Luka 23
23
Yesu ku nsaka ya Pilato
(Mt 27:1-2,11-14; Mk 15:1-5; Yh 18:28-38)
1Kaupo konse kala keyima nomutwala Yesu kwa Pilato. 2Ŵeve etatika kulaŵilila Yesu elaŵila kuti, “Munthu uyu timufwana opumvya ŵanthu ŵa mtundu wasu. Otilesha kusonkha msonkho ku mfumu ya ku Roma. Olaŵila soti kuti yeve ni Mpulumushi Wolayizyiwa wala nipo soti ni mfumu.”
3Pilato emukonsha Yesu kuti, “Kansi wewo niwe mfumu ya Ayuda?”
Yesu emuyasuka kuti, “Mwalaŵila mweka.”
4Pamene apo Pilato ewuzya Akulu ŵa Ansembe na ŵanthu wonse ŵala kuti, “Numufwanalini na mlandu uyu munthu.”
5Koma ŵeve eyumilila nolaŵila kuti, “Uyu otumfya mitima ya ŵanthu na vakusambizya mu calo conse ca Yudeya kutatikila ku Galileya, nofwika konse kuno.”
Yesu ku nsaka ya Helode
6Pilato pecimvwa ici eŵakonsha kuti, “Kansi uyu munthu ni wa ku Galileya?” 7Tetyo, pecimvwa kuti ofumila ku citwa cakulamulila Helode, emutumizya kwa Helode wala, enze soti mu Yelusalemu masiku ŵala.
8Helode powona Yesu, etemwa ngako, cikomo enzokumvwa va yeve. Kwa nsita itali enzopangwa kumuwona nipo enzolindila kuti awone Yesu ocita cokanganisha ciyakine. 9Helode emukonsha makonsho anyinji, koma Yesu aliyoyasuke kanthu. 10Akulu ŵa Ansembe na Asambizyi ŵa Matetulo epanama pamene apo nomulaŵilila Yesu vinthu vinyinji. 11Helode na asilikali ŵake etatika kumuseka Yesu nomutafulila. Emuvwalika covwala ca mfumu, nipo yeve Helode emuwezya kwa Pilato. 12Nsiku iyo Helode na Pilato eciŵa wotemwana, kale enzotinkhana.
Pilato olamulila kuti Yesu apayiwe
(Mt 27:15-26; Mk 15:6-15; Yh 18:39—19:16)
13Pilato ewunganisha Akulu ŵa Ansembe na Akulu ŵa Ayuda na winji wa ŵanthu. 14Eŵawuzya kuti, “Mwamuleta uyu kwa newo kuti ni munthu wotumfya ŵanthu. Nipo wonani, newo namukonsha pa menso panu, koma numufwanalini na mlandu pa vonse vamumulaŵilila. 15Na Helode aliyomufwane na mlandu, ni cikomo cake wamuŵezya kwa sewo. Uyu aliyocite kanthu kowamila kupayiwa. 16Motetyo, nimkwapule tyala nommangulula.” [17Pilato wala enzowamila kuŵamangululila mkaidi yumo pa nsita ya cisangalalo ca Pasaka.]
18Koma ŵanthu wonse ŵala etatika kuŵilikizya pamo kuti, “Mpanyikeni uyo! Mutimangululile Balaba.” 19(Balaba emuyika mu jele cikomo coukila boma mu mzinda, nopaya ŵanthu.)
20Pilato epangwa kumangulula Yesu, tetyo eciyolaŵila nawo soti ŵala ŵanthu. 21Koma ŵeve eŵilikizyilatu kuti, “Mpanyikeni, mpanyikeni!”
22Pilato eŵakonsha ka citatu kuti, “Kansi wayifyanji wamene uyu? Nufwanalini mlandu wowamila kuti apayiwe. Motetyo, ningomkwapula nommangulula.”
23Koma ŵeve emuyumilizya mokweza malizu kuti Yesu apanyikiwe, kuŵilikizya kwawo kwenzopitilila ngako kuti Pilato aŵamvwile. 24Tetyo, Pilato epingula kuti, venzosenga ŵala ŵanthu vicitike. 25Eŵamangululila munthu wala wenzosenga, wala epozewa mu jele cikomo cowukila boma nopaya ŵanthu. Koma Pilato etwala Yesu kwa asilikali kuti amupaye ngani mwewenzopangwila winji wa ŵanthu.
Yesu opanyikiwa pa mtanda
(Mt 27:32-44; Mk 15:21-32; Yh 19:17-27)
26Asilikali emutola Yesu nakuya naye kuti akampanyike. Pa njila ekata munthu muyakine wa ku Kilene, zina yake Simoni. Yeve enzofumila ku minzi. Emutakulisha mtanda wa Yesu kuti awutakule, na kuti owokonkhelela pa vuli pa Yesu.
27Ŵanthu anyinji enzomukonkhelela. Pakati pawo penze soti anakazi enzozigunda pa nganga na citinthi nolila cikomo ca yeve. 28Koma Yesu eŵacewukila noŵawuzya kuti, “Mwewo anakazi ŵa ku Yelusalemu, kosalilila newo yayi, koma mulile cikomo ca mwewo mweka na ŵana wanu. 29Pakuti masiku akuza ŵanthu azokuti, ‘Ni woshukishiwa acumba, anakazi wosavyala, anakazi akaliyonyonshapo mwana.’ 30#Hs 10:8 Nsita iyo azesenge malupili kuti, ‘Tiponeleni,’ nipo soti ku malupili kuti, ‘Tivwinikileni.’ 31Keno ŵanthu ocita voteti cimuti pacikali cinana, cizaŵe tyani cikazoyuma?”
32Asilikali ŵala etola soti ŵanthu ayakine aŵili, ŵamene enze vinyankapondo, kuti apayiwe pamo na Yesu. 33Pecifwika ku malo oyitiwa Malo ŵa Cibade ca Mutu, epanyika Yesu kwamene uko pa mtanda. Epanyikako soti vinyankapondo vala, ciyakine ku kwanja kwendi, ciyakine ku kwanja ya manzyele. 34Yesu elaŵila kuti, “Atata, muŵalekelele aŵa ŵanthu, cikomo oziŵalini vakucita.” Ŵeve ŵala eyaŵana vovwala vake pocita mayele.
35Ŵanthu ayakine wonse epanama pamene apo nowonelela. Koma soti Akulu ŵa Ayuda enzomunena nolaŵila kuti, “Epulumusha ayakine, azipulumushe yeka keno ni wamene cendi Mpulumushi wala wecisalula Mulungu.”
36Nawo soti asilikali emuseka. Efwika pafupi na yeve, nomupa vinyu wosasa kuti amwe. 37Elaŵila kuti, “Keno niwe cendi mfumu ya Ayuda, zipulumushe weka.”
38Palulu pa mtanda penze malizu olaŵila kuti, “Uyu ni mfumu ya Ayuda.”
39Cigaŵenga cipanyikiwa nawo, citatika kutukana Yesu nolaŵila kuti, “Ha! Kansi ni wewolini Mpulumushi Wolayizyiwa wala? Uzipulumushe weka pamo na sewo.”
40Koma muyake wala emukalipila, elaŵila kuti, “Kansi wewo, uyopalini na Mulungu kumo, uziŵilatu kuti nawe soti wapokela cilango ici? 41Tetyo, sewo vutiwamila vamene ivi. Tupokela kulingana na veticita. Koma aŵa aliyoyifye ciliconse.”
42Nipo elaŵila kuti, “Yesu, mukanikumbuke mukayofwika mu Ufumu wanu.”
43Yesu emuyasuka kuti, “Ni cendi nulaŵilisha, kuti lelo yamene unkhale nane ku Paladayiso.”
Imfwa ya Yesu
(Mt 27:45-56; Mk 15:33-41; Yh 19:28-30)
44Nsita peyikwana 12 koloko mzuŵa, peŵala cimfinzi pa calo conse ca pansi mpaka 3 koloko mcingulo#23:44 3 koloko mcingulo keno 15:00 hrs, 45zuŵa peyefisika. Pamene apo cinyula cocingilizya cala ca mu Ngʼanda ya Mulungu cingʼambika pakati na pakati. 46#Ms 31:5 Yesu elaŵila moŵilikizya malizu kuti, “Atata nutwala mzimu wangu mu manja mwanu.” Pecilaŵila ivi, esilizyika.
47Sentuliyo, mkulu wa asilikali ŵa Ciroma, peciwona vicitika, etembezya Mulungu, nolaŵila kuti, “Ni cendi munthu uyu enze wolungama.” 48Ŵanthu wonse ewungana kuzowonelela venzocitika, ewelela kwawo ozigunda pa nganga na citinthi. 49Koma ŵanthu wonse enzoziŵana na Yesu, na anakazi enzomukonkha kufuma ku Galileya, epanama patali kuwona ivi.
Yesu oyikiwa mu manda
(Mt 27:57-61; Mk 15:42-47; Yh 19:38-42)
50-51Penze munthu muyakine, zina yake Yosefe, wa munzi wa kwa Alimatiya. Enze munthu muweme na wolungama. Yeve enzolindila kuwela kwa Ufumu wa Mulungu. Cukanga enze mu Kaupo Kakulu ka Ayuda, enzozomelezyanalini nawo ayake ŵa mu Kaupo kala venzopangana. 52Yeve eciya kwa Pilato kuyomusenga citanda ca Yesu. 53Tetyo, ewuleta pansi nowuvunga mu nyula ituŵa, nowuyika munkhwema yoŵaziwa na ŵanthu. Ŵala manda enze akaliyoyikamo munthu muyakine aliyense. 54Yenze nsiku yokonzekela, nipo nsiku ya Sabata yenzotatika.
55Anakazi ŵala ewela na Yesu kufumila ku Galileya, ekonkha Yosefe, ewona manda na mweciyikila citanda ca Yesu. 56Nipo ewelela na kuyotatika kuwamya vonunkhila nipo soti na mafuta aweme. Tetyo, pa nsiku ya Sabata epumula kulingana na Matetulo ŵa Mose.
Currently Selected:
Luka 23: GMN
Highlight
Share
Copy
Want to have your highlights saved across all your devices? Sign up or sign in
Nsenga New Testament © The Bible Society of Zambia, 2015.