Loma 2
2
Ko e Fakamaau ‘a e ‘otuá
1KO ia ai, ‘oku ‘ikai hao hao‘anga ‘o‘ou, ‘a e tangata fua pē ‘oku fakaanga; he ko ho‘o anga‘i ‘a e fa‘ahinga ko ē ‘i he me‘a ko ia, ‘oku ke anga‘i foki koe; he ‘oku ke fai ‘a e ngaahi me‘a pē ko ia ‘e koe ‘oku fakaanga.#Māt 7.1; Luk 6.37 2Ka ‘oku tau ‘ilo ko e fakamaau ‘a e ‘Otua ki he fa‘ahinga fai me‘a pehē, ‘oku totonu. 3Pea ko eni koā ho‘o fakakaukau, ‘a koe, siana, ‘oku ke anga‘i ‘a e kakai fai me‘a pehē; ‘osi, ‘oku ke fai pehē mo koe? ko ho‘o pehē, te ke ‘ata‘atā koe mei he fakamonū ‘a e ‘Otua? 4Ka na‘a ko ho‘o ta‘etoka‘i ‘a e koloa na ko ‘ene anga‘ofa, kae‘uma‘ā ‘ene fakatofutofu mo anga mokomoko; ‘o ‘ikai te ke ‘ilo, ko e anga‘ofa ‘a e ‘Otua ‘oku ne fai ha taki ki he fakatomala? 5Ka ke fai‘aki ho loto fefeka mo ta‘efakatomala na, ‘o ke fokotu‘u houhau ma‘au, ‘oka hoko mai ‘a e ‘aho fai houhau mo fakae‘a ‘a e fakamaau ‘au‘autotonu ‘a e ‘Otua: 6‘a ‘Ene ‘Afio te ne ‘atu ki he tangata takitaha, ‘o fakatatau ki he‘ene ngāue.#Saame 62.12; Pal 24.12 7‘Ilonga kinautolu kuo kītaki ‘a e fai lelei, ‘o fou ai ‘enau ngāue ki he lāngilangi‘ia mo e fakamālō mo e ta‘efa‘a‘auha, te ne ‘atu ki ai ‘a e mo‘ui ta‘engata: 8ka ko kinautolu ‘oku mo‘ui ma‘anautolu, pea ‘oku ‘ikai te nau muitala ki he mo‘oni, ka nau muitala pē ki he ta‘etotonu, ‘e tō kiate kinautolu ‘a e tuputāmaki mo e houhau, 9‘a e fakamamahi mo e holitu‘u; ‘io, ‘e tō ki he mo‘ui ‘a e tangata takitaha ‘oku fai ‘a e kovi; ‘o mu‘a ki he Siu, ka ki he Kalisi foki: 10ka ‘e tō ‘a e lāngilangi‘ia mo e fakamālō mo e tu‘umālie mo‘onautolu takitaha ‘oku ngāue lelei; ‘o mu‘a ki he Siu, ka ki he Kalisi foki. 11He ‘oku ‘ikai ha filifilimānako ‘i he ‘Otua.#Teu 10.17
12He ‘ilonga kinautolu na‘e fai angahala ta‘e te nau ma‘u ha lao, pea ‘e ‘ikai kau ha lao ‘i honau faka‘auha; ka ‘ilonga kinautolu na‘e fai angahala kuo nau ma‘u ha lao, pea ‘e fakamaau kinautolu ‘aki ‘a e lao. 13He tala‘ehai ko e kau fanongo lao ia ‘oku tonuhia ‘i he ‘ao ‘o e ‘Otua, ka ko e kau fai ki he lao ko kinautolu pē ‘e fakatonuhia. 14(He ko e Senitaile, ‘a e kakai ‘oku ‘ikai te nau ma‘u lao, ‘oka ai ha‘anau fai fakaenatula pē ‘a e ngaahi me‘a ‘oku ‘i he Lao, neongo ‘oku ‘ikai te nau ma‘u lao ka ko e lao pē ‘a kinautolu ma‘anautolu: 15he ko e fa‘ahinga ia ‘oku hā ‘i he‘enau anga kuo tohi ‘i honau loto ‘a e ngāue fakalao; ai mo e fakamo‘oni foki ‘e honau konisēnisi, mo ‘enau fevakai‘aki ‘a ‘enau tō‘onga, ‘o nau fakahalaia, ‘io, mo fakatonuhia foki.) 16‘Io, ‘ilonga ‘a e kakai ‘oku fai ki he lao, ‘e toki fakatonuhia kinautolu ‘i he ‘aho ‘e fakamaau ai ‘e he ‘Otua ‘a e ngaahi me‘a fufū ‘a e kakai, ‘o hangē ko e Kōsipeli ‘oku ou malanga‘aki, ‘o fai ‘ia Kalaisi Sīsū.
17Ka ‘o kapau ko e toko taha koe ‘oku lau ko e Siu, mo ke fuataki ha lao, mo ke vīkiviki ‘i he ‘Otua, 18‘o ke ‘ilo hono finangalo totonu, mo ke sivi ‘o ‘ilo ‘a e ngaahi me‘a ‘oku lelei lahi, ko ho akonekina ai pē mei he Lao; 19pea ‘oku ke falala ko e toko taha koe ke takihala ki he kakai kui, ke fakamaama ki he kakai ‘oku nofo he po‘uli, 20ke hīnoi‘i ‘a e kakai ‘oku ta‘eloto, ke ako ‘a e kakai kei tamaiki, koe‘uhi tokua, kuo ke ma‘u ‘i he Lao ‘a e poto mo e mo‘oni kuo ‘ai sino– 21Pea ka kuo pehē, pea ko e tangata koe ‘oku ke akonekina ‘a e kakai kehe, kae ‘ikai fai ha ako kiate koe, ‘ō? Ko e toko taha koe ‘oku ke fanongonongo ke ‘oua na‘a kaiha‘a, ka ke kaiha‘a ‘e koe? 22Ka e toko taha koe ‘oku ke pehē ke ‘oua na‘a tono fefine, ka ke tono fefine ‘e koe? Ko e toko taha koe ‘oku ke fakalili‘a ki he ‘aitoli, ka ke kaiha‘a pē mei he fale ‘aitoli, ‘ō? 23‘Ā, ‘a koe ‘oku ke pōlepole ‘i ha lao, ‘oku ke fakaongokovi ‘a e ‘Otua ‘aki ho‘o maumau‘i ‘a e Lao: 24he ‘oku lau‘ikovi ‘a e huafa ‘o e ‘Otua ‘i he Senitaile ko e me‘a ‘iate kimoutolu: ‘o hangē ko e folofola.#‘Ais 52.5 (LXX)
25‘Io, ‘oku mo‘oni pē ko e me‘a ‘aonga kiate koe ‘a e kamu, ‘o kapau te ke fai ki he Lao. Ka ‘o kapau ko e maumau lao koe, kuo hoko ho‘o kamu ko e ta‘ekamu. 26‘Āua, pea neongo ko si‘i ta‘ekamu, ka ‘o kapau te ne tauhi ‘a e ngaahi tu‘utu‘uni ‘a e Lao, ‘ikai ‘e lau ‘ene ta‘ekamu ko e kamu? 27‘Io, ko ia ‘oku ne ‘osiki ‘a e Lao, neongo ‘oku ne ta‘ekamu ko si‘ene fakaenatula pē, ka te ne fakahalaia koe, ‘a koe ‘oku ke maumau lao neongo ho‘o ma‘u tohi mo e kamu. 28He tala‘ehai ko e Siu mo‘oni ia ‘oku Siu ‘i tu‘a pē; pea tala‘ehai ko e kamu mo‘oni ia ‘oku ha pē ‘i tu‘a, ‘i he kakano: 29kaekehe, ko e Siu mo‘oni ia ‘oku Siu ‘i loto, pea ko e kamu mo‘oni ‘a e kamu ‘o e loto, ‘a ia ‘oku tu‘unga ‘i ha laumālie ‘o ‘ikai ‘i ha tohi; ‘a ia ko hono fakamālō ‘oku ‘ikai mei he tangata ka mei he ‘Otua.#Teu 30.6
Currently Selected:
Loma 2: TMB
Highlight
Share
Compare
Copy
Want to have your highlights saved across all your devices? Sign up or sign in
Tongan Moulton Bible © Bible Society of the South Pacific, 2011.
