Loma 14
14
‘Oua ‘e Fakatonutonu‘i Ho Kāingá
1PEA ko eni, ka ai ha taha ‘oku tui vaivai, mou fakakaukau mai pē; tapu ‘a e anga‘i ‘o ‘ene ngaahi fakakaukau.#Kol 2.16 2‘Oku mālohi ‘a e tui ‘a ha taha ke kai ‘a e me‘a kotoa pē: ka ko si‘i vaivai ‘oku kai hamu pē. 3Ko ia ‘oku ne kai noa pē, ke ‘oua te ne fakasīkaka‘i ‘a si‘i kai faka‘ehi‘ehi; pea ko si‘i kai faka‘ehi‘ehi, ke ‘oua te ne anga‘i ‘a ia ‘oku kai noa pē: he kuo fakakau mai pē ‘e he ‘Otua. 4Ko hai tū koe ke ke anga‘i ‘a e tamaio‘eiki ‘a ha taha kehe? ‘Oku ‘i he‘ene ‘eiki ‘a‘ana ha‘ane tu‘u pe hinga. ‘Ā, te ne tu‘u pē; he ‘oku mafai ‘e he‘ene ‘Eiki ke poupou ia.
5Ko Me‘a, ‘oku mamafa kiate ia ha ‘aho ‘e taha ‘i he ‘aho ‘e taha: ka ko Me‘a, ‘oku tatau kiate ia ‘a e ‘aho kotoa pē, ‘Ē, ke takitaha ‘ai ke pau ‘ene fakakaukau ‘a‘ana. 6Ko ia ‘oku ne tokanga‘i ‘a e ‘aho, ‘oku ne tokanga ki ai koe‘uhi ko e ‘Eiki; pea ko ia ‘oku ne kai noa pē, ‘oku ne kai koe‘uhi ko e ‘Eiki, he ‘oku ne fai ai ‘a e fakafeta‘i ki he ‘Otua: pea ko ia ‘oku ne kai faka‘ehi‘ehi, ‘oku ne kai pehē koe‘uhi ko e ‘Eiki, ‘o ne fai pē ‘ene fakafeta‘i ki he ‘Otua. 7He tala‘ehai ‘oku ‘i ai hatau toko taha ‘oku mo‘ui ma‘ana; pea tala‘ehai ‘oku ‘i ai hatau toko taha ‘oku pekia ma‘ana pē. 8He kapau ‘oku tau mo‘ui, ‘oku tau mo‘ui ma‘a e ‘Eiki; pea kapau ‘oku tau pekia, ‘oku tau pekia ma‘a e ‘Eiki: ko ia, pe ‘oku tau mo‘ui, pe ‘oku tau pekia, ko e me‘a ‘a e ‘Eiki pē ‘a kitautolu. 9Seuke, ko e me‘a ko ia na‘e pekia ki ai ‘a Kalaisi, mo toe mo‘ui, koe‘uhiā ke ne ‘Eiki ki he pekia mo e mo‘ui fakatou‘osi. 10Pea ko koe na, ko e hā ‘oku ke anga‘i ai ho tokoua na? ‘Io, mo koe na, ko e hā ‘oku ke ta‘etoka‘i ai ho tokoua na? he te tau hopo kotoa pē ‘i he fakamāu‘anga ‘o e ‘Otua.#2 Kol 5.10 11He kuo tohi, Kuo folofola ‘a e ‘Eiki,#‘Ais 45.23 (LXX) Tangi ‘eku mo‘ui! ko e tui kotoa pē ‘e tū‘ulutui kiate au, pea ko e ‘elelo kotoa pē te ne fai ‘ene vete ki he ‘Otua. 12‘Āua, pea tā te tau takitaha fai ha fakamatala ki he ‘Otua ma‘ata.
‘Oua ‘e ‘Ai ke Faingata‘a‘ia ha Taha
13Pea kapau ko ia, pea ‘oua na‘a tau toe fefakaanga‘aki; ka ko eni pē e me‘a ke mou fifili ki ai mu‘a, ke ‘oua te mou ‘ai ha tūkia‘anga, pe ha tauhele, ke mo‘ua ai ho tokoua. 14‘Oku ou ongona mo mātu‘aki tui, he‘ete tu‘u ‘i he ‘Eiki ko Sīsū, ‘oku ‘ikai ha me‘a ‘e taha ‘oku tapu ‘iate ia pē. Ka ko eni pē, ‘ilonga ‘a ia ‘oku lau ‘oku tapu ha me‘a, pea ‘oku tapu leva ia ki he toko taha ko ia. 15Seuke, kapau ko ha me‘akai pē ia ‘oku mamahi ai ho tokoua na, tā ‘oka ‘ikai te ke kei fou ‘i he ‘ofa. ‘Oua te ke maumau ‘aki ho‘o kai, si‘i toko taha ko ia ne pekia ki ai ‘a Kalaisi. 16Ko ia, ‘oua na‘a tuku ke lau‘ikovia ‘a ho‘omou lelei na: 17he ko e Pule‘anga ‘o e ‘Otua ‘oku ‘ikai ko ha kai mo ha inu, ka ko e mā‘oni‘oni mo e melino mo e fiefia, ‘i he Laumālie Mā‘oni‘oni. 18He ko ia ‘oku ne fai‘aki ia ‘ene tauhi kia Kalaisi, ‘oku hōifua ai ‘a e ‘Otua, pea ma‘a‘ia ai ‘a e kakai.
19‘Āua, pea kapau ko ia, pea tau nofo#14.19 ‘Āua… nofo; ‘Oku pehē ‘i hono ngaahi hiki fuoloa ‘e ni‘ihi: Ko ia, ‘oku tau nofo ai. ki he ngaahi me‘a ‘oku kau ke fakamelino, mo e ngaahi me‘a ‘oku kau ki he‘etau fefai‘aki hotau langa hake. 20‘Oua pē te ke holoki ‘a e ngāue ‘a e ‘Otua koe‘uhi pē ko ha me‘akai. ‘Oku ngofua ‘a e me‘a kotoa pē, ka ‘oku kovi pē ki he tangata ‘oku ne kai mo tūkia. 21Ko hono lelei ke ‘oua na‘a ke kai kakano, pe inu uaine, pe ko e hā fua ha me‘a ‘oku tūkia ai ho tokoua. 22Pea ko e me‘a kiate koe mo e tui kuo ke a‘usia, fai‘aki ia fakaekoe pē, ‘i ho‘omo feangai mo e ‘Otua. Ha monū‘ia ā ka ko ia ‘oku ‘ikai ke tāla‘a hono loto ‘i he fai ‘o e me‘a kuo ne tuku ‘oku totonu. 23Ka ko ia ‘oku ne kei tāla‘a ‘i ha me‘a, kapau te ne hanga ‘o kai ia, kuo halaia leva, koe‘uhi na‘e ‘ikai tefito ki he tui ‘ene fai: ‘Io, ‘ilonga ha me‘a ‘oku ‘ikai fai mei he tui ko e angahala ia.
Currently Selected:
Loma 14: TMB
Highlight
Share
Compare
Copy
Want to have your highlights saved across all your devices? Sign up or sign in
Tongan Moulton Bible © Bible Society of the South Pacific, 2011.
