Macitilo 21

Paulo akuya ku Yelusalemu

1Petilayilana nawo, tifuma kwala mu wato, nipo tiyenda mosazyongoloka kuyofwika ku Kosi. Mmawa mwake tifwika ku Lode, nipo kufuma uko tifwika ku Patala. 2Kwamene uko tifwana ciwato cakuya ku Fenisiya. Tetyo tiloŵamo noyima. 3Tiwona cilumba ca Kiplo, koma ticisiya ku kwanja ya manzyele nakuya ku Siliya. Ticiyofwika ku Tilo, pakuti ciwato cenzowamila kuselusha katundu uko. 4Tifwana asambili ŵa kwala, nipo ticiŵa nawo masiku asanu na aŵili. Kupitila mwa Mzimu Mtuŵa ŵeve ewuzya Paulo kuti osati alute ku Yelusalemu. 5Koma masiku ŵala pecisila, tifumako nakuya pa ulwendo wasu. Wonse ŵala, pamo na anakazi na ŵana ŵawo, etipelekezya mpaka kunja kwa mzinda. Tifukama mu mbali mwa cimmana nolomba. 6Nipo petilayilana, sewo ticiyoloŵa mu wato, ŵeve ewelela kwawo.

7Tipitilila ulwendo wasu wofuma ku Tilo mpaka tifwika ku Pitolemaisi. Kwamene uko titandala patontho na enekwasu, nokuŵa nawo nsiku imo. 8Mmawa mwake tiyima nakuyofwika ku Kayisaliya. Tiluta ku ngʼanda ya muŵilizyi Filipo, yumo mwa atumiki ŵa mpingo asanu na aŵili ŵala, nipo tinkhala ku ngʼanda kwake. 9Yeve enze na ŵana anakazi anayi osalunguliwa, ŵamene enzoŵilizya Malizu ŵa Mulungu.

10Petenze kwala masiku atontho, kwiwela mneneli muyakine ofumila ku Yudeya, zina yake Agabu. 11Yeve peciwela kwa sewo, etola bande ya Paulo. Lomba ezimanga mendo na manja nolaŵila kuti, “Mzimu Mtuŵa olaŵila kuti, ‘Mwine wake wa bande iyi Ayuda azeamumange moteti ku Yelusalemu, nomutwala mu manja mwa akunja.’”

12Peticimvwa ivi, sewo na ŵanthu ŵa kwala tisenga Paulo kuti asalute ku Yelusalemu. 13Koma yeve elaŵila kuti, “Ni cikomo canji camulila nopangwa kunitayisha mtima? Nine wokonzeka kumangiwa, cukanga kuyofwila ku Yelusalemu cikomo ca zina ya Asikulu Yesu.”

14Pakuti citikanga kumunyengelela, tiyingomuleka nolaŵila kuti, “Vicitike vakupangwa Asikulu.” 15Pepepita masiku atontho, tikonzeka ulwendo wasu nipo tiluta ku Yelusalemu. 16Asambili ayakine ŵa ku Kayisaliya nawo ekonkhana nase. Eciyotifwisha ku ngʼanda kwa munthu muyakine, zina yake Mnasoni, kwamene kweciwamya kuti tikonkhala. Yeve enze ku Kiplo, nipo enze msambili wa kale.

Paulo otandalila Yakobo

17Petifwika ku Yelusalemu, enekwasu etipokela na cisangalalo. 18Mmawa mwake, Paulo etitola kuya kwa Yakobo. Akulu ŵa mpingo wonse enze kwamene uko. 19Petepana nawo moni, Paulo eŵakonkhololela mwa mndandanda vonse vecicita Mulungu pakati pa ŵanthu ŵa mitundu iyakine kupitila mu mtumiki wake.

20Ŵeve pecimvwa ivi, etembezya Mulungu. Nipo ewuzya Paulo kuti, “Wewo mkwasu uwona kuti pali Ayuda anyinji ngako ayaluka nocetekela. Wonse aŵa ni wocetekeleka ngako pokonkha Matetulo ŵa Mose. 21Ŵanthu oŵawuzya va mwewo kuti Ayuda wonse onkhala ku vyalo va cilwendo, mwewo muŵasambizya kuti alekane nawo Matetulo ŵala. Olaŵila soti kuti muŵasambizya asasilimule ŵana ŵawo keno kusamala myambo ya ciyuda. 22Kansi ticite vinji? Kumvwa azeamvwe cendi kuti mwafwika.

23“Mwewo, mucite vatitikuwuzyeni sewo. Tili na analume anayi pano elumbila kwa Mulungu. 24Muŵatole nipo mucite nawo mwambo wozituŵisha. Lomba muŵalipilile vatiatwale ku ngʼanda ya Mulungu kuti amete sisi yawo. Mukatetyo, ŵanthu wonse azeaziŵe kuti ni vyendilini veciŵawuzya ŵanthu va mwewo, koma kuti mwewo musamala cendi Matetulo ŵa Mose.

25“Koma kulaŵila va ŵanthu ŵa mitundu iyakine eyaluka wocetekela, tiŵalembela kalata yoŵawuzya vetizomelezyana: kuti osati awokulya vakulya vitwaliwa nsembe ku mafano, osati awokulya milopa keno nyama yocitoponyongola, nipo osati awocita ucende.”

26Paulo eŵatola ŵanthu anayi ŵala, nipo mmawa mwake ecita nawo mwambo wozituŵisha. Yeve eloŵa mu Ngʼanda ya Mulungu nakuyoziŵisha ansembe va nsiku yakuti aliyense mwa ŵeve azetwalile nsembe, akasila masiku wozitwalila ŵala.

Okata Paulo mu Ngʼanda ya Mulungu

27Pecisila masiku asanu na aŵili ŵala, Ayuda ofumila ku Asiya ewona Paulo mu Ngʼanda ya Mulungu. Ekalifya mitima ya ŵanthu wonse, nomukata. 28Lomba ŵeve eŵilikizya kuti, “Mwewo Aisilayeli, tiyavyeni! Ni uyu munthu, osambizya ŵanthu paliponse votafulila mtundu wasu, Matetulo ŵa Mose, nipo malo ŵano. Kuyikililapo waloŵesha soti ŵa kunja mu Ngʼanda ya Mulungu muno, noyifyisha malo ŵasu atuŵa.” (29Elaŵila ivi cikomo enzeewona Tlofimo wa ku Aifeso enze na Paulo mu mzinda mwala, niye ŵeve enzolingilila kuti Paulo niye waŵaloŵesha mu Ngʼanda ya Mulungu.)

30Lomba mu mzinda monse mwiloŵa msokonezo, nipo ŵanthu wonse ewutukila kwenze Paulo nomukata. Emudonsela kunja kwa Ngʼanda ya Mulungu, novala milyango nsita yamene iyo.

31Ŵanthu enzopangwa kupaya Paulo, mkulu wa umba yonse ya asilikali ŵa Ciroma epokela malizu olaŵila kuti mu mzinda wonse wa Yelusalemu muli vyongo. 32Pamene apo, yeve etola asilikali na acitangulila ŵa maumba ŵa asilikali, nowutukila ŵanthu ŵala. Ŵanthu ŵala peciwona mkulu wa Ciroma na asilikali ŵala, eleka kumunyata Paulo.

33Pamene apo, mkulu wa asilikali wala efwika nokata Paulo, elamula kuti amumange na maunyolo aŵili. Nipo emukonsha kuti, “Kansi uyu munthu ni ŵani? Wacita vinji kansi?” 34Koma pakati pa ŵanthu ŵala ayakine etatika kuŵilikizya viyakine, ayakine viyakine. Cikomo ca vyongo, mkulu wa asilikali wala aliyoziŵe kuti vyendi ngavo–ngavo ni votyani. Tetyo, elamula kuti amutole Paulo wala alute naye ku linga ya asilikali.

35Lomba pecifwika pa makwelelo ŵa ku linga kwala, asilikali ŵala ecitomutakula, cikomo cakuti ŵanthu ŵala ekalipa ngako. 36Wonse ŵala enzokonkha enzoŵilikizya kuti, “Mupayeni!”

Paulo olaŵila ku ŵanthu

37Peenze pafupi kuloŵa naye mu linga mwala, Paulo esenga mkulu wa asilikali wala kuti, “Kansi munganizomezye kuti nikuwuzyeni kanthu?”

Elaŵila soti kuti, “Kansi mulaŵila Cigiliki? 38Lomba niye kuti ni wewolini Muejipito wala ewusha vyongo masiku ŵa ku vuli, notangulila anyankapondo myanda inayi (4,000), nakuya nawo ku cipululu?”

39Paulo eyasuka kuti, “Newo nine Muyuda, nzika ya ku Taliso, mzinda woziŵika wa ku Siliya. Nukusengani lomba, munizomezye kuti nilaŵile nawo ŵanthu aŵa.”

40Emuzomezya, nipo Paulo epanama pokwelela pala, eyimya kwanja yake kuti ŵanthu ŵala aŵe celele. Wonse pecinkhala celele, Paulo etatika kulaŵila nawo mu Ciyuda. Elaŵila kuti:

Currently Selected:

Macitilo 21: GMN

Highlight

Compare

Copy