Loma 10
10
1KĀINGA, ko e feinga ‘a hoku loto, pea ko ‘eku kole ki he ‘Otua ‘i he fa‘ahinga ko ia, ke nau mo‘ui. 2He ‘oku ou fakamo‘oni pē, ‘oku ‘i ai ha‘anau mamahi‘i ‘a e ‘Otua, ka ‘oku ‘ikai fou ‘i he ‘ilo totonu. 3He ko e me‘a ‘i he ‘ikai te nau ‘ilo ki he mā‘oni‘oni ‘oku mei he ‘Otua, ka nau feinga pē ke tu‘u ‘a e mā‘oni‘oni fakaekinautolu, ko ia na‘e ‘ikai ai te nau fakavaivai ki he mā‘oni‘oni ‘oku mei he ‘Otua. 4He ko Kalaisi ko e fakangata ia ‘o e lao, kae mā‘oni‘oni ‘a e tangata kotoa pē ‘oku tui.
Ko e ‘Atā ‘a e Mo‘uí ki ha Taha Pē
5He ‘oku tohi ‘e Mōsese, Ko e me‘a ki he mā‘oni‘oni ‘oku mei he Lao, ko e tangata kuo fai ia te ne mo‘ui ai.#Lev 18.5 6Ka ko eni ‘a e lau ‘a e mā‘oni‘oni ‘oku mei he tui, ‘Oua te ke pehē ‘i ho loto, Ko hai tū ‘e ‘alu hake ki he langi? ‘A ia ko e pehē ke ‘ohifo ‘a Kalaisi:#Teu 30.12-14 7pe, Ko hai tū te ne ‘alu hifo ki lolofonua? ‘A ia ko e pehē ke ‘ohake ‘a Kalaisi mei he pekia. 8Ka ko e hā ‘ene tala? ‘A ‘eni, ‘Oku ofi pē kiate koe ‘a e folofola, ‘oku ‘i ho ngutu, pea ‘i ho loto; ‘a ia ko e pehē ko e folofola tui ‘oku mau fanongonongo. 9Koe‘uhi, kapau te ke fakahā ‘aki ho ngutu, ko e ‘Eiki ‘a Sīsū, pea ke tui ‘aki ho loto kuo fokotu‘u ia ‘e he ‘Otua mei he pekia, ‘e fakamo‘ui koe. 10He ‘oku fai ‘a e tui ‘aki ‘a e loto ke ma‘u ‘a e fakatonuhia, ka ‘oku fai ‘a e fakahā ‘aki ‘a e ngutu ke ma‘u ‘a e fakamo‘ui. 11He ‘oku pehē ‘e he Tohi, ‘ilonga pē ‘a ia ‘e tui kiate ia, ‘e ‘ikai fakamaa‘i ia.#‘Ais 28.16 (LXX) 12He ‘oku ‘ikai ha fai kehekehe ki he Siu mo e Kalisi: he ‘oku taha ai pē ‘a e ‘Eiki ‘o e kakai kotoa pē, pea mohu me‘a ma‘a e kakai kotoa pē ‘oku tautapa kiate ia. 13He ‘ilonga ‘a ia ‘e tautapa ki he huafa ‘o e ‘Eiki ‘e fakamo‘ui.#Sioelí 2.32
14Ka te nau lava fēfē ke tautapa ki ha toko taha ‘oku te‘eki ke nau tui ki ai? Pea te nau lava fēfē ke tui ki ha toko taha kuo te‘eki ke nau fanongo ki ai? pea fēfē ha‘anau fanongo ‘oka ‘ikai ha taha ke malanga? 15Pea malanga fēfē ha ni‘ihi ‘o kapau ‘e ‘ikai fekau atu kinautolu? ‘o hangē ko ia kuo tohi, Hono ‘ikai faka‘ofo‘ofa si‘i va‘e ‘o e kakai ‘oku ongoongo mai ha ngaahi me‘a lelei!#‘Ais 52.7 16Kae tala‘ehai na‘e tuitala kotoa pē ki he ongoongolelei ko ia. He ‘oku pehē ‘e ‘Aisea, ‘Eiki, ko hai kuo ne tui ki he ongoongo kuo ne fanongo ai meiate kimautolu?#‘Ais 53.1 (LXX) 17Tā ‘oku tupu ‘a e tui mei he fanongo, pea ‘oku fai ‘a e fanongo ko e ‘i ai ha folofola ‘a Kalaisi.
18‘Oua koā.
Na‘a kuo ‘ikai te nau fanongoa,
‘Isa, kuo ongo atu honau le‘o ki he fonua kotoa:#Saame 19.4 (LXX)
Mo ‘enau ngaahi lea ki he ngata‘anga ‘o māmani.
19‘Oua koā. Na‘a kuo ‘ikai lave‘i ‘e ‘Isileli ‘a e me‘a ko ia.
‘Ā, ‘oku lea leva ‘a Mōsese ki ai, ‘o pehē,#Teu 32.21
Te u fakafua‘a‘i kimoutolu ‘aki ha ‘ata‘i kakai;
Te u fakatupu ho‘omou ‘ita ‘aki ha kakai ta‘e‘atamai.
20Pea ‘oku mātu‘aki lea ‘asi ‘a ‘Aisea, he‘ene pehē,#‘Ais 65.1 (LXX)
Kuo ‘iloa au ‘e kinautolu na‘e ‘ikai kumi mai;
Kuo u e‘a ki ha kakai na‘e ‘ikai ‘eke mai.
21Ka ‘i he‘ene lau ki ha‘a ‘Isileli ‘oku ne pehē,
‘Oku ‘osi atu e ‘aho mo e ta‘alo hoku nima ni
Ki ha kakai talangata‘a mo fakafisi mai.#‘Ais 65.2 (LXX)
Currently Selected:
Loma 10: TMB
Highlight
Share
Compare
Copy
Want to have your highlights saved across all your devices? Sign up or sign in
Tongan Moulton Bible © Bible Society of the South Pacific, 2011.
