Macitilo 28

Paulo pa cilumba ca Melita

1Petipulumuka tetyo, ticimvwa kuti cilumba cala zina yake ni Melita. 2Ŵanthu ŵa apo eticitila viweme ngako. Etipokela luweme notiyashila mulilo, cikomo kwitatika kupona mvula nipo kwizizila. 3Paulo etema nkhuni nowelako na mtolo, nipo peciziyika pa mulilo, mu mtolo mwala mwifuma njoka cikomo cakupya. Imuluma nokatilila ku kwanja kwake kwala. 4Ŵanthu ŵala peciwona njoka yala ililende ku kwanja kwake, etatika kuwuzyana kuti, “Ni cendi munthu uyu ni nyankapondo. Cukanga wapulumuka pa cimmana, koma Mulungu wa cilungamo aliyozomezye kuti aŵe na moyo.” 5Koma Paulo eyikunkhumulila pa mulilo njoka yala, osacenekeka konse. 6Ŵanthu ŵala, enzolindila kuti muŵili wake uvimbe, keno kuti apone pansi movundumukizya nakufwa. Eciŵa omulolesha nsita itali, koma peciwona kuti paliye ciliconse ca cilwendo camucitikila, eyalusha malingililo nolaŵila kuti, “Uyu ni yumo wa milungu.”

7Pafupi na pa malo apo, penze minda ya Pubiliyo, mkulu wa pa cilumba pala. Yeve etipokela notisunga luweme masiku atatu. 8Awisi wake wa Pubiliyo enze lele, cikomo enzolwala malungo na kamlopa. Paulo eloŵa mu cipinda cake notatika kumulombela, nipo emuyika manja pa mutu nomupozya. 9Pevicitika ivi, ŵanthu ayakine wonse olwala pa cilumba pala ewela, Paulo eŵapozya. 10Ŵanthu ŵala etipa mcinzi ngako, nipo petitatika soti ulwendo wasu wa pa ciwato, etipa vonse vetenzeve.

Paulo ofwika ku Roma

11Pepepita myezi itatu, tiyima cendi ulwendo wasu wa pa ciwato ciyakine, cinkhala pa cilumba pala pa nsita ya mphepo. Ciwato cala cenzofumila ku Alekisandiliya, nipo ciziŵikilo cake cenze “Mapasa.” 12Petifwika ku Silakusa, tinkhalako masiku atatu. 13Kufuma kwala tipitilila nakuyofwika ku Legiyo. Pepepita nsiku imo, mphepo ya ku mmwela itatika kukuntha, tetyo pa nsiku yokonkhapo tifwika ku Putewoli. 14Kwala tifwana enekwasu, nipo etisenga kuti tinkhale nawo masiku asanu na aŵili. Motetyo, ticiyofwika ku Roma.

15Enekwasu ŵa kwala pecimvwa va sewo, ewela mpaka ku Nsaka ya Apiyo nipo soti ku munzi woyitiwa Ngʼanda za Alwendo Zitatu kuzoticinguzyila. Paulo peciŵawona tetyo, etembezya Mulungu, notangʼa mtima.

16Petiloŵa mu mzinda wa Roma, Paulo ezomelezyewa kuŵa kwa yeka, na msilikali womulindilila.

Paulo oŵilizya kwa Ayuda ku Roma

17Pepepita masiku atatu, Paulo ewunganisha acitangulila ŵa Ayuda ŵa kwala. Peciwungana, yeve eŵawuzya kuti, “Mwenekwasu, newo nili kuno ngani mkaidi ofumila ku Yelusalemu. Cukanga niliyoyifyile mtundu wasu keno myambo ya makolo ŵasu, koma cendi nitwaliwa kwa Aroma. 18Ŵeve pecinikonsha, epangwa kunimangulula, cikomo aliyofwane mlandu wowamila kunipayila. 19Koma Ayuda pecikana, nikakamizyiwa kusenga kuti mlandu wangu uyu nizenifukame ku mfumu ya ku Roma kuno. Nikutilini nenze na kanthu kolaŵilila mtundu wangu yayi. 20Ni cikomo cake nakuyitani kuti nilaŵile namwe. Pakuti namangiwa na unyolo uyu cikomo cocetekela cinthu cakulindila Aisilayeli.”

21Acitangulila ŵala emuyasuka kuti, “Sewo tiliyopokelepo makalata ofumila ku Yudeya olaŵila va mwewo. Paliye soti muyakine mwa enekwasu efwika kuno kuzotikonkhololela keno kuzotiwuzya viyipa vanu. 22Koma ngako–ngako ni ciweme kuti mutiwuzye malingililo ŵanu, pakuti va umba yanu ya pa mbali iyi tuziŵa kuti paliponse ŵanthu osushana nayo.”

23Ŵeve epangana naye nsiku yakuti akakumane naye, nipo anyinji ewela ku ngʼanda kwenzonkhala. Kutatikila mmawa mpaka mcingulo Paulo elaŵila nawo, noŵakonkhololela va Ufumu wa Mulungu. Pakuŵasambizya malizu ŵa mu Matetulo ŵa Mose nipo soti mu mabuku ŵa aneneli, enzoyesa kuŵanyengelela kuti acetekele Yesu. 24Ayakine enyengelelewa cendi na vecilaŵila, koma ayakine aliyocetekele. 25Lomba pakuti ŵanthu ŵala aliyomvwane, eyingofumapo. Koma mphela penzeakaliyofumapo, Paulo eyikililapo malizu ŵamo ŵakuti, “Mzimu Mtuŵa elaŵila vyendi peciwuzya makolo ŵanu mwa Mneneli Yesaya kuti, 26 ‘Nkhoya ku ŵanthu ŵa mtundu uyu uŵawuzye kuti,

“Kumvwa muzamvwe,

koma muzemvwishishelini;

kuwona muzemuwone,

koma muzemuwonesheshelini.

27Cendi mtima wa ŵanthu ŵa mtundu uyu wafunala,

akumvwalini na matu ŵawo,

nipo ŵavala menso ŵawo.

Kuyopa kuti angawone na menso ŵawo,

nipo angamvwe na matu ŵawo,

angamvwishe na mtima wawo,

noyaluka mwa newo

kuti niŵapozye.”’

28“Ziŵani lomba kuti Mulungu watumizya cipulumusho cake ici ku ŵanthu ŵa kunja ŵanthu asali Ayuda, ŵeve azamvwe.” [29Paulo pecilaŵila malizu aŵa, Ayuda ŵala efumapo osushana ngako.]

30Lomba Paulo enkhala kwala vyaka viŵili vonse mu ngʼanda yake yozyamika, nipo enzoŵapokela luweme wonse owela kuzomuwona. 31Enzoŵilizya va Ufumu wa Mulungu, nipo enzoŵasambizya va Asikulu Yesu Kristu patuŵa, paliye muyakine aliyense womulesha.

Currently Selected:

Macitilo 28: GMN

Highlight

Compare

Copy