Aro Malizu Wotatikila
Malizu Wotatikila
Kalata ya Paulo kwa Aroma, yelembewa kuti iwamye va ulwendo wake wakuyoyendela mpingo wa ku Roma. Lingo yake yenze kuseŵenza pakati pa Akristu ŵa ku Roma kwa kansita katontho na kuti, na mayavyo ŵawo, yeve akapitilizye kuya ku Sipeni. Elemba kuti akonkholole kumvwishisha kwake pa cicetekelo ca Cikristu na cacucita pa kuwamya myoyo ya Akristu. Buku iyi ili na vinyinji vonse vufwanika mu vakulaŵila yeve.
Pecisilizya kupa moni ŵanthu ŵa mu kacisi ya ku Roma noŵawuzya va malombelo ŵake pa ŵeve, Paulo elaŵila ca pa mutu ca kalata kuti, “Malizu Aweme aŵa owonesha cilungamo cakutipa Mulungu. Ici cilungamo cuwela kufuma kotatikila mpaka kosilizyila na cicetekelo” (1:17).
Paulo oyikililako ca pa mutu cake kuti, ŵanthu wonse, Ayuda na asali Ayuda, opangwika kuyikiwa pa cilungamo na Mulungu, pakuti wonse olingana nipo ali pansi pa ulamulilo wa ucimo. Ŵanthu akuŵa wolungama mwa Mulungu kupitila mu cicetekelo mwa Yesu Kristu. Cokonkhapo Paulo olaŵila va moyo wa lomba mwa Kristu kuti ufuma mu ukwawo wa lomba na Mulungu. Wocetekela ali na mtendele na Mulungu na kuti omangululiwa na Mzimu wa Mulungu kufuma ku mphamvu za ucimo na imfwa. Mu mutu 5 kufwika ku 8 Paulo olaŵizyana soti lingo ya Matetulo ŵa Mulungu na mphamvu za Mzimu mu moyo wa wocetekela. Nthumi zukangana na konsho ya Ayuda na asali Ayuda mwakukwanila mu lingililo ya Mulungu pa ŵanthu wonse. Omangilizya kuti kukana Yesu kwa Ayuda ni citwa ca lingo ya Mulungu kuti alete ŵanthu pafupi na cisomo ca Mulungu mwa Yesu Kristu, nipo wocetekela kuti Ayuda akokanalini Yesu nsita zonse. Kosililila, Paulo olemba mwaupangwika kunkhalila umoyo wa Cikristu, ngako–ngako va njila ya cinthemwa mu ukwawo pa ŵanthu ayakine. Otola va pa mutu vamene ivo ngani voseŵenzela Mulungu, nchito ya Akristu kulaŵila ku munthu umo na muyake, na makonsho ŵa kulisusha. Osilizya kalata na malizu ŵake na malizu ŵa mcinzi kwa Mulungu.
1. Malizu wotatikila na ca pa mutu 1:1-7
2. Vakupangwa munthu aliyense pa cipulumusho 1:8—3:20
3. Njila ya Mulungu ya cipulumusho 3:21—4:25
4. Moyo wa lomba mwa Kristu 5:1—8:39
5. Isilayeli mu malingililo ŵa Mulungu 9:1—11:36
6. Vocita va Mkristu 12:1—15:13
7. Kumangilizya na moni wake 15:14—16:27
Currently Selected:
Aro Malizu Wotatikila: GMN
Highlight
Copy
Compare
Share
Want to have your highlights saved across all your devices? Sign up or sign in
Nsenga New Testament © The Bible Society of Zambia, 2015.