Macitilo 26

Paulo olicingilizya pa menso pa Mfumu Agilipa

1Agilipa ewuzya Paulo kuti, “Tukuzomezya kuti ulaŵile malizu ŵako.”

Tetyo, Paulo etambulula kwanja yake notatika kulaŵila nkhani yake. Elaŵila kuti, 2“Mwewo Mfumu Agilipa, newo nulingilila kuti nili na shuko kuti ni pa menso panu panuyasukila lelo vonse vakunilaŵilila Ayuda aŵa. 3Ngako–ngako cikomo mwewo muziŵa luweme myambo yonse ya Ciyuda, nipo mikangano yawo yonse, nukusengani kuti munimvwishe molezya mtima.

4“Ayuda wonse oziŵa va moyo wangu kutatikila penenze mwana. Woziŵa mweninkhalila kutatikila pakati pa ŵanthu ŵa mtundu wangu, na ku Yelusalemu. 5Ŵeve eniziŵa kutatikila kale, nipo keno opangwa, angatweshe kunicitila umboni kuti moyo wangu wonse naŵa Mfalisi, yumo wa cipani cala cusamala cilombelo casu kopula. 6Nipo lomba keno onipa mlandu, ni cikomo cakuti nulindila vecilayizya makolo ŵasu Mulungu. 7Mikoka yonse kumi na iŵili ya mtundu wasu, polombela Mulungu mzuŵa na usiku mosalefuka, yulindila kuzopokela vecilayizya yeve. Mwakuti ni cikomo colindilila ici, ca kunilaŵila Ayuda, amfumu muli apa. 8Ni cikomo canji, mwa mwewo Ayuda, muyesa kuti ni kosawamila kucetekela kuti Mulungu angawukishe ŵanthu kwa akufwa?

9“Newo nenzolingilila kuti nenzowamila kucita vinthu vinyinji popangwa kusilizya mbili ya Yesu wa ku Nazaleti. 10Nipo nivicita cendi ku Yelusalemu. Akulu ŵa Ansembe pecinipa ulamulilo, newo nenzoŵavalila mu jele ŵanthu anyinji ŵa Mulungu. Ŵeve penzopayiwa, newo nenzozomelezya. 11Kanyinji–kanyinji nenzoŵapa cilango mu makacisi wonse, noyesa kuŵakakamizya kuti atafulile Yesu wala. Nenzoŵakalipila koyofya, kotetyo kuti nenzoŵanzunza cukanga ku mizinda ya ku vyalo va kunja.”

Paulo okonkhololela Agilipa mweciyalukila mtima

12“Pa ulwendo uyakine woteti, nukuya ku Damasiko na ulamulilo na mphamvu zonipa Akulu ŵa Ansembe. 13Pa njila, nsita ya mzuŵa zuŵa ili pa mutu, niwona kuŵala kufumila Kululu. Kuŵala kwala kwenze kopula kuŵala kwa zuŵa, nipo kwitizunguluka tonse, newo na ayangu ŵa ulwendo. 14Tonse tipona pansi, nipo newo nicimvwa malizu oniwuzya mu Ciyuda kuti, ‘Saulo, Saulo, unizingwishila vinji? Uyingoziceneka weka pokana canupangwa, uli ngani ngʼombe yunyatiwa pokana cakupangwa mwine.’

15“Tetyo, nikonsha kuti, ‘Nimwe ŵani Asikulu?’

“Asikulu ŵala elaŵila kuti, ‘Newo nine Yesu, wawusawusha. 16Koma uka, panama. Pakuti nakuwonekela kuti nikuyike uŵe mtumiki wangu na mboni yangu. Nupangwa kuti uŵe mboni ya mwawaniwonela lelo, nipo ya vatinizekuwoneshe ku nthangu. 17Nizenikupokeshe ku ŵanthu ŵa mtundu wako, nipo soti ku ŵanthu ŵa mitundu iyakine kwanukutuma. 18Nukutuma kuti ŵanthu aŵa uŵavule menso, kuti ayaluke kufuma ku mfinzi ya macimo noloŵa mu kuŵala, nipo kufuma mu mphamvu ya Satana nokonkha Mulungu. Nupangwa kuti acetekele newo, kuti macimo ŵawo alekelelewe, nipo nawo apokele mashukisho pamo na ŵanthu ŵecisalula Mulungu kuti aŵe ŵake–ŵake.’”

Paulo okonkholola va nchito yake

19“Ni cikomo cake, niliyokane kumvwila veciniwonesha Mulungu mu mensomphenya mwala. 20Koma niŵilizya, potatika ku ŵanthu ŵa ku Damasiko na ŵa ku Yelusalemu, nipo kuwama kwake ku calo conse ca Yudeya, nipo soti ku ŵanthu ŵa kunja ŵa mitundu iyakine. Niŵilizya kuti ayaluke mtima, kuyalukila kwa Mulungu, nocita nchito yosimikizya kuti ayaluka cendi mtima. 21Cikomo ca ivi, Ayuda enikata mu Ngʼanda ya Mulungu nopangwa kunipaya.

22“Koma Mulungu waŵa oniyavya kufwika lelo. Motetyo, napanama pano kuti nicitile umboni pa menso pa ŵanthu wonse, kwa akulu na atontho kumo. Vanuŵawuzya ni viyakinelini yayi, koma ni vala vecilaŵila aneneli na Mose kuti vizevicitike. 23Pala ŵeve elaŵila kuti Mpulumushi Wolayizyiwa wala azeamvwe voŵaŵa, nipo pakuti yeve azeaŵe wotatika kuwuka kwa akufwa, azeawoneshe Ayuda na ŵala asali Ayuda va kuŵala.”

Paulo oyasuka Fesito na Agilipa

24Paulo penzozicingilizya vomulaŵilila vala, Fesito elaŵila moŵilikizya kuti, “Nikusiluka uku, wewo Paulo! Kusambizya kwako kukusilushe.”

25Koma Paulo elaŵila kuti, “Pepani, Fesito wocinzikiwa, ninelini silu yayi. Vanulaŵila ni vyendi na va nzelu. 26Mfumu Agilipa oziŵa vonse ivi, nipo ningalaŵile pa menso pawo momasuka. Nucetekela kuti paliye kanthu cukanga kamo pa ivi vasaziŵa ŵeve. Pakuti viliyocitike mofisika yayi. 27Mwewo amfumu, kansi mucetekela malizu ŵa aneneli? Nuziŵa kuti muŵacetekela.”

28Tetyo, Agilipa ewuzya Paulo kuti, “Ulingilila kuti unganiyalushe Mkristu pa kansita katontho teti?”

29Paulo elaŵila kuti, “Keno ni pa kansita katontho, keno ni pa kansita katali, nulomba Mulungu akazomezya kuti osati mwewo mweka, koma soti ŵanthu wonse akumvwa malizu ŵangu lelo, aŵe ngani mwanilili newo – kupatula maunyolo ŵeka aŵa.”

30Tetyo, Mfumu Agilipa, bwanamkubwa Fesito, Belenise, na wonse enze nawo epanama. 31Pecifumapo ewuzyana kuti, “Munthu uyu paliye cakucita ciliconse cuwamila kumupaya keno kumuyika mu jele.”

32Tetyo, Agilipa ewuzya Fesito kuti, “Sembe tamumangulula uyu munthu, kuti aliyosenge kuti mlandu wake uyu ukapinguliwe na mfumu ya ku Roma.”

Currently Selected:

Macitilo 26: GMN

Highlight

Compare

Copy