ninkhale woshamikiwa, osaŵa soti wa Kristu. 4Ŵeve ni Aisilayeli ŵecisalula Mulungu kuti aŵe ŵana ŵake, nipo eŵapa ulemelelo. Mulungu epangana nawo, nipo eŵapa Matetulo ŵake, mwambo wa cilombelo, nipo eŵapa malayizyo ŵake. 5Aŵa ni azukulu ŵa makolo ŵasu ŵa macezo, kwamene kwecifumila Kristu (polaŵila va umunthu wake), ni Mulungu pa vonse, acinzikiwe mpaka nsita zosasila. Amen.

6Niyelini kuti Malizu ŵa Mulungu akangiwa yayi. Pakuti ni wonselini ovyalika kwa Aisilayeli ali Aisilayeli ngawo–ngawo. 7 Niye kuti ni wonselini azukulu ŵa Abulahamu ali ŵana ŵake. Koma Mulungu ewuzya Abulahamu kuti, “Ŵana ŵa Isaki ŵeka niye ŵatiakayitiwe kuti azukulu ŵako.” 8Niye kuti, ni ŵanalini wonse ŵa Abulahamu ŵamene ali ŵana ŵa Mulungu yayi. Azukulu ŵene–ŵene ni ŵala ŵeka ŵana ŵa cilayizyo ca Mulungu. 9 Pakuti Mulungu elayizya kuti, “Pa nsita ino caka cikuza nikawele nipo Sala akawone mwana mwanalume.”

10Ni apolini peka yayi, ŵana aŵili ŵa Labeka awusu wawo enze ŵamo, ŵamene ali kolo yasu Isaki. 11-12 Koma Mulungu ewuzya Labeka kuti, “Mkulu akatumikile mtontho,” kuti kusaluliwa kwa mwana yumo kutweshe cakupangwa Mulungu mwine. Emuwuzya teti ŵana penzeakaliyovyalika, nipo enze akaliyocitapo ciliconse ciweme keno ciyipa; tetyo msalulo wa Mulungu wenze pa wite wake osati pa ciliconse cecicita. 13 Pala Malembo olaŵila kuti, “Yakobo nemutemwa, koma Esawu nemutinkha.”

14Tilaŵile vinji lomba? Kansi tingalaŵile kuti Mulungu ni wosalungama? Yayi. Na patontho kumo. 15 Pakuti yeve ewuzya Mose kuti,

“Nikacitile lusungu wanupangwa kucitila lusungu;

nikamvwile cisoni wanupangwa kumvwila cisoni.”

16Tetyo, cukonkhalini pa cakupangwa munthu keno cakucita, koma cikulu ni lusungu ya Mulungu. 17 Pakuti Malembo tuŵelenga kuti Mulungu ewuzya Falawo kuti, “Nekuyika pa ufumu, kuti niwoneshe mphamvu zangu mwa wewo, na kuti zina yangu imvwike calo conse ca pansi.” 18Tetyo, tuwona kuti Mulungu ocitila lusungu munthu wakupangwa kucitila lusungu, nipo ocitisha nthota munthu wakupangwa kucitisha nthota.

Mulungu wokalipa koma soti ocita lusungu

19Keno munikonshe lomba kuti, “Cikomo ni cinji akalupangwa kuŵalanga ŵanthu? Kansi ni ŵani angaleshe Mulungu kucita vakupangwa kucita?” 20 Koma wewo niwe ŵani munthu tyala kuti ukosushana na Mulungu? “Kansi nongo ingakonshe woyiwumba kuti, ‘Mwaniwumbilanji teti?’” 21Tuziŵa kuti wowumba ali na ulamulilo wowumba nongo ziŵili na lito yamene iyi, iyakine ya masiku woyikiwa, na iyakine ya masiku wonse.

22Mulungu ali nawo ulamulilo woteti; angawoneshe ukali wake na mphamvu zake. Koma enze wolezyela nongo za ukali, zeciwamyila kuceneka. 23Nipo Mulungu epangwa kuti aziŵishe kulemela kwa ulemelelo wake pa nongo za lusungu, weciwamya mwa ulemelelo – 24cukanga sewo ŵeciyita, osati kufumila kwa Ayuda ŵeka yayi, koma kufumila ku ŵanthu asali Ayuda. 25 Ngani mwakulaŵilila Mulungu mu buku ya Mneneli Hoseya kuti,

“Ŵala enzelini ŵanthu ŵangu, niŵayite ‘ŵanthu ŵangu.’

Mtundu wanenzotemwalini nikawuyite kuti, ‘wotemweka wangu.’”

26 “Nipo ku malo kwatiakawuzyiwe kuti, ‘Nimwelini mtundu wangu.’

Kwamene uko akayitiwe kuti ‘Ŵana ŵa Mulungu wa moyo.’”

27Nipo Mneneli Yesaya elaŵila moŵilikizya va Aisilayeli kuti, “Cukanga Aisilayeli apake ngani misece ya ku cimmana, koma oŵelengeka tyala akapulumuke. 28 Pakuti Asikulu akapingule milandu ya ŵanthu pa calo ca pansi. Nipo akacite mwa kapamphu na mosatalimfya.” 29 Ivi vili ngani mwecilaŵilila Mneneli Yesaya kuti,

“Kuti Leza wa Mphamvu zonse aliyotisiyile azukulu ayakine,

sembe tecenekeka ngani Sodoma na Gomola.”

Aisilayeli na Malizu Aweme

30Ici niye catulaŵila, kuti ŵanthu ŵa mitundu iyakine, enzosakilalini cilungamo efwaniwa kuti ni wolungama pa menso pa Mulungu kupitila mu cicetekelo. 31Koma Aisilayeli, enzoyezya–yezya kufwaniwa kuti ni wolungama pa menso pa Mulungu posunga Matetulo ŵa Mose, ekangiwa. 32Cikomo ni cinji? Cikomo ni cakuti enzopangwa kufwaniwa kuti ni wolungama pa menso pa Mulungu, osati pocetekela, koma pomekela nchito ziweme. Ekumbulwa pa mwala wokumbulwisha ŵanthu. 33 Ngani Malembo olaŵililatu kuti,

“Newo nuyika mu Ziyoni mwala wakuzokumbulwisha ŵanthu,

mwala woŵaponesha.

Koma wocetekela mwa yeve akacitelini nsoni.”

Currently Selected:

Aro 9: GMN

Highlight

Copy

Compare