Macitilo 27

Otumizya Paulo ku Roma

1Pevisimikizyika kuti tuwamila kuya ku Italiya mu ciwato, emutwala Paulo pamo na akayidi ayakine kwa Sentuliyo citangulila wa asilikali, zina yake Yuliyo, wa umba ya asilikali yoyitiwa Umba ya Augusto. 2Petikwela mu ciwato cofumila ku Adilamitiyo cenze cokonzekelatu kuya ku madowoko ŵa ku Asiya, nipo tiyima. Alistaliko, Mmasedoni wa ku mzinda wa Tesalonika, enze nase.

3Mmawa mwake tifwika ku Sidoni, nipo Yuliyo ewamila mtima Paulo, nomuzomezya kuluta kuwotemweka ŵake kuti akamusunge luweme. 4Kufuma uko, tipitila ku mpoto kwa cilumba ca Kiplo cikomo mphepo yenzokuntha kufumila kwenzokuya. 5Titawuka cimmana citwa ca ku Siliya na Pamfiliya nofwika ku Mila, mzinda wa ku Likiya. 6Kwamene uko citangulila wa asilikali wala efwanako ciwato cofumila ku Alekisandiliya cokuya ku Italiya, nipo etitakula mu ciwato cala.

7Tiyenda patontho–patontho kwa masiku anyinji, nakuyofwika pafupi na Kinido mosawukila. Lomba pakuti mphepo itivuta cendi, tiliyotweshe kupitilila ulwendo wasu mwolunjika, tetyo tingopitila ku mmwela kwa cilumba ca Klete, petipitilila Salimone. 8Tiyenda mosawukila mu mbali mwa cilumba cala, nakuyofwika ku malo ayakine woyitiwa Madowoko Aweme, pafupi na mzinda wa Laseya.

9Nsita itali ipita, nipo cukanga nsita yolilesha kulya yenze ipita kale. Nsita iyo ulwendo wa pa manzi wenze woyofya. Pamene apo Paulo eŵacenjezya kuti, 10“Mwenekwasu, newo nuwona kuti pa ulwendo wasu uyu, vinthu vinyinji vizecenekeke notayika, osati katundu weka na ciwato yayi, koma soti myoyo yasu.”

11Koma citangulila wa asilikali wala emvwila kapitawo wa ciwato nipo soti mwine wake wa ciwato cala, osati malizu ŵa Paulo yayi. 12Lomba pakuti dowoko yenzelini luweme kunkhalako pa nsita ya mphepo, anyinji mwa ŵeve epangwa kufumako, noyesa kuti angatweshe kuyofwika ku Fenikisi nonkhala uko pa nsita ya mphepo. Fenikisi yenze dowoko ya ku Klete, yolola ku mmwela ca ku mcingulo, nipo soti ku mpoto ca ku mcingulo.

Okumana na cinkhuka pa cimmana

13Mphepo ya ku mmwela peyitatika kukuntha patontho–patontho, ŵanthu eyesa kuti lomba afwana mpata wakuti acite vakupangwa. Motetyo, eyima ulwendo, noyenda mbali mwa cilumba cala ca Klete. 14Koma paliyopite nsita itali mphepo yokuntha, yoyitiwa Yulakulo, itatika kukuntha kufumila ku silya. 15Ikuntha ciwato cala, niye pakuti tiliyotweshe kukumana na mphepo yala tizomela kutolewa nayo. 16Tifwika pafupi na ka cilumba coyitiŵa Kawuda, ku citwa kwayisafwika mphepo. Kwamene kwala movutikila titwesha kuthangulila wato wodonsewa na ciwato cala. 17Nipo ekwezeka wato wala pa ciwato, nipo pa vuli pake emanga ciwato cala na nthambo kuti acitangʼishe. Lomba poyopa kuti angakagundishe ku misece wa ku Siliti, esisha mathanga nozomela kuyingotolewa tyala na mphepo.

18Pakuti tisawushiwa ngako na cinkhuka cala mmawa mwake etatika kutaya katundu mu manzi. 19Nipo pa nsiku ya citatu yake etaya mu cimmana na vipangizo va wato kumo. 20Tiliyowone zuŵa keno nyenyezi masiku anyinji, koma cinkhuka cenze cikali na mphamvu mpaka tonse titayilatu cicetekelo cakuti tipulumuke.

Paulo okosesha mtima ayake ŵa ulwendo

21Pa nsita itali ŵala ŵanthu aliyeulye kanthu. Lomba Paulo epanama pakati pawo nolaŵila kuti, “Mwenekwasu, kuti mwimvwila venilaŵila newo, osafuma ku Klete, sembe vinthu viliyoceneneke notayika moteti. 22Koma lomba nukuwuzyani kuti mukose mtima, pakuti paliye cukanga yumo mwa mwewo ŵatiatayike, koma ciwato ceka niye caticicenekeke. 23Usiku wasila kwinizela mngelo wa Mulungu, Mulungu ni wangu nipo nine wake, nipo numucinzika. 24Mngelo wala eniwuzya kuti, ‘Osacita wowa, Paulo. Uwamila kuyopanama pa menso pa mfumu ya ku Roma. Mulungu, mwakuwama mtima kwake, wazomelezya kuti ayako wonse ŵa ulwendo aŵe moyo.’

25“Niye mwewo, tangʼani mtima, pakuti nucetekela Mulungu, kuti vawaniwuzya ivi vizevicitike cendi mwavilili. 26Koma tikasakamile pa cilumba ciyakine.”

Ofwendela ku silya

27Pakati pa usiku wa kumi na cinayi (14), mphepo yenzeyikalutikankha pa cimmana ca Adiliya, anyanchito ŵa pa wato elingilila kuti ali pafupi na ku silya. 28Lomba peciyesa kupima kunoka kwa cimmana efwana mamita okwanila makumi anayi (40). Peciyenda patontho epima soti nofwana soti mamita okwanila patontho makumi atatu (30). 29Poyopa kuti ciwato cingakasamile pa myala eselusha anangula anayi mu cimmana ku vuli kwa ciwato. Nipo enzoyingolomba mopangwa kuti kuce.

30Anyanchito ŵa pa ciwato ŵala enzopangwa kuwutukamo mu ciwato mwala. Tetyo, eselushila wato utontho pa manzi, nocita ngani opangwa kuselusha anangula mu cimmana ku nthangu kwa ciwato. 31Motetyo, ewuzya citangulila wa asilikali wala pamo na asilikali ŵake kuti, “Keno ŵanthu aŵa onkhalalini mu ciwato muno, cendi mwewo mungatweshelini kupulumuka yayi.” 32Tetyo, asilikali ŵala etenda nthambo za wato wala nowulekelela kuti upone.

Paulo okosesha soti ayake ŵa ulwendo

33Pekwenze pafupi kuca, Paulo eŵasenga wonse ŵala kuti alyeko kanthu. Eŵawuzya kuti, “Mwaŵa masiku kumi na anayi lomba mitima yanu ili mu malele, nsita yonse iyi osalya keno kulaŵa kanthu. 34Nukusengani lomba kuti mulye kanthu kuti mupulumuke. Paliye na yumo kumo mwa mwewo watiazetaye cukanga sisi imo.” 35Pecilaŵila ivi, Paulo etola mkate, notembezya Mulungu pa menso pa wonse. Nipo pecisuna mkate wala etatika kulya. 36Pamene apo wonse ŵala etangʼa mtima, nawo soti etatika kulya. 37Tonse pamo tenzokumana Makumi kumi aŵili na makumi asanu na aŵili na mphuzyo zisanu na imo (276) mu ciwato mwala. 38Wonse ŵala pecilya nokuta, epepusha wato potaya tiligu mu cimmana.

Ciwato cucenekeka

39Pekwecica, ŵanthu aliyoziŵe msenga wala, koma eyingowona mu mbali mwa cimmana ca misece. Lomba elingilila kuti keno ni cotwesha, akawamyile ciwato kwamene uku. 40Tetyo, etaya anangula noŵasiya mu cimmana. Nsita iyo emangulula nzinzi zomangila nkhafi zoyondololela, nokweza thanga ya ku nthangu, kuti mphepo ikankhe wato nipo elungamisha ku silya. 41Koma ciwato cala cikasamila pa misece wofisika na manzi, nipo ipanama. Citwa ca ku nthangu kwa ciwato cijima kotetyo kuti iliyotweshe kuyenda soti. Nipo citwa ca ku vuli cala cicenekeka na mphamvu ya mafunde.

42Asilikali ŵala elingilila kupaya akayidi, kuyopa kuti ayakine mwa ŵeve anganyaye kufwika ku silya nowutuka. 43Koma citangulila wa asilikali wala epangwa kupulumusha Paulo, motetyo eŵalesha. Elamula kuti wonse anganyaye, azipoze mu manzi, anyaye kuti akafwike ku silya. 44Ŵala wosala eŵalamula kuti akate mapulanga keno viyakine va mu ciwato cocenekeka cala. Motetyo, wonse epulumuka nofwika ku silya.

Currently Selected:

Macitilo 27: GMN

Highlight

Compare

Copy