Macitilo 19

Paulo ku Aifeso

1Apolo penze ku Kolinto, Paulo eyendela vyalo va mkati, nofwika ku Aifeso. Kwamene uko efwanako asambili ayakine, 2nipo eŵakonsha kuti, “Kansi mwipokela Mzimu Mtuŵa pemwicetekela?”

Ŵeve elaŵila kuti, “Tiliyomvweko kuti kuli Mzimu Mtuŵa.”

3Paulo eŵakonsha kuti, “Nga lomba mwibatiziwa na ubatizo wotyani?”

Ŵeve elaŵila kuti, “Na ubatizo wa Yohane.”

4Paulo elaŵila kuti, “Ubatizo wa Yohane wenze ubatizo wa kuyaluka mtima, koma yeve mwine enzowuzya ŵanthu ŵala kuti acetekele akuza pa vuli pake. Wakuza uyu niye Yesu.”

5Wocetekela ŵala pecimvwa ivi, ebatiziwa mu zina ya Asikulu Yesu. 6Paulo peciŵayika manja pa mitu, Mzimu Mtuŵa ewela pali ŵeve, nipo etatika kulaŵila vilaŵilo vosaziŵika, noŵilizya malizu ofumila kwa Mulungu. 7Ŵanthu ŵala wonse pamo enzepo ngani kumi na aŵili.

8Paulo eloŵa mu kacisi wa Ayuda, nipo pa myezi itatu enzolaŵila motangʼa mtima. Enzolaŵila na ŵanthu va Ufumu wa Mulungu, noyesa kuŵanyengelela. 9Koma ayakine eyumisha mitima yawo, osapangwa kucetekela, notafulila Njila ya Asikulu pa menso pa umba yonse. Pamene apo, Paulo eŵasiya nofuma nawo asambili ŵala, nipo nsiku na nsiku enzolaŵizyana mu sukulu ya Tilano. 10Ecita ivi pa vyaka viŵili, nipo ŵanthu wonse onkhala ku Asiya, Ayuda na Agiliki, ecimvwa malizu ŵa Asikulu.

Ŵana ŵa Sikeva

11Mulungu ecita vokanganisha ngako kupitila mwa Paulo. 12Ŵanthu enze kuti akatola vitambala keno nyula ziyakine Paulo venzoseŵenzesha, noviyika pa ŵanthu olwala, nipo enzopola, na viŵanda venzofuma mwa ŵeve.

13Ayuda ayakine oyenda–yenda, ofumya viŵanda, nawo soti enzoyesa kutomola zina ya Asikulu Yesu pa ŵanthu okatiwa na viŵanda. Enze kuti, “Mu zina ya Yesu wakuŵilizya Paulo, nukulamulilani kuti mufume!” 14Ŵala enzocita ivi ni ŵana analume asanu na aŵili ŵa munthu zina yake Sikeva, mkulu wa ansembe ŵa Ciyuda.

15Koma ciŵanda ciŵayasuka kuti, “Yesu numuziŵa, Paulo soti numuziŵa, nga mwewo nimwe ŵani?” 16Nipo munthu wokatiwa na viŵanda wala eŵalumphila noŵakata wonse. Eŵacimfya na kuti ewutuka mu ngʼanda mwala ali cinthaku nipo soti ocenekeka.

17Ŵanthu wonse onkhala ku Aifeso, Ayuda na Agiliki pecimvwa ivi, ecita wowa. Nipo ŵanthu enzekupa mcinzi zina ya Asikulu Yesu ngako. 18Anyinji etatika kucetekela, ewela nozomela patuŵa nowulula viyipa venzocita. 19Anyinji enzotemwa kucita masenga, ewunganisha mabuku ŵawo noŵashoka pa menso pa ŵanthu wonse. Peciŵelengela mtengo wa mabuku ŵala, efwana kuti ekumana ngani ndalama za siliva myanda makumi asanu (50,000).

20Motetyo, Malizu ŵa Mulungu enzomwazyiwa–mwazyiwa noseŵenza mwa mphamvu.

Ŵanthu ocita vyongo ku Aifeso

21Pevicitika ivi, Paulo elingilila vakuya ku Yelusalemu kupitila ku Masedoniya na ku Akayiya. Elaŵila kuti, “Nikayofuma uko nuwamila soti kuyoyenda ku Roma.” 22Tetyo, etuma Timoteyo na Elasito ku Masedoniya. Ŵala enze aŵili mwa ŵanthu omuyavya. Koma mwine wake wala enkhalako ku Asiya pa kansita.

23Nsita iyo, kwecitika zungo ikulu cikomo ca Njila ya Asikulu. 24Mmisili muyakine wa nchito za siliva, zina yake Demetiliyo, enzopanga tumafano twa siliva twa ngʼanda yolombelamo Alitemi (Mulungu wawo wa cinakazi) nipo nchito yake yenze kuŵapindulisha ngako anyanchito ŵake.

25Demetiliyo wala ewunganisha ŵanthu ŵake ŵala, pamo na ayakine okata nchito ya mtundu wala, noŵawuzya kuti, “Mwenekwasu, muziŵa kuti cuma casu cufumila mu nchito iyi. 26Muwona na kumvwa vakucita Paulo uyu. Yeve olaŵila kuti milungu yopangiwa na ŵanthu ni milungulini yayi. Nipo wanyengelela ŵanthu anyinji noŵapatusha, osati ku Aifeso kweka yayi, koma soti pafupi na calo conse ca Asiya. 27Lomba coyofya ni cakuti nchito yasu iyi yufwika potafuliliwa. Ni apolini tyala yayi, koma soti na ngʼanda yolumbilamo Alitemi, Mulungu wasu mkulu, ŵanthu azeayiyeselini kanthu. Niye kuti uzeucenekeke mcinzi wonse wa Alitemi wala wakulombela ŵanthu wonse ŵa ku Asiya na ŵa pa calo conse ca pansi.”

28Ŵanthu ŵala pecimvwa malizu aŵa, etinkha ngako, notatika kuŵilikizya kuti, “Ni mkulu Alitemi wa Aifeso!” 29Tetyo, mu mzinda monse mwizula msokonezo. Lomba ŵanthu ŵala ekata Gayo na Alistaliko, ŵanthu ŵa ku Masedoniya, ayake ŵa ulwendo ŵa Paulo, nowutuka nawo ku ciŵanza ca maseŵelo. 30Paulo enzeepangwa kuloŵa pakati pa ŵanthu ŵala, koma asambili aliyomuzomezye. 31Akulu ayakine ŵa boma ŵa ku Asiya kwamene uko, enzewotemweka ŵake emutumizyila soti malizu omusenga kuti asaloŵele lona mu ciŵanza ca maseŵelo.

32Msonkhano wonse wa ŵanthu ŵala wenze mu msankhawila. Ayakine soti viyakine; anyinji kosaziŵa na cawunganila. 33Ayakine mu winji wala elingilila kuti Alekisandelo enzepo na colaŵila, peciwona kuti Ayuda amukankhila ku nthangu. Lomba yeve eyimya kwanja kuti aŵankhalishe celele, kuti akonkhololele ŵanthu va mlandu wala. 34Koma ŵanthu ŵala peciziŵa kuti yeve ni Muyuda, wonse ŵala eŵilikizyila pamo kwa maola aŵili kuti, “Ni mkulu Alitemi wa Aifeso!”

35Kalembela wa mzinda wala peciŵapuzyika ŵanthu ŵala, eŵawuzya kuti, “Mwewo Aifeso, ni ŵani asaziŵa kuti mzinda wa Aifeso niye usunga ngʼanda yolombelamo Alitemi mkulu, nipo soti wusunga mwala wa pa citwa wala wipona kufuma kululu? 36Lomba pakuti paliye angasushe ivi, mwewo muwamila kuŵa celele, osacita vinthu mokulumizya. 37Mwewo mwawela na aŵa ŵanthu kuno, cukanga ŵeve aliyoyiŵe va mu ngʼanda ya Mulungu wasu, keno kucita vyongo. 38Keno Demetiliyo na amisili ayake ali na kanthu na munthu muyakine, nsaka za milandu zilipo, nipo opingula alipo soti. Akalaŵizyane milandu yawo kwamene uko. 39Koma, keno musakila kanthu kayakine, msonkhano wa ulamulilo wa ŵanthu wonse niye watiukasimikizye. 40Pakuti pali coyofya cakuti angatipe mlandu ocita vyongo cikomo ca vacitika. Paliye cikomo ciliconse pa zungo iyi, nipo tikasoŵe colaŵila akatikonsha.” 41Pecilaŵila ivi, ewuzya ŵanthu ŵala kuti aŵekuya.

Currently Selected:

Macitilo 19: GMN

Highlight

Compare

Copy