Macitilo 24

Ayuda otanikila Paulo kwa Felikisi

1Pepepita masiku asanu, Ananiya, Mkulu wa Ansembe wonse, ewela pamo na akulu–akulu ayakine ŵa Ayuda, na kaswili muyakine wolaŵilila ŵanthu pa milandu, zina yake Telitulilo. Ŵeve efwika pa menso pa bwanamkubwa wala, notatika kulaŵila va Paulo. 2Lomba Paulo wala pecimuyita, Telitulilo wala etatikapo vomulaŵilila vala. Elaŵila kuti, “Mwewo Felikisi wocinzikiwa, sewo tunkhala pa mtendele ngawo–ngawo cikomo ca mwewo, nipo vinthu vinyinji vankhala vokonzeka mu calo casu cikomo ca ucitangulila wanu wa nzelu. 3Vonse ivi, tuvipokela mwa mcinzi ngako paliponse mwa njila iliyonse. 4Pepani, nupangwalini kukutayilani nsita, koma nusenga kuti muniwamile mtima, muyingomvwako tyala malizu wasu aŵa mwa pafupi.

5“Niye kuti munthu uyu sewo tamufwana kuti ni wovutisha ngako. Waŵa oleta vyongo pakati pa Ayuda pa calo conse ca pansi, nipo soti ni citangulila wa cipani ca Anazaleti. 6Eyesa soti cukanga kuyifyisha ngʼanda ya Mulungu wasu. Niye petimukata. [Tipangwa kumupingula pokonkha Matetulo ŵasu. 7Koma Lisiyasi, mkulu wa asilikali, ecizomusomphola ku manja kwasu mwa nkhondo, 8nopingula kuti womulaŵilila azeawonekele kwanu.] Mukamukonsha uyu, muwamila kuziŵa mweka vonse vatumulaŵilila.”

9Ayuda nawo soti ezomelezya, nolaŵilisha kuti vonse ivo ni vyendi.

Paulo olicingilizya pa menso pa Felikisi

10Bwanamkubwa wala, ecewula Paulo kuti alaŵile, nipo Paulo elaŵila kuti, “Nuziŵa kuti mwewo mwaŵamupingula mtundu uyu vyaka vinyinji, ni cikomo cake natemwa kuti niyasuke pa menso panu vakunilaŵilila. 11Mwewo muwamila kufwana umboni wake, penzepaliyopite masiku opitilila kumi na aŵili kufuma paniciyolombela ku Yelusalemu, 12Ayuda aliyonifwanepo nukangana na munthu aliyense mu Ngʼanda ya Mulungu, keno kuwusha vyongo pakati pa ŵanthu mu makacisi, keno paliponse mu mzinda mwala. 13Ŵeve angakusimikizyilenilini vakunilaŵilila. 14Koma ici ceka, nuzomela pa menso panu, kuti nulombela Mulungu wa makolo wasu pokonkha njila ŵeve yenzokuti ni umba ya pa mbali. Nucetekela vonse volembewa mu Matetulo ŵa Mose nipo soti mu mabuku ŵa aneneli. 15Powona kuti nucetekela Mulungu, nipo nawo wocetekela, kuti ŵanthu wonse – wolungama na wosalungama – akawuke kwa akufwa. 16Ni cikomo cake, nane soti nuyesesha nsita zonse kuŵa na mtima wolungama pa menso pa Mulungu, na pa menso pa ŵanthu.

17“Lomba peninkhala kuyakine vyaka vitontho, nicizotwala ndalama ku ŵanthu ŵa mtundu wangu, nipo soti nicizotwala nsembe. 18Penenzocita ivi, ŵeve enifwana mu Ngʼanda ya Mulungu nucita mwambo wolituŵisha. Penzeve winji wa ŵanthu keno vyongo yayi. 19Nipo alipo pano Ayuda ayakine ŵa ku Asiya kuti anisimikizyile pa menso panu keno ali nane na kanthu. 20Keno ŵeve ali pano aŵa alaŵile keno enifwana coyifya penenze mu Kaupo Kakulu kwawo. 21Koma coyifya cangu cingaŵe ici cakuti, penipanama pa menso pawo, neŵilikizya kuti, ‘Munipa mlandu newo lelo cikomo nucetekela kuti ŵanthu akufwa azeawuke.’”

22Felikisi enzoziŵa luweme va Njila ya Asikulu, tetyo evala nsaka yala na malizu olaŵila kuti, “Nizenipingule mlandu wako akaza Lisiyasi, mkulu wa asilikali.” 23Lomba elamulila citangulila wa umba ya asilikali kuti awomulonda, koma awomupako mtendele, osalesha wotemweka ŵake kumusamala.

Paulo olaŵila na Felikisi na Dulusila

24Pepepita masiku atontho Felikisi ewela na mkazi wake Dulusila muyuda. Eyita Paulo, notatika kumvwilila venzolaŵila vocetekela Kristu Yesu. 25Koma Paulo pecilaŵila va cilungamo, va kulilesha kulya, na vakuti Mulungu azeapingule ŵanthu, Felikisi ecita wowa nomuwuzya kuti, “Pakali pano nkhoya wakuya, nikafwana nsita, nizenikuyite soti.” 26Koma enzolingilila kuti Paulo azeamupe ndalama, ni cikomo cake enzomuyita mowelezya–welezya notandala naye.

27Pepepita vyaka viŵili, Pokiyo Fesito eloŵa mu malo mwa Felikisi. Lomba Felikisi wala popangwa kuwamizya Ayuda, emusiya mu jele Paulo wala.

Currently Selected:

Macitilo 24: GMN

Highlight

Compare

Copy