Loma 4
4
1PEA ko ‘emau fakaka‘anga ai koā ‘a e Lao, he fai‘aki ‘a e tui? Molekemama‘o! kaekehe, ‘oku mau poupou ‘a e Lao. Pea kapau ko ia, pea ko e hā ‘etau lea ‘ia ‘Epalahame, ko hotau ‘ulumotu‘a fakasino? Ko e hā ha me‘a kuo lava ‘e ia? 2Seuke, kapau na‘e fakatonuhia ‘a ‘Epalahame mei he‘ene ngāue, tā ‘oku ‘i ai ha‘ane me‘a ke pōlepole ai. Ka tala‘ehai ‘oku ‘i ai ha‘ane me‘a pehē ke fai ki he ‘Otua: 3he ko e hā ‘a e lau ‘a e Tohitapu? ‘a ‘eni, pea na‘e tui ‘a ‘Epalahame ki he ‘Otua, pea na‘e lau ia ma‘ane mā‘oni‘oni.#Sēn 15.6; Kal 3.6 4Pea ko eni, kapau ko ha toko taha ‘oku ngāue, ‘oku ‘ikai lau ‘a e totongi ‘oku ne ma‘u ko e me‘a ‘ofa, ka ko e mo‘ua. 5Ka ka ‘ilonga ha taha ‘oku ‘ikai ngāue, ka ‘oku ne tui falala kiate ia ‘oku ne fakatonuhia ‘a e faka‘otuamate, ‘oku lau ‘a e tui ‘a‘ana ma‘ane mā‘oni‘oni. 6Hangē foki ko e fakamālie ‘e Tēvita ‘a e tangata ‘oku lau mā‘oni‘oni ki ai ‘e he ‘Otua, ‘o ta‘ekau ha‘ane ngāue, he‘ene pehē.
7Monū‘ia ā ka ko e kakai kuo fakamolemole ‘enau ngaahi talangata‘a,#Saame 32.1-2
Pea ‘u‘ufi ‘enau ngaahi angahala.
8Monū‘ia ā ka ko e tangata ‘a ia ‘e ‘ikai si‘i lau ki ai ‘e he ‘Eiki ha hia.
9Pea ko eni, ‘oku lau ‘a e fakamālie ni ki he kamu pē, pe ki he ta‘ekamu foki? he ‘oku tau pehē, ko ‘Epalahame ia na‘e lau ‘ene tui ma‘ane mā‘oni‘oni. 10Pea na‘e fakafēfē hono lau kiate ia? He‘ene kamu, pe he‘ene ta‘ekamu? Na‘e ‘ikai ‘i he‘ene kamu, ka ‘i he‘ene ta‘ekamu. 11Pea na‘a ne ma‘u ‘a e faka‘ilonga ko ia ko e kamu mo‘o sila ‘o e mā‘oni‘oni mei he tui, ‘a ia na‘a ne ma‘u lolotonga ‘ene ta‘ekamu: koe‘uhi ke ne hoko ko e tamai ‘anautolu kotoa pē ‘oku tui ta‘ekamu, ke lau mā‘oni‘oni kiate kinautolu.#Sēn 17.10 12Pea ko e tamai foki ‘a e ta‘ekamu, ‘a kinautolu ‘oku ‘ikai te nau ngata ‘i he tupu ko e kamu, ka ‘oku nau topuva‘e taha foki mo e tui ‘a ‘etau Tamai ko ‘Epalahame, ‘a e tui na‘a ne ma‘u lolotonga ‘ene ta‘ekamu.
13He tala‘ehai na‘e fou fakalao mai ‘a e tala‘ofa kia ‘Epalahame pe ko hono hako, ‘a e pehē ko e ‘ea ia ‘e ‘o‘ona ‘a māmani: ka na‘e fou mai ‘i he mā‘oni‘oni mei he tui.#Sēn 17.4-6; 22.17-18; Kal 3.29 14He kapau ‘oku ‘ea ‘a e kakai ‘oku tu‘unga ki he Lao, tā ‘oku ma‘ama‘a ‘a e tui, pea ka‘anga ‘a e tala‘ofa:#Kal 3.18 15he ko e me‘a ‘oku fakatupu ‘e he Lao ko e houhau: ka ka ‘ikai leva ha lao, pea ‘ikai ai foki ha talangata‘a.
16Ko hono ‘uhinga ‘eni ‘o ‘ene tu‘unga ki he tui, koe‘uhi ke fou mai ko e me‘a‘ofa; koe‘uhi ke pau ‘a e tala‘ofa ki he hako kotoa, ‘o ‘ikai ki he hako pē ‘oku tu‘unga ki he Lao, ka ki he hako foki ‘oku tu‘unga ki he tui faka-‘Epalahame; ‘a ‘Epalahame ‘a ia ko e Tamai ‘atautolu kotoa ‘i he ‘ao ‘a e ‘Otua na‘a ne tui ki ai;#Kal 3.7 17(‘o hangē ko ia kuo tohi, Kuo u tu‘utu‘uni koā ko e tupu‘anga ‘o ha fuifui pule‘anga ‘a ‘Ene ‘Afio ‘oku ne fakamo‘ui hake ‘a e pekia, mo ne lau ‘a e ngaahi me‘a ‘oku ‘ikai, ‘o hangē ‘oku nau ‘i ai.#Sēn 17.5 18‘A ‘Epalahame na‘a ne tui, ‘o piki ki he‘ene ‘amanaki, neongo kuo ‘ikai ‘a e ‘amanakinga; koe‘uhi ke ne hoko ko e tupu‘anga ‘o ha fuifui pule‘anga; ‘o hangē ko e me‘a kuo folofola‘aki mai, ‘E pehē ho hako.#Sēn 15.5 19Pea ‘i he ‘ikai vaivai ‘ene tui, na‘a ne tokanga‘i leva hono sino ‘o‘ona, ‘ene mate, he ‘oku ne ofi ke teau ta‘u; kae‘uma‘ā ‘a e mate ‘a e manava ‘o Sela.#Sēn 17.17 20Ka na‘e ‘ikai te ne tāla‘a ki he tala‘ofa ‘a e ‘Otua ‘i ha‘ane ta‘etui; ka na‘e hoko ‘o kaukaua ‘ene tui, mo ne fakahīkihiki‘i ‘a e ‘Otua. 21Mo mātu‘aki falala, ko e me‘a kuo ne tala‘ofa ki ai ‘oku ne malava foki ke fai. 22Ko hono ‘uhinga ia foki na‘e lau ia ma‘ane mā‘oni‘oni. 23Ka tala‘ehai na‘e tu‘u ‘i he Tohi ‘o pehē, “Na‘e lau ma‘ana,” koe‘uhi ko ia pē. 24Ka koe‘uhi ko kitaua foki: ‘io, ‘e lau ma‘ataua, ‘a kitaua ‘oku ta tui kiate ia na‘a ne fokotu‘u ‘a hotau ‘Eiki ko Sīsū mei he pekia– 25‘a ‘Ene ‘Afio na‘e tukuange ke pekia koe‘uhi ko ‘etau ngaahi faihala, pea fokotu‘u koe‘uhi ko hotau fakatonuhia.#‘Ais 53.4-5
Currently Selected:
Loma 4: TMB
Highlight
Share
Compare
Copy
Want to have your highlights saved across all your devices? Sign up or sign in
Tongan Moulton Bible © Bible Society of the South Pacific, 2011.
