Macitilo 23

1Paulo eŵalolesha ŵa mu Kaupo Kakulu kala nolaŵila kuti, “Mwenekwasu, newo moyo wangu wonse mpaka lelo naŵa na mtima utuŵa pa menso pa Mulungu.”

2Pamene apo Ananiya, Mkulu wa Ansembe wonse, elamula ŵala epanama pafupi na Paulo kuti, “Munyateni pa kamwa!”

3Pamene apo Paulo emuwuzya kuti, “Mulungu anyate wewo, uliye vyendi! Wewo wankhala apo kuti unipingule pokonkha Matetulo ŵa Mose, ngani cikomo canji uŵafwaya Matetulo aŵa polamula kuti aninyate?”

4Pamene apo ŵala epanama pafupi na Paulo emuwuzya kuti, “Ni cikomo canji utafulila Mkulu wa Ansembe ŵa Mulungu?”

5 Paulo elaŵila kuti, “Pepani mwenekwasu, nenzoziŵalini kuti ni Mkulu wa Ansembe. Pala Malizu ŵa Mulungu olaŵila kuti, ‘Usamulaŵilile viyipa wopingula ŵanthu ŵako.’”

6Paulo peciwona kuti ayakine mwa ŵeve na ŵa mu cipani ca Asaduki, ayakine ŵa mu cipani ca Afalisi, elaŵila malizu moŵilikizya mu Kaupo mwala kuti, “Mwenekwasu, newo nine Mfalisi, mwana wa Mfalisi. Newo nupinguliwa cikomo ca cilolelo kuti ŵanthu azeawuke kwa akufwa.” 7Pecilaŵila ivi, Afalisi na Asaduki ŵala etatika kukangana, nipo msonkhano wipatukana. (8Pala Asaduki olaŵila kuti ŵanthu azeawukelini kwa akufwa, nipo soti kuti kuliye angelo keno mizimu. Koma Afalisi wocetekela vonse ivi.)

9Ŵanthu ŵala etatika kuŵilikizya ngako. Lomba Asambizyi ayakine ŵa Matetulo, ŵa mu cipani ca Afalisi, epanama nolaŵila kuti, “Tufwanalini coyifya mwa munthu uyu yayi. Payakine kungaŵe kuti mzimu keno mngelo walaŵila naye!”

10Ŵanthu ŵala efwika pokangana koyofya, tetyo mkulu wa asilikali wala eyopa kuti angamutende pakati Paulo. Tetyo, elamula asilikali kuti, “Nkhoyani mukamupokeshe kwa ŵanthu aŵa, mukamuloŵeshe mu linga ya asilikali.”

11Nsiku iyo, usiku, Asikulu ecizopanama pafupi na Paulo nomuwuzya kuti, “Tangʼa mtima. Ngani mwawanicitila umboni kuno ku Yelusalemu, uwamila ukanicitile soti umboni ku Roma.”

Ayuda omucitila msikila Paulo

12Pekwecica, Ayuda ayakine enkhala pamo, nipo epangana motangʼa kuti, “Sewo tilyelini keno kumwa kalikonse mpaka timupaye Paulo.” 13Ŵanthu epangana va msikila uyu enzepo opitilila makumi anayi (40). 14Ŵeve eluta kwa Akulu ŵa Ansembe na kwa Akulu ŵa Ayuda noŵawuzya kuti, “Sewo talapila motangʼa kuti tilaŵelini kanthu mpaka timupaye Paulo uyu. 15Lomba mwewo, pamo na Kaupo Kakulu, mutumizye malizu kwa mkulu wa asilikali kuti awele naye Paulo kwa mwewo, ngani mupangwa zomukonsheshesha luweme va mlandu wake. Sewo nise wokonzeka kumupaya pakaliyofwika kuno.”

16Koma mwana wa mlongosi wake wa Paulo, pecimvwa va msikila uyu, eciyoloŵa mu linga ya asilikali yala nomuwuzya Paulo.

17Pamene apo Paulo eyita yumo mwa acitangulila ŵa asilikali nomuwuzya kuti, “Nkhoyani na mulumbwana uyu kwa mkulu ŵa asilikali, olaŵila kuti ali namwe na malizu.”

18Yeve emutola mulumbwana wala nakuya naye kwa mkulu wa asilikali, nomuwuzya kuti, “Mkaidi wala Paulo, eniyita nonisenga kuti niwele na mulumbwana uyu kwa mwewo, olaŵila kuti ali namwe na malizu.”

19Mkulu wa asilikali wala emukata pa kwanja mulumbwana wala, nakuya naye pa seli, lomba peenze pa ŵeka emukonsha kuti, “Kansi ni malizu wotyani ŵaupangwa kuniwuzya?”

20Yeve elaŵila kuti, “Ayuda ayakine epangana kuzomusengani kuti mukalute na Paulo ku Kaupo Kakulu mailo, ngani kuti ŵeve opangwa kukonsheshesha luweme va mlandu wake. 21Koma pepani, mwewo musaŵamvwile, cikomo pali ŵanthu opitilila makumi anayi amufisamila Paulo pa njila. Ŵeve elapila kuti alyelini keno kumwa kalikonse mpaka amupaye. Lomba apa ni wokonzeka, nipo oyingolindila kuti muŵazomelezye.”

22Tetyo, mkulu wa asilikali wala ewuzya mulumbwana wala kuti, “Luweme, wewo nkhoya, koma usawululile muyakine aliyense kuti wanikonkololela ivi.”

Otumizya Paulo kwa Felikisi

23Mkulu wa asilikali wala eyita acitangulila aŵili ŵa asilikali noŵawuzya kuti, “Wuzyani asilikali makumi kumi aŵili (200) aŵe okonzeka kutatikila nsita ya 9 koloko usiku#23:23 9 koloko usiku keno 21:00 hrs uno, kuya ku Kayisaliya pamo na asilikali makumi asanu na aŵili (70) okwela pa haci nipo makumi kumi aŵili ŵa mikondo. 24Mumuwamyile Paulo mahaci kuti akwelepo, nipo mukamufwishe luweme kwa Felikisi, bwanamkubwa.” 25Lomba elemba kalata iyi:

26Newo Kilawudiya Lisiyasi,

Nutwala moni kwanu ocinzikiwa, Afelikisi, bwanamkubwa.

27Munthu uyo Ayuda emukata, nipo enze pafupi kumupaya. Penicimvwa kuti yeve ni nzika ya Ciroma, niluta na asilikali kuyomulondesha. 28Nenzopangwa kuziŵa cikomo cenzomulaŵilila, tetyo niluta naye ku Kaupo Kakulu kwawo. 29Nifwana kuti enzomulaŵilila cikomo ca nkhani yokumya Matetulo ŵawo, koma osati wopayiwa keno womuyika mu jele. 30Lomba pakuti namvwa kuti pali msikila wakupangana pa munthu uyu, namutumizya kwa mwewo mmangu. Nawuzya omulaŵilila kuti azealaŵile malizu ŵawo kwa mwewo.

31Pamene apo asilikali ŵala etola Paulo ngani mweciŵalamulila, eluta naye ku Antipatili usiku. 32Mmawa mwake ŵeve ewelela ku linga ya asilikali, nosiya alukwele pa haci ŵala kuti apitilile na Paulo. 33Ŵeve ŵala pecifwika ku Kayisaliya, etwala kalata yala kwa bwanamkubwa, notwala soti Paulo mmanja mwake. 34Bwanamkubwa wala peciŵelenga kalata yala, ekonsha Paulo va ku citwa kwenzofuma. Pecimvwa kuti ofumila ku Siliya, 35emuwuzya kuti, “Nizamvwe mlandu wako akawela okulaŵilila viyipa ŵala.” Pecicita tetyo, elamula kuti awomusunga ku ngʼanda ya mfumu Helode.

Currently Selected:

Macitilo 23: GMN

Highlight

Compare

Copy