Macitilo 17

Paulo na Sila ku Tesalonika

1Paulo na ayake ŵala, epitilila mizinda ya Amfipoli na Apoloniya nakuyofwika ku Atesalonika. Kwala kwenze kacisi wa Ayuda. 2Lomba Paulo eloŵa nawo ngani mwaciyoŵelezi, nipo elaŵila nawo va mu Malembo pa ma Sabata atatu. 3Eŵamangululila va mu Malembo mwala noŵasimikizyila kuti Mpulumushi Wolayizyiwa wala enzowamila kumvwa voŵaŵa nowuka kwa akufwa. Paulo elaŵila kuti, “Yesu wanukuŵilizyilani uyu, niye Mpulumushi wala.” 4Lomba ayakine mwa ŵeve ekopeka, nokonkha Paulo na Sila. Agiliki anyinji olomba Mulungu ecita soti tetyo, pamo na anakazi anyinji acitangulila.

5Koma Ayuda ayakine ecita ukwa, tetyo ewunganisha ŵanthu aliye nchito woyenda–yenda, notatikisha vyongo mu mzinda mwala. Ewutukila ku ngʼanda ya Yasoni, kuyosakila Paulo na Sila kuti aŵafumyile ku ŵanthu. 6Powona kuti aliyoŵafwane, etola Yasoni wala pamo na enekwawo ayakine noŵaguguzila kwa akulu ŵa mu mzinda mwala. Lomba eŵilikizya kuti, “Aŵa ŵanthu opumvya ŵanthu calo conse, lomba afwika soti kuno kwasu, 7nipo Yasoni waŵapokela. Wonse ŵala ocita vosakatizyana na matetulo ŵa Mfumu ya ku Roma, pakulaŵila kuti kuli soti mfumu iyakine, zina yake Yesu.” 8Malizu ŵala ekalifya mitima ya ŵanthu na ya akulu ŵa mu mzinda, 9koma Yasoni na ayake ŵala pecilipila mlandu wala, akulu ŵala eŵamangulula.

Paulo na Sila ku Beleya

10Pekwefipa, enekwawo ŵala eŵingila Paulo na Sila ku Beleya. Pecifwika uko, eciyoloŵa mu kacisi wa Ayuda. 11Ayuda ŵa kwala enze na mitima yomasuka, kusiyana na ŵala ŵa ku Tesalonika. Ŵeve epokela Malizu ŵa Mulungu na mtima wopangwishisha ngako, nipo nsiku na nsiku enzosakila mu Malembo kuti awone keno ni vyendi venzolaŵila Paulo na Sila. 12Motetyo, mwa ŵeve anyinji ecetekela, nipo soti Agiliki anyinji, acitangulila anakazi na analume ecetekela.

13Koma Ayuda ŵa ku Tesalonika ŵala pecimvwa kuti Paulo eŵilizya Malizu ŵa Mulungu na ku Beleya kumo, efwika kwamene uko soti, notatika kukolezyela nokalifya mitima ya ŵanthu. 14Nsita yamene iyo enekwawo ŵala etuma ŵanthu ayakine kuti apelekezye Paulo ku cimmana, koma Sila na Timoteyo enkhalila kwamene uko. 15Ŵanthu epelekezya Paulo ŵala efwika naye mpaka ku Atene. Pa vuli pake ewelela ku Beleya, Paulo pecilamula kuyowuzya Sila na Timoteyo kuti amukonkhe mmangu.

Paulo ku Atene

16Paulo penzolindila Sila na Timoteyo ku Atene, mtima wake wivutika ngako powona kuti mzinda wonse wenze wozula na mafano. 17Tetyo, elaŵizyana na ŵa mu kacisi wa Ayuda na ŵanthu ayakine olomba Mulungu. Elaŵizyana soti na ŵanthu ŵenzokumana nawo pa msika nsiku na nsiku. 18Ŵanthu ŵa nzelu ayakine soti ŵa maumba ŵa Ayepikuleya na Astoiki ecizosushana naye.

Ayakine ekonsha kuti, “Kansi wolongolola uyu opangwa soti kulaŵila vinji?”

Ayakine elaŵila kuti, “Uyu onkhala ngani woŵilizya milungu ya kunja.” Enzolaŵila ivi cikomo yeve enzoŵilizya Malizu Aweme olaŵila va Yesu, na kuwuka kwa akufwa.

19Lomba eluta naye ku nsaka ya milandu yoyitiwa Aleopagi, nomuwuzya kuti, “Sewo tikuti mutiziŵisheko va lomba vamusambizya ivi. 20Pakuti viyakine vamutiwuzya ivi ni va kunja, nipo tupangwa kuziŵa kuti ni vinthu votyani.” 21Niye kuti nzika za ku Atene na alwendo onkhala uko, yenze ngani nchito nsita zonse kuyingomvwila va lomba novikonkhololela.

22Paulo epanama pakati pa nsaka yala ya Aelopagi nolaŵila kuti, “Mwe ŵanthu ŵa kwa Atene, pa vonse nuwona kuti nimwe ŵanthu olomba ngako. 23Pakuti penenzoyenda mu mzinda muno, nawona malo ŵanu wosiyana–siyana ŵa cilombelo, nifwana guwa iyakine ya nsembe pelembewa malizu olaŵila kuti, Kwa Mulungu Wosaziŵika. Lomba wamulombela wosaziŵika wala, niye wanukuŵilizyilani newo.

24“Mulungu elenga calo ca pansi nipo soti na vonse vilimo, niye Asikulu wa Kululu na calo ca pansi. Yeve onkhalalini mu ngʼanda ya malombelo yomangiwa na ŵanthu yayi. 25Ŵanthu angamtumikilelini na manja ŵawo, pakuti yeve osoŵalini kanthu. Pala yeve niye akupa ŵanthu wonse moyo, mphuye na viyakine vonse. 26Kufuma mwa kolo imo yeve elenga mitundu yonse ya ŵanthu, kuti iŵe mu calo conse ca pansi. Ewamyilatu nsita ya moyo wawo, nipo soti malile ŵa ponkhala pawo. 27Mulungu epangwa kuti ŵanthu amusakile–sakile, nipo kuti pomfufuza–fufuza, payakine angamufwane. Koma alilini kutali na aliyense mwa sewo. 28Pala

‘Mwa yeve sewo tukuŵa na moyo,

tuyenda nipo tunkhala tilipo.’

Ngani mwecilaŵilila opeka ndakatulo ŵanu ayakine olaŵila kuti,

‘Na sewo soti nise ofumila mwa yeve

ngani ŵana ŵake.’

29“Lomba pakuti nise ŵana ŵa Mulungu, tuwamilalini kulingilila kuti umulungu wake ulingana na fano ya golide keno ya siliva keno ya mwala, yopangiwa mwa luso na nzelu za munthu. 30Mulungu eŵalekelela ŵanthu pa nsita yeenze wosaziŵa, koma lomba oŵalamulila ŵanthu wonse paliponse kuti ayaluke mtima. 31Cikomo cakuti eyika nsiku yatiazepingule ŵanthu wonse ŵa pa calo ca pansi molungama, kupitila mwa Munthu wecisalula; esimikizyila ŵanthu wonse ivi powukisha Munthu wala kwa akufwa.”

32Ŵanthu ŵala pecimvwa va kuwuka kwa akufwa, ayakine eyingoseka, koma ayakine elaŵila kuti, “Tyani muzetiwuzye soti ivi nsiku iyakine.” 33Tetyo, Paulo eŵasiya.

34Koma ayakine emukonkha Paulo nocetekela. Pakati pawo penze Diyoniziyo, yumo mwa ŵa nsaka yoyitiwa Aelopagi, nipo soti mwanakazi muyakine, zina yake Damalisi, na ayakine soti.

Currently Selected:

Macitilo 17: GMN

Highlight

Compare

Copy