Luka 24
24
Yesu owuka kwa akufwa
(Mt 28:1-10; Mk 16:1-8; Yh 20:1-10)
1Mmamawa pa nsiku yokonkha Sabata ya Ayuda, anakazi ŵala eluta ku manda, etakula vonunkhila veciwamya. 2Efwana cimwala cala cikulu cenze pa mulyango wa manda cakankhiwa kale. 3Peciloŵa mu manda mwala aliyocifwane citanda ca Asikulu Yesu. 4Penze akali wosila nzelu pa ivi, eyingowona ŵanthu aŵili aluvwale vonyezimila ali peneme pafupi na ŵeve. 5Anakazi ŵala ecita wowa noŵelamisha vinso vawo pansi. Ŵanthu ŵala eŵakonsha kuti, “Mukuzosakililanji munthu wa moyo pakati pa ŵanthu akufwa? 6Muliye muno yayi, wawuka. Kumbukani vecikuwuzyani peenze ku Galileya. 7Pala ekuwuzyani kuti, ‘Mwana wa Munthu owamila kutwaliwa mu manja mwa ŵanthu woyifya, kupanyikiwa pa mtanda, nowuka kwa akufwa pakapita masiku atatu.’” 8Pala anakazi ŵala eŵakumbuka cendi malizu ŵala.
9Nipo peciwelako ku manda kwala, eŵawuzya asambili kumi na yumo ŵala, na ŵanthu ayakine wonse. 10Anakazi ŵala enze Maliya Magadalena, Yohana, na Maliya, anyina ŵa Yakobe. Ŵeve pamo na ayawo ayakine ewuzya nthumi zala zonse. 11Koma ŵeve eyingoviyesa ivi va mu maluŵa, motetyo, aliyoŵacetekele anakazi ŵala.
12Koma Petulo eyima nowutukila ku manda. Eŵelamilamo nowona nyula za malilo zeka, nowelelamo ali okanganishiwa na vecitika.
Vocitika pa njila ya ku Emawusi
(Mk 16:12-13)
13Nsiku yamene iyo asambili aŵili enzokuya ku munzi woyitiwa Emawusi. Kufumila ku Emawusi kufwika ku Yelusalemu nimsenga wokumana ngani makilomita kumi na imo. 14Enzolaŵizyana pa vonse vecitika. 15Penzolaŵizyana, Yesu mwine wake efwika pafupi nokonkhana nawo. 16Koma aliyomuziŵe.
17Tetyo, Yesu eŵakonsha kuti, “Kansi mukuya mulaŵizyana votyani pa njila pano?”
Apo ŵeve epanama, vinso vawo vili va kuŵa na cisoni.
18Tetyo, yumo zina yake Kleopa, emukonsha kuti, “Kansi mulwendo ni mwewo mweka muno mu Yelusalemu oziŵalini vecitika muno masiku apita aŵa?”
19Yesu eŵakonsha kuti, “Ni votyani?”
Ŵeve elaŵila kuti, “Va Yesu wa ku Nazaleti, yeve enze mneneli wamene malizu ŵake na vocita vake venze va mphamvu pa menso pa Mulungu na pa ŵanthu kumo. 20Akulu ŵa Ansembe na akulu ŵasu ayakine emutwala kuti afwaniwe mlandu nopayiwa, nipo emupanyika pa mtanda. 21Sewo tenzolindila kuti yeve niye ŵatiazanunule Aisilayeli, koma ha! Ni nsiku ya citatu pevecitika vonse ivi. 22Koma soti anakazi ayakine ŵa mu umba yasu etikanganisha. Ŵeve eciya ku manda mmamawa, 23niye olaŵila kuti aliyocifwane citanda cala. Lomba peciwelako enzolaŵila kuti ewona angelo eŵawuzya kuti Yesu ali moyo. 24Ayakine ŵa mu umba yasu eluta ku manda kwala, nipo efwana cendi ngani mwenzolaŵilila anakazi ŵala, koma yeve aliyomuwone yayi.”
25Apo Yesu elaŵila kuti, “Ha! Koma niye kuti mwewo nimwe ŵanthu wopusa, mwewo musacetekela mmangu vonse vala venzolaŵila aneneli. 26Kansi mwewo muziŵalini kuti Mpulumushi Wolayizyiwa wala enzowamila kunzunziwa, kuti aloŵe mu ulemelelo wake?” 27Nipo Yesu etatika kuŵatanthauzila vilembewa va yeve mu Malembo wonse, kutatikila pa mabuku ŵa Mose mpaka mabuku ŵa aneneli wonse.
28Pecifwika pafupi na ku munzi kwenzokuya, Yesu ecita nga opitilila. 29Koma ŵeve emuyumilila kuti, “Muŵe nase kuno, pakuti kwatatika kale kufipa; wonani zuŵa yuloŵa.” Pamene apo yeve eloŵa mu ngʼanda nonkhala nawo.
30Pecinkhala nawo polyela, Yesu etola mkate, nipo pecitembezya Mulungu, esuna noŵayaŵila. 31Nsita iyo menso ŵawo evulika, nomuzindikila, nipo nsita iyo yeve aliyowoneke soti. 32Tetyo, ŵeve etatika kulaŵizyana kuti, “Ni vyendi, mitima yasu ingokuti phwii, mwenzolaŵilila nase pa njila pala notikonkhololela Malembo.”
33Nsita yamene iyo eyima kuwelela ku Yelusalemu. Eciyofwana asambili kumi na yumo ŵala ewungana pamo na ayawo ayakine. Oŵawuzya ŵala aŵili 34kuti, “Asikulu ewuka cendi, nipo ewonekela kwa Simoni.” 35Tetyo, nawo soti ŵala aŵili ekonkholola vecitika pa njila pala, nipo soti mwecimuziŵila Yeve penzosuna mkate.
Yesu owonekela kwa asambili ŵake
(Mt 28:16-20; Mk 16:14-18; Yh 20:19-23; Mc 1:6-8)
36Ŵeve penzolaŵila tetyo, Yesu mwine wake ecizopanama pakati pawo nolaŵila, “Mtendele unkhale namwe.”
37Koma ŵeve ezizimuka, nocita wowa poyesa kuti awona cimuwuka. 38Tetyo, Yesu elaŵila kuti, “Muvutikilanji, muzipayilanji na makonsho mu mitima mwanu? 39Wonani manja ŵangu na mendo ŵangu kuti ni newo cendi. Nikumyeni muwone, pala cimuwuka ciliye muŵili na mlopa ngani muwona kuti newo nili navo.”
40Pecilaŵila ivi eŵawonesha manja ŵake na mendo ŵake. 41Ŵeve enzeakaliyocetekela cikomo ca cimwemwe, nipo esila nzelu. Tetyo, Yesu eŵakonsha kuti, “Kansi pano muli na kanthu kakulya?” 42Emupa ciduswa ca saŵi coyoca. 43Yeve epokela saŵi yala, ecilya ŵeve ololesha.
44Nipo eŵawuzya kuti, “Ni ivi venenzokuwuzyani penenze namwe. Pala nenzolaŵila kuti vonse vupangwika kukwanilishiwa vilembewa va newo mu Matetulo ŵa Mose, mu mabuku ŵa aneneli na mu buku ya Masalimo.”
45Tetyo, eŵavulila mitima kuŵakonkhololela luweme Malembo. 46Eŵawuzya kuti, “Vilembewa ni ivi: vakuti Mpulumushi Wolayizyiwa wala enzopangwika kunzunziwa, nowuka kwa akufwa pakapita masiku atatu, 47Kuti mu zina yake malizu ŵake aŵilizyiwe ku ŵanthu ŵa mitundu yonse, kutatikila ku Yelusalemu, malizu olaŵila kuti ayaluke mtima, kuti Mulungu aŵalekelele viyipa vawo. 48Mwewo nimwe mboni za ivi. 49Newo nikamutumizyileni cawanzi cecilayizya Atata. Koma mwewo nkhalani mu mzinda muno mpaka mukapokele mphamvu zofumila Kululu.”
Yesu okwela Kululu
(Mk 16:19-20; Mc 1:9-11)
50Tetyo, Yesu eŵatangulila kufuma mu mzinda wa Yelusalemu mpaka ku munzi wa Betaniya. Kwamene kwala ekweza manja wake noŵashukisha. 51Penzoŵashukisha tetyo, esiyana nawo, notolewa kuya Kululu. 52Ŵeve pemucinzika, pa vuli pake ewelela ku Yelusalemu na cimwemwe cikulu. 53Tetyo, enzowungana mu Ngʼanda ya Mulungu nsita na nsita otembezya Mulungu.
Currently Selected:
Luka 24: GMN
Highlight
Share
Copy
Want to have your highlights saved across all your devices? Sign up or sign in
Nsenga New Testament © The Bible Society of Zambia, 2015.