Loma 1
1
1TŪ ko au Paula, ko e tamaio‘eiki ‘a Sīsū Kalaisi, na‘e ui ke ‘aposetolo, na‘e vahe‘i ke nofo ki he Kōsipeli ‘a e ‘Otua–
2‘a e ongoongolelei ko ia na‘a ne tala‘ofa ki ai ‘i mu‘a ‘i he‘ene kau palōfita ‘i he Tohitapu, 3ko e ongoongo ‘o hono ‘Alo, ‘o ia na‘a ne tupu mei he hako ‘o Tēvita ‘i hono anga kakano, 4‘o ia na‘e mātu‘aki fakae‘a ko e ‘Alo ‘o e ‘Otua ‘i hono laumālie tāpuhā, he‘ene toetu‘u mei he pekia, 5‘io, ‘o Sīsū Kalaisi ko hotau ‘Eiki; ‘a ia na‘e fou mei ai ‘emau ma‘u kelesi, kae‘uma‘ā ‘a e lakanga ‘aposetolo ni, koe‘uhi ke ai ha fakavaivai ki he lotu ‘i he Senitaile kotoa pē, koe‘uhiā ko hono huafa; 6‘a e fa‘ahinga ‘oku mou ‘i ai foki, ko e kau ui ‘e Sīsū Kalaisi.
7Ko ‘eku tohi kiate kimoutolu kotoa pē ‘i Loma ‘a ia ‘oku ‘ofeina ‘e he ‘Otua, kuo fakaului ki he fa‘ahinga tapu.
‘Ofa ke mou ma‘u kelesi mo e fiemālie mei he ‘Otua ko ‘etau Tamai, mo e ‘Eiki ko Sīsū Kalaisi.
8Ko e ‘uluaki me‘a, ‘oku ou fakafeta‘i ki hoku ‘Otua ‘ia Sīsū Kalaisi, koe‘uhi ko kimoutolu fuli pē, koe‘uhi ko e ongoongoa ‘a ho‘omou lotu ‘i māmani kātoa. 9Seuke, ko e ‘Otua ē, ‘a ia ‘oku ou tauhi ki ai ‘aki hoku laumālie ‘i he ngāue ki he Kōsipeli ‘o hono ‘Alo, ko ‘eku fakamo‘oni ‘a ‘Ene ‘Afio ki he ta‘emotu ‘eku takua kimoutolu ‘i he‘eku lotu kotoa pē; 10‘o u hū, hei‘ilo ‘e faifai pea u ta‘imālie ‘alu atu ‘i he finangalo ‘o e ‘Otua. 11He ‘oku ou holi ke fe‘iloaki mo kimoutolu; koe‘uhi ke u ‘atu ha‘amou me‘i kelesi fakalaumālie, hei‘ilo ‘e poupou ai kimoutolu– 12‘ā, ko ‘eku pehē pē, ke ai ha‘atau fetokoni‘aki ‘i he‘eku ‘iate kimoutolu, ‘a au ‘aki ‘a e lotu ‘amoutolu, pea ko kimoutolu ‘aki e lotu ‘a‘aku.
13Pea ‘oku ‘ikai te u loto ke mou ta‘e‘ilo, kāinga, kuo tu‘o lahi ‘eku fakakaukau ke u ‘alu atu, ka kuo ta‘ofi au ‘o a‘u ki he taimi ni; ko ‘eku feinga ke ai haku fua ‘iate kimoutolu foki, ‘o hangē foki ko e Senitaile kehe.#Ngā 19.21 14Ko e tangata mo‘ua au ki he Kalisi mo e Pāpeliane fakatou‘osi, ki he ‘atamai mo e ta‘e‘atamai. 15Pea ‘i he‘ene pehē, ko e anga leva ‘o hoku loto ‘o‘oku ke malanga‘aki ‘a e Kōsipeli kiate kimoutolu foki ‘a e kakai ‘o Loma.
Ko e Ivi ‘o e Ongoongoleleí
16He tala‘ehai ‘oku ou maa‘i ‘a e Kōsipeli: he ko e ivi ia ‘o e ‘Otua ‘oku ngāue ki he fakamo‘ui ‘iate ia fuli pē ‘oku tui; ‘o mu‘a ki he Siu, ka ki he Kalisi foki.#Ma‘ake 8.38 17He ‘oku fakae‘a ‘i ai ha mā‘oni‘oni mei he ‘Otua, ‘oku kamata mei he tui, pea iku ki he tui; ‘o hangē ko e Folofola, Ko e mā‘oni‘oni te ne mo‘ui mei he tui.#1.17 Ko e… tui: ‘Oku hiki ‘e he ni‘ihi: Ko e mā‘oni‘oni mei he tui, te ne mo‘ui. #Hap 2.4
Ko e Halaia ‘a Ha‘a Tangata
18He ‘oku fakae‘a mei Langi ha houhau ‘o e ‘Otua ki he ngaahi faka‘otuamate mo e ngaahi angahala ‘a e kakai, ‘a e kakai ‘oku ma‘u ‘a e mo‘oni, kae lolomi ‘aki ‘a e fai angahala. 19Koe‘uhiā ko e ngaahi me‘a ‘a e ‘Otua ‘oku lāu‘ilo ki ai, ‘i honau loto; he na‘e ai ‘e he ‘Otua ke e‘a kiate kinautolu. 20‘Io, na‘a mo e ngaahi me‘a ‘o‘ona ‘oku ta‘ehāmai, ka talu e ngaohi ‘o māmani mo e hā ia, ‘i hono ‘utangi‘i mei he ngaahi me‘a kuo ne ngaohi, ‘io, ‘a hono māfimafi mo hono ‘Otua, ‘o fakatou lau ‘ītāniti; ko ia ‘oku ‘ikai ai hanau hao‘anga. 21Koe‘uhi neongo na‘a nau ‘ilo ki he ‘Otua, ka na‘e ‘ikai te nau fakahīkihiki‘i ia, pe fakafeta‘ia, ‘o ngali ko e ‘Otua: kaekehe na‘e taka launoa ‘enau ngaahi fakakaukau; pea po‘uli tu‘u honau loto ta‘e‘ilo.#‘Efe 4.17-18 22Lolotonga ‘enau taukave ‘oku nau poto, na‘a nau hoko ‘o vale. 23Pea nau fetongi ‘a e lāngilangi ‘o e ‘Otua ta‘e‘auha ‘aki ‘a e fakatātā ‘i he tatau ‘o ha tangata ‘oku ‘auha, mo e ngaahi fa‘ahinga manupuna, mo e manu ve‘efā, mo e manu totolo.#Teu 4.16-18
24Ka hono ō ia na‘e tuku atu ai kinautolu ‘e he ‘Otua ke nau fou ‘i he ngaahi holi ‘o honau loto, ‘o a‘usia ‘a e anga ‘uli; ko ia na‘e fakalielia‘i honau sino ‘i he‘enau feangai, 25he fa‘ahinga ko ia na‘a nau tuku ‘a e mo‘oni ‘a e ‘Otua, ka nau fai‘aki ‘a e koto loi; ‘o nau lotu mo tauhi ki he me‘a kuo ngaohi, ‘o laka ‘iate ia na‘a ne ngaohi, ‘a ‘Ene ‘Afio ‘oku ‘o‘ona ‘a e fakamālō ‘o lauikuonga. ‘Ēmeni.
26Ko ia na‘e tuku atu ai kinautolu ‘e he ‘Otua ki he ngaahi feinga ‘a ia ko e koto fakalielia. He ko honau kakai fefine na‘a nau tuku ‘a e fai fakaenatula, ka nau hiki ki he anga ‘oku makehe mo natula. 27Pea pehē foki mo e kakai tangata, na‘a nau li‘aki ‘a e fai ki he fefine, ‘a ia ‘oku fakaenatula, ka nau mātu‘aki ‘afu ‘i he feholi‘aki, ko e fai ‘e he tangata mo e tangata ‘a e me‘a ta‘etaau: pea ko ‘enau ma‘u ē ‘i he sino ‘onautolu ‘a e totongi na‘e hoa mo ‘enau hē; ‘a ia na‘e totonu ke pehē.
28‘Io, ‘o hangē ā ‘enau li‘aki ‘a e ‘Otua, ‘i he ‘ikai te nau loto ke puke ma‘u ‘enau ‘ilo kiate ia, pehē na‘e tuku atu kinautolu ‘e he ‘Otua ki he loto li‘ekina, ke fai me‘a ta‘etaau– 29ko e kakai kuo fonu ngutungutu ‘i he angahala kotoa pē, he anga fīta‘a, he mānumanu, he lotokovi; ko e kakai ‘oku pito ‘i he meheka, he fakapō, he fakakē, he fakahekeheke, he mahalo kovi; ko e kakai fakakovi. 30Ko e kakai fasitu‘u–‘a kinautolu ‘oku fehi‘anekina ‘e he ‘Otua#1.30 fehi‘anekina ‘e he ‘Otua; pe fehi‘a ki he ‘Otuá. –ko e kakai pau‘u, ko e kakai anga fakata‘etoka‘i, ko e kakai fielahi, ko e kakai fakakaukau kovi fo‘ou, ko e kakai talangata‘a ki he mātu‘a. 31Ko e ta‘eloto, ko e ta‘efai ki he‘enau fuakava, ko e ta‘e‘ofa ho‘ota, ko e ta‘efakamolemole. 32Ko e kakai ‘oku peheni honau anga, neongo kuo nau ‘ilo kānokano ‘a e tu‘utu‘uni ‘a e ‘Otua, ‘a e pehē kuo tonu ki he mate ‘a kinautolu ‘oku fai me‘a pehē, ka ‘oku ‘ikai te nau ngata ‘i he fai ‘o e ngaahi me‘a ko ia ka ‘oku hōhō‘ia foki honau loto ‘i he kakai ‘oku fai pehē.
Currently Selected:
Loma 1: TMB
Highlight
Share
Compare
Copy
Want to have your highlights saved across all your devices? Sign up or sign in
Tongan Moulton Bible © Bible Society of the South Pacific, 2011.
