Loma 15
15
Fakamu‘omu‘a ‘a e Kāingá
1PEA ko eni, ko kitaua ‘oku ta makalohi, ko hota fatongia ke fua ‘a e ngaahi vaivai‘anga ‘o e kakai ‘oku ‘ikai ke mālohi, ‘o ‘oua ‘e fai ‘a ia pē ‘oku ‘ao mo kitaua. 2‘Ē, ta takitaha fai ‘a e me‘a ‘e ‘ao mo hota kaungā‘api, ‘a e me‘a ‘e ‘aonga ki hono langa hake. 3He ko Kalaisi foki na‘e ‘ikai te ne fai ‘a e me‘a na‘e ‘ao mo ia; ka ko ‘ene nofo na‘e hangē ko ia na‘e tohi, Ko e ngaahi manuki ‘a e kakai ‘oku manuki‘i koe, na‘e tō kiate au.#Saame 69.9 4He ‘ilonga ha me‘a na‘e tohi mu‘a na‘e tohi mo‘otau akonekina; koe‘uhi ko e me‘a ‘i he fakakātaki mo e poupou ‘oku fai ‘e he folofola ke tau ma‘u ai ‘a e ‘amanaki lelei. 5Pea ko eni, ko e ‘Otua ‘oku ‘a ‘Ene ‘Afio ‘a e fakakātaki mo e poupou, ‘ofa ke ne ‘atu ke hu‘ufataha homou loto ‘i ho‘omou feangai, ‘o fai ‘i he funga ‘o e anga ‘o Kalaisi Sīsū: 6koe‘uhi ke loto taha mo ngutu taha ho‘omou fakamālō‘ia ‘a e ‘Otua, ko e Tamai ‘a hotau ‘Eiki ko Sīsū Kalaisi.
Ko e Ongoongoleleí ma‘a Māmani Kātoa
7Ko ia mou fefakakau‘aki kimoutolu, ‘o hangē foki kuo fakakau mai kimoutolu ‘e Kalaisi, koe‘uhi ke ongoongolelei ai ‘a e ‘Otua. 8He ‘oku ou pehē, kuo hoko ‘a Kalaisi ko e sevāniti ‘o ha‘a Kamu, koe‘uhi ko e mo‘oni ‘a e ‘Otua, ke ma‘uma‘uluta ai ‘a e ngaahi palōmesi na‘e fai ki he‘enau ngaahi kui: 9ka ke fakamālō‘ia ‘a e ‘Otua ‘e Senitaile, koe‘uhi ko ‘ene meesi; ‘o hangē ko ia kuo tohi, ‘o pehē,#2 Sām 22.50; Saame 18.49 Ko ia ai, te u fakahīkihiki‘i koe ‘i he Senitaile, pea u hiva‘aki ho huafa. 10Pea ko e potu ‘e taha ‘oku pehē,#Teu 32.43 Mou fiefia, ‘a e Senitaile, fakataha mo ho‘ona kakai. 11Pea ko e potu folofola ‘e taha ‘oku pehē,#Saame 117.1
Mou tuku kolōlia ki he ‘Eiki, ‘a Senitaile kotoa pē,
‘Io, ke fakahīkihiki‘i ia ‘e he ngaahi kakai fuli pē.
12Pea ‘i he potu folofola ‘e taha ‘oku pehē ‘e ‘Aisea,#‘Ais 11.10 (LXX) ‘E ‘i ai ‘a e huli ‘o Sese; ‘io, ko e toko taha kuo tu‘u ke pule‘i ‘a Senitaile: pea ‘e ‘amanaki ‘a Senitaile ‘iate ia.
13Pea ko eni, ko e ‘Otua ‘oku ‘a ‘Ene ‘Afio ‘a e faka‘amanaki, ‘ofa ke ne fakafonu kimoutolu ‘aki ha fu‘u fiefia mo melino ‘i ho‘omou tui; koe‘uhi ke mou tupulekina ‘i he ‘amanaki lelei, ‘i he ngāue ‘a e Laumālie Mā‘oni‘oni.
Ko e Ngāue Fakamisinale ‘a Paula
14Pea ko eni, si‘oku kāinga, ‘oku ou mātu‘aki tui ‘e au foki, ho e koto fai lelei kimoutolu foki, ko e koto pōtopoto‘i kimoutolu, mo mou lava foki ke fevaloki‘aki ‘a kimoutolu. 15Ka neongo ia ka ‘oku māmālohi pē ‘eku tohi atu ‘i he potu ni‘ihi, ko si‘eku fakamanatu kimoutolu; pea na‘a ku fai foki koe‘uhi ko e kelesi ne tuku mai he ‘Otua. 16Ke u hoko ko e faifekau ‘a Kalaisi Sīsū ki he Senitaile; ‘o u ngāue ‘i he Kōsipeli ‘a e ‘Otua ‘o hangē ko ha taula‘eiki, koe‘uhi ke hoko ‘a e ‘oatu ‘o e Senitaile ko e feilaulau te ne hōifua ai, hono fakamā‘oni‘oni‘i ‘e he Laumālie Mā‘oni‘oni. 17Ko ia, ‘oku ou lava ke pōlepole ‘ia Kalaisi Sīsū ‘i he ngaahi me‘a ‘oku kau ki he ‘Otua. 18Seuke, tala‘ehai te u kākunga ke lea ki ha me‘a ‘a ia na‘e ‘ikai ngāue‘aki au ‘e Kalaisi ‘i hono lava, ‘i he‘ene fakatalangofua ‘a e Senitaile: 19ka teu lea pē ki he me‘a kuo ne fai‘aki au ki ai, ‘i he lea mo e ngāue, ‘o tu‘u ‘i he ivi ‘o e ngaahi mana, mo e ngaahi me‘a fakaofo, pea ‘i he ivi ‘o e Laumālie Mā‘oni‘oni; ko ia, kuo ‘osiki ‘a e Kōsipeli ‘o Kalaisi mei Selusalema mo e feitu‘u ko ia, ‘o a‘u ki ‘Ililikumi. 20Ka na‘e pehē ‘eku fai; na‘a ku tokanga ke ‘oua na‘a ku malanga‘aki ‘a e Kōsipeli ‘i he ngaahi potu kuo hu‘ekina ai ‘a e huafa ‘o Kalaisi, telia na‘a ku langa ‘i ha tu‘unga kuo ‘ai ‘e ha taha kehe. 21Ka na‘a ku tokanga ke fai ‘o hangē ko e me‘a ‘i he folofola,#‘Ais 52.15 (LXX)
Ko kinautolu na‘e ‘ikai te nau ma‘u ha ongoongo kiate ia
Te nau sio;
Ko kinautolu kuo te‘eki ke nau fanongo kiate ia
Te nau ‘ilo.
Ko e Fie ‘A‘ahi ‘a Paula ki Loma
22Ko ia ai, foki, na‘e fa‘a ta‘ofi ai ‘eku ‘alu atu kiate kimoutolu.#Lom 1.13 23Ka ‘i he taimi ni ‘oku ‘ikai kei toe haku feitu‘u ‘i he ngaahi potu ko eni; pea kuo lahi ta‘u mo ‘eku holi ke ‘a‘ahi kiate kimoutolu ‘i he fai ‘o ha‘aku fononga ki Sēpeni: 24he ‘oku ou ‘amanaki ke fe‘iloaki mo kimoutolu ‘i he‘eku ‘asi atu, pea ke ai haku moimoi‘i meiate kimoutolu ki he potu ko ia, ‘oka hili ‘eku ma‘u si‘a fiemālie meiate kimoutolu. 25Ka ko ‘eku ‘alu ‘eni ki Selusalema, ko ‘eku ‘ave tokoni ki he kakai lotu.#1 Kol 16.1-4 26He kuo hā lelei ki Masitōnia mo ‘Akeia ke fai ha tānaki tokoni ma‘a e kau lotu ‘i Selusalema ‘oku masiva. 27‘Io, kuo hā lelei kiate kinautolu; kae‘uma‘ā ‘oku nau mo‘ua ki he fa‘ahinga ko ia. He kapau kuo ‘inasi ‘a Senitaile ‘i he me‘a fakalaumālie ‘o e fa‘ahinga ko ia, pea ‘oku nau mo‘ua ai ke fai ha fatongia kiate kinautolu ‘i he me‘a fakasino.#1 Kol 9.11 28Pea ko ia, ka ‘osi ‘eku fai ia, mo ‘eku sila‘i ‘a e fua ni kiate kinautolu, pea te u foki ‘o ‘alu atu ‘iate kimoutolu ki Sēpeni. 29Pea ‘oku ou ongona, ka u ka ‘alu atu, te u ‘alu atu kuo ‘iate au hono kātoa ‘o e tāpuaki faka-Kalaisi.
30Pea ko eni, ‘oku ou kole atu, kāinga, ‘i hotau ‘Eiki ko Sīsū Kalaisi, pea ‘i he ‘ofa ‘oku mei he Laumālie, ke mou kau mo au ‘i ho‘omou ngaahi lotu, ‘i he fefa‘uhi mo e ‘Otua ‘i hoku hūfia. 31Koe‘uhi ke u hao meiate kinautolu ‘i Siutea ‘oku talangata‘a; pea ke tali lelei ‘e he kau lotu ‘a ‘eku ngāue ni ‘oku ‘ave ki Selusalema. 32Koe‘uhi ke u hoko fiefia atu kiate kimoutolu, ‘oka finangalo ki ai ‘a e ‘Otua, ‘o tau fefakafiemālie‘aki. 33Pea ko e ‘Otua ‘oku ‘a ‘Ene ‘Afio ‘a e fakamelino, ‘ofa ke ne ‘iate kimoutolu fuli pē! ‘Ēmeni.
Currently Selected:
Loma 15: TMB
Highlight
Share
Compare
Copy
Want to have your highlights saved across all your devices? Sign up or sign in
Tongan Moulton Bible © Bible Society of the South Pacific, 2011.
