Loma 12
12
Ko e Mo‘ui Fo‘oú
1KO ia, ‘oku ou enginaki atu, kāinga, ‘i he funga ‘o e ngaahi fai manava‘ofa ‘a e ‘Otua, ke mou ‘atu ‘a e ngaahi sino ‘omoutolu ko e feilaulau, ke mo‘ui, ke tapu ki he ‘Otua, ke fakahōifua kiate ia–ko e fakaloto ē ‘o ho‘omou fai e lotu. 2Pea ke ‘oua na‘a mou tuku ke fakaangatatau kimoutolu ki he maama ko eni; kae tuku ke fai ai pē homou liliu, he fakafo‘ou ‘o homou ‘atamai, ke mou sivi ‘o ‘ilo pe ko e hā ‘a e finangalo ‘o e ‘Otua, ‘a e me‘a ‘oku lelei, ‘a e me‘a te ne hōifua ai, ‘a e me‘a ‘oku haohaoa.
3He ko ‘eku lea ‘eni kiate kimoutolu tāutaha, ‘o u fai ‘i he funga ‘o e kelesi kuo tuku mai, ke ‘oua na‘a hulu atu ‘ene fakakaukau kiate ia ‘i he me‘a ‘oku totonu: ka ke hu‘u hono loto ki he fakakaukau ‘oku ngali poto; ko hono fuofua ko e mafai fakalotu kuo vahe ‘e he ‘Otua ma‘a e tangata takitaha. 4He hangē tofu pē ‘oku tau ma‘u ha kupu lahi ‘i ha fo‘i sino, ka ‘oku ‘ikai ke faiva taha ‘a e kupu kotoa pē:#1 Kol 12.12 5pehē, ko kitautolu tokolahi, ko e fo‘i sino ‘ia Kalaisi, ka ‘i he lau fakafo‘ime‘a, ko e ngaahi kupu ‘oku fekau‘aki. 6Pea ko eni, ‘i he‘etau ma‘u ‘a e ngaahi mafai fakalaumālie, ‘a ia ‘oku faikehekehe ‘o fakatatau ki he kelesi ‘oku foaki mai, ko ia, kapau ko e malanga-palofisai ia, pea tau fai ke hoa mo ‘etau tui;#1 Kol 12.4-11 7kapau ko e lakanga tauhi, tau nofo pē ‘i he‘etau lakanga tauhi; ko ia ‘oku ne fai ako, ke ne nofo pē ‘i he‘ene fai ako; 8pea ko ia ‘oku fai enginaki, ke ne nofo pē ki he‘ene enginaki; ko ia ‘oku ne fai ‘a e foaki, ke ne fai ‘ata‘atā; ko ia ‘oku takimu‘a ke ne nima mo e va‘e; ko ia ‘oku ne fai manava‘ofa, ke ne vēkeveke fai.
9Ke ta‘eloi ho‘omou ‘ofa. Fehi‘a‘ia ki he kovi; pīkitai ki he lelei. 10‘I ho‘omou ‘ofa ki he kāinga lotu, fai ‘o hangē ko ha kāinga mo‘oni; ‘i he faka‘apa‘apa mou tāimu‘a kimoutolu; 11‘i he mamahi‘i ‘o e Ngāue, ‘oua te mou fakapikopiko; ‘i homou laumālie, mou loto māfana; ‘i he fai ki he ‘Eiki, mou tauhi fakatamaio‘eiki ki ai; 12‘i he fai ‘o ho‘omou ‘amanaki, mou fiefia; ‘i he fai homou fakamamahi, mou kātaki pē; ‘i he hūfia, mou faka‘utumauku hono fai, 13‘i he fa‘a masiva ‘a e kau lotu, mou kau ai: nofo ki he fakaafe ‘āunofo.
14Tāpuaki‘i ‘a kinautolu ‘oku fakatanga‘i kimoutolu; ‘io, mou tāpuaki‘i pē, ‘o ‘oua ‘e tutuku‘i.#Māt 5.44; Luk 6.28 15Fiefia mo kinautolu ‘oku fiefia; tangi mo kinautolu ‘oku tangi. 16Ke fakatangata tatau ho‘omou fetokanga‘aki. ‘Oua na‘a hu‘u ho‘omou tokanga ki he ngaahi me‘a mā‘olunga, kae tuku kimoutolu ke ‘auhia mo mā‘ulalo.#12.16 kae tuku… mā‘ulalo (ka mou fie fakamaheningofua ki he kakai ‘oku ‘ikai hanau tu‘unga mā‘olunga he nofó); pe ka mou tali fiemālie ha ngaahi fatongia ‘oku ‘ikai lāngilangi‘ia. ‘Oua te mou hoko ko e kau poto fakaekimoutolu.#Pal 3.7
17Neongo pe ko hai, ‘oua te mou totongi ‘ene kovi ‘aki ‘a e kovi. Mou tomu‘a fakakaukau‘i ho‘omou ngaahi me‘a ke hā lelei ki he kakai fuli pē. 18Mou nofo melino pē mo e kakai kotoa pē, ‘o kapau ‘e ala lava: kehe pē ke ‘ata‘atā meiate kimoutolu. 19Si‘oku ‘ofa‘anga, ‘oua te mou sauni ho‘omou ngaahi me‘a, kae tuku ia ki he Houhau: he kuo tohi, ‘Oku ‘a‘aku ‘a e sauni; ko au te u ‘atu hono tuha–ko e folofola ē ‘a e ‘Eiki.#Teu 32.35 20Ka ko koe, kapau ‘oku fiekaia ho fili ke ke fafanga ia; kapau ‘oku ne fie inua, ‘ange hano inu: he ko ho‘o fai pehē te ke fokotu‘u ai ‘a e ngaahi malala‘i afi ki hono ‘ulu.#Pal 25.21-22 (LXX) 21‘Ē, ‘oua na‘a tuku ke ikuna koe ‘e he kovi, ka ke ikuna ‘a e kovi ‘aki ‘a e lelei.
Currently Selected:
Loma 12: TMB
Highlight
Share
Compare
Copy
Want to have your highlights saved across all your devices? Sign up or sign in
Tongan Moulton Bible © Bible Society of the South Pacific, 2011.
