Loma Ko e Talateu
Ko e Talateu
Ko e Tohi ‘a Paula ki he Kakai Lomá na‘e hiki ia ko hono teuteu ‘e Paula ‘ene ‘a‘ahi ki he Siasi ‘i Lomá. Ko ‘ene taumu‘á ke ki‘i ngāue fuonounou mo e kau Kalisitiane ‘i aí, pea toki hoko atu ai ki Sipeini ‘i ha‘anau tokoni kiate ia. Ko ‘ene tohi kiate kinautolú ke fakamahino ‘a e anga ‘o ‘ene fakakaukau ki he lotu faka-Kalisitiané pea mo hono ngāue‘i ‘i he mo‘ui ‘a e kau Kalisitiané. ‘Oku hā ‘i he tohí ni ‘a e fakamatala kakato taha ‘a Paula ki he‘ene tuí.
‘Oku kamata‘aki ‘a e tohí ‘a ‘ene fakafe‘iloaki ki he kakai ‘o e Siasi ‘i Lomá mo ‘ene fakahā ange ‘ene fa‘a hūfia kinautolu, peá ne hoko atu ai ki he‘ene fokotu‘u ‘a e kaveinga ‘o ‘ene tohí: “He ‘oku fakae‘a… ha mā‘oni‘oni mei he ‘Otuá, ‘oku kamata mei he tui, pea iku ki he tui.” (Vahe 1.17)
Pea toki fakahoko fakakongokonga leva ‘e Paula ‘a e kaveinga ko iá. Ko e fa‘ahinga kotoa pē ‘o e tangatá, ‘a e kakai Siú pea mo e Senitailé, kuo pau ke fakalelei kinautolu mo e ‘Otuá, he ‘oku nau mo‘ulaloa tatau kotoa ki he angahalá. ‘Oku fakalelei kotoa mo e ‘Otuá ‘aki ‘enau tui kia Sīsū Kalaisi. ‘Oku hoko atu ai ‘a e fakamatala ‘a Paulá ki he mo‘ui fo‘ou ‘oku ma‘u ‘i he feohi mo Kalaisi, ‘a ia ‘oku tupu mei he feangainga fo‘ou ko ‘eni mo e ‘Otuá. ‘Oku ma‘u ‘e he tokotaha tuí ‘a e melino mo e ‘Otuá pea ‘oku vete ange ia ‘e he Laumālie ‘o e ‘Otuá mei he pule ‘a e angahalá mo e maté. ‘I he vahe 5-8 ‘oku fakamatala ai ‘a Paula ki he ‘aonga ‘o e Lao ‘a Mōsesé mo e ivi ‘o e Laumālie Mā‘oni‘oní ‘i he mo‘ui ‘a e tokotaha ‘oku tui. ‘Oku hoko atu ai ‘a e fakamatala ‘a Paulá ki he‘ene feinga ke tali ‘a e fehu‘i fihi pe ko e hā ‘a e takitaha tu‘unga ‘o e kakai Siú mo e kakai Senitailé ‘i he fokotu‘utu‘u ‘a e ‘Otuá ki he fa‘ahinga ‘o e tangatá. ‘Okú ne fakamā‘opo‘opo ‘aki ‘ene fakamatalá ‘a ‘ene pehē ko hono fakasītu‘a‘i ‘e he kakai Siú ‘a Sīsuú ko e konga ia ‘o e fokotu‘utu‘u ‘a ‘Otuá ke tānaki kotoa mai ‘a e fa‘ahinga ‘o e tangatá ko hono fakaa‘u atu kiate kinautolu ‘a e Kelesi ‘a e ‘Otuá ‘ia Sīsū, pea ko ‘ene tuí ‘e ‘ikai fakasītu‘a‘i ‘e he kakai Siú ‘a Sīsū ‘o ta‘engata. Ko e konga faka‘osi ‘o e tohi ‘a Paulá ko ‘ene fakamatala ki he tonu ‘o hono mo‘ui ‘aki e tui faka-Kalisitiané, pea tautefito ki he tu‘unga ‘o e ‘ofá ‘i he fetu‘utaki mo e kakai kehe. ‘Okú ne lave ai ki he ngaahi kaveinga ‘o hangē ko e faifatongia ma‘á e ‘Otuá, mo e fatongia ‘o e Kalisitiané ki he pule‘angá mo e kakai kehe, pea mo e tu‘unga ‘o e konisēnisí ‘i he mo‘ui faka-Kalisitiané. ‘Okú ne tātuku ‘aki ‘ene tohí ha ngaahi pōpoaki ‘ofa mo ha fakamālō ki he ‘Otuá.
Ko e Kakano ‘o e Tohí
Ko e talateu mo e kaveinga (1.1-17)
Ko e pau ke fakalelei ‘a e tangatá mo e ‘Otuá (3.21-4.25)
Ko e anga ‘o e fai fakamo‘ui ‘a e ‘Otuá (3.21-4.25)
Ko e mo‘ui fo‘ou ‘ia Kalaisi (5.1–8.39)
Ko e tu‘unga ‘o ‘Isileli ‘i he fokotu‘utu‘u ‘a e ‘Otuá (9.1–11.36)
Ko e ‘ulungāanga faka-Kalisitiané (12.1–15.13)
Ko e tātuku mo e ngaahi pōpoaki ‘ofa ‘a Paula (15.14–16.27)
Currently Selected:
Loma Ko e Talateu: TMB
Highlight
Share
Compare
Copy
Want to have your highlights saved across all your devices? Sign up or sign in
Tongan Moulton Bible © Bible Society of the South Pacific, 2011.