Loma 3

1PEA ka ‘oku pehē, pea ‘oku hulu atu ‘a e Siu ‘i he hā? ‘io, ko e hā hano ‘aonga ‘o e kamu? 2‘Oku lahi ‘ene hulu atu ‘i he me‘a kotoa pē. Ko hono me‘a lahi ko e tu‘anaki kinautolu, ‘o tuku ki ai ‘a e ngaahi fo‘i folofola ‘a e ‘Otua– 3‘O hā tokua? Ko ia ai pē ‘a e ta‘etui ‘a e ni‘ihi, ka ko e motu ‘enau tui ko e me‘a ia koā ke motuhi ai ‘a e fai ‘a e ‘Otua ki he‘ene lea, ‘ō? 4Molekemama‘o! Tau tuku mu‘a ‘oku mo‘oni pē ‘a e ‘Otua, kae loi ‘a e kakai kotoa pē: ‘o hangē ko ia kuo tohi,#Saame 51.4 (LXX)

Koe‘uhi ke hā tonuhia ho‘o ngaahi folofola,

Pea ke ke ikuna ‘oka anga‘ia.

5Ka ‘o kapau ko ‘etau fai hala ko e me‘a ia kuo e‘a ai ‘a e faitotonu ‘a e ‘Otua, pea ta fēfē ai? Te ta lau ‘oku hala ‘a e ‘Otua he‘ene fai houhau ai, ‘ō? (Ko si‘eku lau fakaetangata pē.) 6Molekemama‘o! he ka ne pehē, pea lava fēfē ‘e he ‘Otua ke fakamaau ‘a māmani?

7‘Io, kapau kuo e‘a ‘a e mo‘oni ‘a e ‘Otua, ‘o fakautuutu ai hono ongoongolelei, ko e me‘a tokua ‘i he‘ete loi, pea ko e hā ‘oku kei anga‘i ai kita foki, ‘o pehē kuo u fai angahala? 8Pea ko e hā ai ‘oku ‘ikai te tau fai kovi mu‘a, kae tupu ‘a e lelei? ‘o hangē ko homau lau‘ikovi ‘oku fai, mo e taukave ‘e he ni‘ihi, tokua ‘oku pehē ‘emau lea. Tonuhekina pē ‘a e tuku ke tautea ha me‘a pehē.

‘Oku ‘Ikai he Taha ‘e Fai totonu

9Pea kuo ta fēfē ē? Kuo ta fokotu‘u hata pā, ‘ō? ‘Oku ‘ikai ‘aupito.#3.9 Pea… ‘aupito?; ‘Oku ngali tonu hono hiki ‘o: Pea hā leva? ‘Oku mau lelei ange koā ‘a kimautolu Siú he kakai kehé? ‘Ikai ‘aupito! pe Pea hā leva? ‘Oku mau kovi ange koā ‘a kimautolu Siú he kakai kehé? ‘Oku ‘ikai ke mau kovi ange ‘aupito. ‘Āua, na‘a mau fakamo‘oni ‘anenai, ‘oku mo‘ua kotoa pē ‘i he angahala ‘a e Siu mo e Kalisi fakatou‘osi.

10Pea ‘oku hoa mo ia ‘a e me‘a kuo tohi,#Saame 14.1-3 (LXX); 53.1-3 (LXX)

‘Oku ‘ikai ‘aupito ha faitotonu;

‘Oku ‘ikai ‘aupito ha taha.

11‘Oku ‘ikai ha fai fakapotopoto,

‘Oku ‘ikai ha taha ‘oku kumi ki he ‘Otua.

12Kuo nau afe kotoa pē;

Kuo nau hoko ko e koto ‘auha kotoa pē:

‘Oku ‘ikai ha taha ‘oku angalelei,

‘Oku ‘ikai ‘aupito ha taha.

13Ko e fonualoto matangaki honau kia;#Saame 5.9 (LXX); 140.3

Ko e ngāue ‘a honau ‘elelo ko e fakahekeheke;

Kuo fufū ‘i honau loungutu ‘a e me‘a kona ‘o e ngata.

14Ko e koto kapekape ‘a honau ngutu, mo e koto fakamahu.#Saame 10.7 (LXX)

15‘Oku nau ve‘evave ke lilingi toto.#‘Ais 59.7-8

16‘Oku ‘i honau ngaahi hala ‘a e maumau mo e fakamamahi.

17Pea ko e hala ‘o e melino kuo ‘ikai te nau ‘ilo ki ai.

18Pea ‘oku ‘ikai hā ki honau mata ‘a e ngeia ‘o e ‘Otua.#Saame 36.1

19Pea ko eni, ‘oku tau lāu‘ilo, ‘ilonga ha fakamatala ‘a e Lao, ko e fai pē ki he kakai ‘oku kau ki he Lao; ko e fai ke tāpuni ai ‘a e ngutu kotoa pē, pea ke hoko ‘o halaia ki he ‘Otua ‘a māmani kātoa. 20Koe‘uhiā ko e me‘a ki he ngaahi ngāue fakalao, ‘e tu‘u mola ai ‘a e kakano kotoa pē ‘i hono ‘ao, ‘o ‘ikai hanau fakatonuhia mei ai: he ko e me‘a ‘oku fou mei he Lao, ko e faka‘ilo angahala pē.#Saame 143.2; Kal 2.16

21Ka ‘i onopooni kuo fakae‘a ha fakatonuhia mei he ‘Otua, ‘a ia ‘oku ta‘ekau ai ‘a e lao, ka ‘oku ‘i ai ha lau ki ai ‘i he Lao mo e Tohi palōfita. 22‘Io, ko e fakatonuhia mei he ‘Otua ‘oku fou mai ‘i he tui kia Sīsū Kalaisi ki he kakai kotoa pē ‘oku tui.#Kal 2.16 23He ‘oku ‘ikai ha fai kehekehe; he kuo fai angahala kotoa pē pea ‘oku ‘ikai te nau a‘usia ‘a e hōifua ‘a e ‘Otua; 24ka nau ma‘u foaki pē ‘a e fakatonuhia ‘i he‘ene ‘ofa pē ‘a‘ana, ko e me‘a ‘i he totongi huhu‘i ‘a ia kuo ‘ia Kalaisi Sīsū. 25‘a e Toko Taha ko ia na‘e faka‘ali‘ali ‘e he ‘Otua ko e me‘a fakatupu hōifua; ko e hōifua tu‘unga ‘i hono ta‘ata‘a,#3.25-26 ‘i hono ta‘ata‘á; pe ‘i he‘ene pekia fakafeilaulaú. pea founga ‘i he tui; ko e faka‘ali‘ali ‘e he ‘Otua ma‘a ‘Ene ‘Afio, ke hā ai ‘ene faitotonu, koe‘uhiā na‘e laka ‘i he ngaahi angahala langaimu‘a, ko e me‘a ‘i he fai fakatofutofu ‘a e ‘Otua;

26‘io, koe‘uhi ke hā ai ‘ene faitotonu ‘i he kuonga ko eni, ke fakatou hā ‘oku ne faitotonu mo ne fai fakatonuhia kiate ia ‘oku ‘i he tui kia Sīsū. 27Pea ko e fē ‘eni ‘a e pōlepole na? Kuo tāpuni ‘a e matapā ki ai. Ko e hā ‘a e anga ‘o e lao ‘oku pehe‘i ai? Ko ha lao ngāue koā? ‘Ikai, ka ko ha lao tui. 28He ‘oku mau pehē, ‘oku fakatonuhia ha tangata ‘aki ‘a e tui, ‘ata‘atā mei he ngaahi ngāue fakalao. 29‘Io, ko e ‘Otua ko e ‘Otua ‘o e Siu pē koā? ‘Ikai ko e ‘Otua ‘o e Senitaile foki? ‘Io, ko e ‘Otua ia ‘o e Senitaile foki. 30‘O kapau ā ‘oku taha tofu pē ‘a e ‘Otua, ‘a ia te ne fakatonuhia si‘i kamu mei he tui, pea mo si‘i ta‘ekamu ko e me‘a ‘i he‘ene tui.#Teu 6.4; Kal 3.20

Currently Selected:

Loma 3: TMB

Highlight

Compare

Copy