Macitilo 18

Paulo ku Kolinto

1Pa vuli pake Paulo efuma ku Atene nakuya ku Kolinto. 2Kwamene uko efwanako Muyuda, zina yake Akwila, wa ku Ponto. Yeve enzeeyingofwika kwa lombapano kufumila ku Italiya pamo na mkazi wake Pulisila, cikomo Kilawudiyo, mfumu ya ku Roma, elamulila kuti Ayuda wonse afumeko ku Roma. Paulo eciyowona 3nipo pakuti enze na nchito ngani ŵeve yosoka mahema, enkhala nawo noseŵenzela nawo pamo. 4Pa nsiku ya Sabata iliyonse yeve enzolaŵizyana na ŵanthu ku makacisi ŵa Ayuda, noyesesha kukopa Ayuda na Agiliki kumo.

5Sila na Timoteyo pecifwika kufumila ku Masedoniya, Paulo enze na nchito yoŵilizya nowuzya Ayuda mosimikizyila kuti Yesu niye enze Mpulumushi Wolayizyiwa wala. 6Koma pakuti Ayuda esushana naye nomucita vyongo, Paulo epatukana nawo nokunkhumula vovwala vake, noŵawuzya kuti, “Mwazipayisha na mtima wanu. Lomba ivo ni vanu, newo niliye cikomo. Kutatikila lomba nikuya ku ŵanthu ŵa kunja.”

7Motetyo, efuma uko nakuya ku ngʼanda ya munthu, zina yake Tito Yusto. Yeve enze munthu wolomba Mulungu, nipo ngʼanda yake yenze pafupi na kacisi wa Ayuda. 8Klispo, mkulu wa kacisi wala pamo na wonse ŵa pa banja yake ecetekela Asikulu. Nipo ŵanthu anyinji ŵa ku Kolinto ecimvwa malizu ŵa Paulo, emucetekela nobatiziwa.

9Nsiku iyakine usiku, Asikulu ewonekela kwa Paulo mu maloto nomuwuzya kuti, “Usayope, koma upitilizye kuŵilizya, osaŵa celele yayi, 10pakuti newo nili nawe pamo. Paliye munthu ŵatiakukumye kuti akucitile ciyipa, pakuti nili nawo ŵanthu anyinji mu mzinda muno.” 11Tetyo, Paulo enkhala uko caka cimo na myezi isanu na umo, oŵasambizya Malizu ŵa Mulungu.

Ayuda omutwala Paulo ku nsaka ya Galiyo

12Galiyo peenze bwanamkubwa wa ku Akayiya, Ayuda wonse pamo ewukila Paulo, nomutwala ku nsaka ya milandu. 13Ŵeve elaŵila kuti, “Munthu uyu onyengelela ŵanthu kuti awolomba Mulungu mwa njila zosushana na Matetulo ŵasu.”

14Koma Paulo penzopangwa kulaŵila, Galiyo ewuzya Ayuda kuti, “Kuti wenze mlandu wakuti munthu wayifyila tetulo, keno wakuti wayifyila muyake, sembe takumvwilani luweme mwewo Ayuda. 15Koma pakuti ni nkhani yokumya malizu, na mazina, nipo soti Matetulo wanu, muziwone mweka. Kuti nipingule ivi, newo nakana.” 16Pecitetyo eŵapitikisha ku nsaka kwala. 17Pamene apo wonse ŵala ekata Sositeni, mkulu wa kacisi ŵa Ayuda, nomunyatila mu nsaka mwamene umo. Koma Galiyo aliyoyikeko nzelu va ivi.

Paulo ofumako ku Kolinto

18Paulo eciŵa ku Kolinto masiku anyinji. Pa vuli pake elayilana na enekwawo, noloŵa mu wato kuya ku Siliya pamo na Pulisila na Akwila. Penzeakaliyoloŵa mu wato mwala, ku Kenkleya, Paulo emeta sisi yake cikomo enze elumbila kwa Mulungu.

19Ŵeve efwika ku Aifeso, nipo kwala Paulo esiyako Akwila na Pulisila. Yeve yeka eloŵa mu kacisi wa Ayuda nolaŵizyana na Ayuda. 20Ŵala pecilomba kuti aŵe nawo nsita itali, yeve aliyozomezye. 21Eŵapelekezya noŵawuzya kuti, “Mulungu akazomezya, nikawele soti.” Pecicita tetyo efuma ku Aifeso mu wato.

22Pecifwika ku Kayisaliya, eluta ku Yelusalemu kuyotandala patontho na mpingo. Kufuma uko eluta ku Antiyokeya. 23Pecinkhala uko kansita katontho, efumako nakuyotandalila calo ca Galatiya na Filijiya, okosesha asambili wonse.

Apolo oŵilizya ku Aifeso

24Penze Muyuda, zina yake Apolo, wa ku Alekisandiliya, ewela ku Aifeso. Enze munthu woziŵa kulaŵila na woziŵa Malembo ngako. 25Yeve esambizyiwa njila ya Asikulu, nipo na kapamphu kakulu, enzolaŵila nosambizya va Yesu mu mndandanda uweme. Koma mu vonse ivo, enzoziŵa va ubatizo wa Yohane weka. 26Lomba etatika kulaŵila motangʼa mtima mu kacisi wa Ayuda. Koma Pulisila na Akwila pecimumvwa, emutola nomukonkhololela njila ya Mulungu mokonkholoka ngako.

27Apolo penzopangwa kutawukila ku Akayiya, enekwawo emukosesha, nolembela asambili ŵa uko kalata kuti amupokele luweme. Tetyo, pecifwikako, eŵayavya ngako ŵala enzecetekela cikomo ca cisomo ca Mulungu. 28Yeve esusha Ayuda mwa mphamvu pa menso pa ŵanthu, nosimikizya na Malembo kuti Yesu niye cendi Mpulumushi Wolayizyiwa wala.

Currently Selected:

Macitilo 18: GMN

Highlight

Compare

Copy