Macitilo 22
22
1“Mwewo mwenekwasu na mwewo akulu–akulu, nimvwileni niyasuke lomba vakunilaŵilila.”
2Ŵeve pecimvwa olaŵila nawo mu Ciyuda, eciŵa celele ngako.
Tetyo, Paulo elaŵila kuti, 3“Newo nine Muyuda wovyalikila ku Taliso, mzinda wa ku Siliya, koma nilelewa mu mzinda wa Yelusalemu mwamene muno. Gamaliyele niye enze msambizyi wangu, enisambizya ngako kusunga Matetulo ŵa makolo ŵasu. Nipo nenze wotangʼa ngako pa va Mulungu, ngani mwamucitila nsiku zino. 4Nenzosawusha ŵanthu okonkha Njila ya lomba iyi, mpaka noŵapaya. Nenzokata ŵanthu aŵa analume na anakazi kumo, noŵamangisha. 5Mkulu wa Ansembe wonse, na ŵa mu Kaupo Kakulu ka Ayuda anganizomelezye. Ŵeve awo enipa makalata akuya nawo ku enekwasu ŵa Ciyuda ku Damasiko. Lomba niluta kwamene uko kuti nikaŵakate ŵanthu aŵa, nakuza nawo ku Yelusalemu ali womangiwa, kuti azealangiwe.”
Paulo okonkholola mweciyalukila mtima
6“Penenze pa ulwendo uyu nili pafupi na Damasiko, nsita yenze ngani 12 koloko mzuŵa, movundumukizya kuŵala kukulu kufumila kululu kwenizunguluka. 7Nipona pansi, nipo nicimvwa malizu olaŵila kuti, ‘Saulo, Saulo, unisawushila vinji?’
8“Newo nikonsha kuti, ‘Nimwe ŵani Asikulu?’
“Ŵeve elaŵila kuti, ‘Newo nine Yesu wa ku Nazaleti, wausawusha wewo.’ 9Ayangu ŵa pa ulwendo ekuwona kuŵala kwala, koma malizu ŵenzolaŵila na newo aliyoŵamvwe.
10“Tetyo, newo nikonsha kuti, ‘Nicite vinji Asikulu?’
“Nipo Asikulu elaŵila kuti, ‘Uka, nkhoya ku Damasiko, kwamene uko akakuwuzye vonse vawawamya Mulungu kuti ucite.’ 11Niliyolole soti cikomo ca kuŵala kukulu kwala, ni cikomo cake ayangu ŵala ecitonikata pa kwanja nonitangulila mpaka kuyoloŵa mu Damasiko.
12“Kwamene kwala kwenze munthu muyakine, zina yake Ananiya. Enze munthu woyopa Mulungu na wosamala Matetulo wasu, nipo Ayuda wonse ŵa kwamene kwala enzomutembezya. 13Yeve uyo efwika nakuzopanama pafupi na newo, noniwuzya kuti, ‘Mkwasu Saulo, tatika soti kuwona.’ Nsita yamene iyo nitatika cendi kuwona nipo yeve nimuwona.
14“Lomba eniwuzya kuti, ‘Mulungu wa makolo ŵasu ekusalula kuti uziŵe vakupangwa yeve, uwone wolungama ŵala, nipo umvwe malizu ŵake olaŵila nawe. 15Pakuti uzeumcitile umboni ku ŵanthu wonse pa vawawona novimvwa. 16Nga lomba ucelwela vinji? Yima, utembezye zina yake mwa mcinzi, ubatiziwe nosambizyiwa kuti macimo ŵako asukiwe.’”
Asikulu onituma ku ŵanthu ŵa mitundu iyakine
17“Lomba niwelela ku Yelusalemu, nipo penenzolomba mu Ngʼanda ya Mulungu, nicita ngani nakomoka. 18Niwona Asikulu oniwuzya kuti, ‘Yendesha, fuma mmangu mu Yelusalemu muno, cikomo ŵanthu aŵa azeazomelelini umboni wako olaŵila va newo.’
19“Newo nelaŵila kuti, ‘Ni vyendi Asikulu, cikomo ŵeve woziŵa kuti newo nenzokuya ku ngʼanda iliyonse ya malombelo kuyoŵakata noŵatwala mu jele, noŵakwapula wonse wocetekela mwewo. 20Penzopaya Stefano, mboni yanu, nane soti nenzepo. Nenzozomelezyana nawo, nipo nenzosunga ni newo vovwala va wala enzomupaya.’
21“Pamene apo Asikulu eniwuzya kuti, ‘Yima, cikomo newo nizekutume kutali ku ŵanthu ŵa mitundu iyakine.’”
Mkulu wa asilikali owuzyiwa kuti Paulo ni nzika ya Ciroma
22Mpaka pa malizu aŵa, ŵanthu ŵala enzomvwisha luweme malizu ŵa Paulo. Koma pecizotomola malizu osilizya ŵala, ŵeve etatika kuŵilikizya kuti, “Munthu woteti owamila kumupaya. Owamilalini soti kuŵa moyo.”
23Ŵeve enzoŵilikizya nozunguzya malaya ŵawo, nowazya lukungu kululu. 24Nsita yamene iyo mkulu wa asilikali wala elamula kuti aloŵe naye Paulo mu linga ya asilikali yala. Eŵawuzya kuti amukwapule, kuti yeve wala awulule cikomo cenzomuŵilikizyila tetyo ŵanthu ŵala. 25Pamene apo epanamila citangulila wa umba ya asilikali. Lomba asilikali ŵake pecimanga Paulo kuti amkwapule, Paulo ŵala ekonsha citangulila wala kuti, “Kansi matetulo ŵanu ozomezya kukwapula nzika za Ciroma mukaliyenozipa mlandu?”
26Citangulila pecimvwa ivi, eluta kwa mkulu wa asilikali wala nomukonsha kuti, “Kansi mwewo mukuti mucite tyani? Munthu wala ni nzika ya Ciroma.”
27Pamene apo mkulu wala ecizokonsha Paulo kuti, “Kansi wewo niwe nzika ya Ciroma?”
Yeve eyasuka kuti, “Eee.”
28Lomba mkulu wala emuwuzya kuti, “Newo nicitosita ufulu wangu uyu na ndalama zinyinji.”
Paulo elaŵila kuti, “Koma newo ufulu wangu uyu nicitovyalika nawo.”
29Pamene apo asilikali enzomukonsha makonsho, emuleka. Mkulu wala ecita wowa peciziŵa kuti emanga munthu enze nzika ya Ciroma.
Paulo ku Kaupo Kakulu ka Ayuda
30Mkulu wa asilikali wala epangwa kuziŵa cikomo ngaco–ngaco cenzopela Paulo mlandu Ayuda. Tetyo, mmawa mwake, emumangulula nolamula kuti Akulu ŵa Ansembe na wonse ŵa ku Kaupo Kakulu ka Ayuda awungane. Nipo ewela na Paulo nomupanamika pakati pawo.
Currently Selected:
Macitilo 22: GMN
Highlight
Share
Compare
Copy
Want to have your highlights saved across all your devices? Sign up or sign in
Nsenga New Testament © The Bible Society of Zambia, 2015.
