KO E ME‘A FAKAHĀ 7

Ko e toko 144,000 kuo Faka‘ilonga‘i ma‘á e ‘Otuá

1HILI ‘a e me‘a ko ia, na‘a ku vakai ha ‘āngelo ‘e to ko fā, na‘a nau ‘alu ‘o tu‘u ‘i he tuliki ‘e fā ‘o māmani, ‘o nau puke ‘a e matangi ‘e fā ‘o māmani, ke ‘oua na‘a angi ha matangi ki he fonua, pe ki he tahi, pe ki he ‘akau.#Sel 49.36; Tān 7.2; Sāk 6.5 2Pea na‘a ku vakai ‘a e ‘āngelo ‘e taha ‘oku ne ‘alu hake mei he hopo‘anga la‘ā, ‘oku ‘iate ia ‘a e sila ‘a e ‘Otua Mo‘ui: pea na‘a ne kalanga le‘o lahi ki he ‘āngelo ‘e to ko fā, ‘a ia kuo tuku kiate kinautolu ke maumau‘i ‘a e fonua mo e tahi, 3‘o ne pehē, ‘Oua te mou momo‘i maumau‘i ‘a e fonua, pe ko e tahi, pe ko e ngaahi ‘akau, kae‘oua ke ‘osi ‘emau sila‘i ‘a e kau tamaio‘eiki ‘a hotau ‘Otua ‘i honau la‘e.#‘Isi 9.4,6 4Pea u fanongo ki he lau ‘o e kakai na‘e sila‘i, ko e to ko taha kilu mā to ko fā mano mā to ko fā afe na‘e sila‘i mei he matakali fuli pē ‘o ha‘a ‘Isileli,

5Ne sila meia Siuta ha to ko taha mano mā to ko ua afe,

Meia Lūpeni, ha to ko taha mano mā to ko ua afe,

Meia Kata, ha to ko taha mano mā to ko ua afe,

6Meia ‘Āseli, ha to ko taha mano mā to ko ua afe,

Meia Nafitalai, ha to ko taha mano mā to ko ua afe,

Meia Manase, ha to ko taha mano mā toka ua afe,

7Meia Simione, ha to ko taha mano mā to ko ua afe,

Meia Līvai, ha to ko taha mano mā to ko ua afe,

Meia ‘Īsaka, ha to ko taha mano mā to ko ua afe,

8Meia Sepulone, ha to ko taha mano mā to ko ua afe,

Meia Siosifa, ha to ko taha mano mā to ko ua afe,

Ne sila‘i meia Penisimani ha to ko taha mano mā to ko ua afe.

Ko e Kakai Ta‘efa‘alaua mei he Fonua Kotoa pē.

9Hili ia na‘a ku vakai, pea tā ko e fu‘u kakai lahi, ‘a ia ‘e ‘ikai lava ‘e ha taha hono lau, ko ha kakai mei he pule‘anga kotoa pē, mo e ngaahi matakali, mo e ngaahi fa‘ahinga, mo e ngaahi lea, na‘a nau tutu‘u ‘i he ‘ao ‘o e taloni pea ‘i he ‘ao ‘o e Lami, kuo nau kofu ‘aki ‘a e ngaahi kofu hinehina tōtōlofa, pea ‘oku nau to‘o ‘a e ngaahi va‘a paame; 10pea na‘a nau kalanga le‘o lahi, ‘o pehē,

Ko hotau fakamo‘ui

‘Oku mei hotau ‘Otua,

‘A ia ‘oku ‘afio ‘i he taloni,

Pea mei he Lami.

11Pea ko e kau ‘āngelo kotoa pē na‘a nau tu‘u takatakai ki he taloni, pea ki he kau mātu‘a, pea ki he me‘a mo‘ui ‘e fā; pea ne nau tō fo‘ohifo leva ‘i he ‘ao ‘o e taloni, pea nau hū ki he ‘Otua, ‘o pehē,

12‘Ēmeni:

Ko e tāpuaki, mo e kolōlia, mo e poto,

Mo e fakafeta‘i, mo e faka‘apa‘apa,

Mo e mafai, mo e mālohi,

‘E lau ia ki hotau ‘Otua,

‘O lauikuonga pea ta‘engata.

‘Ēmeni.

13Pea na‘e tali ‘e ha taha ‘o e kau mātu‘a, ‘o ne pehē mai, Ko hai ‘a kinautolu na ‘oku kofu hinehina? pea ko ‘enau ha‘u mei fē?

14Pea u pehē kiate ia, ‘Eku ‘Eiki, ko koe pē ‘oku mea‘i. Pea ne me‘a mai, Ko eni ia ‘a kinautolu ‘oku ha‘u mei he mamahi lahi, pea na‘a nau fō honau kofu, ‘o fakahinehina ‘i he ta‘ata‘a ‘o e Lami.#Tān 12.1; Māt 24.21; Ma‘ake 13.19

15Ko hono ‘uhinga ia ‘oku nau ‘i he ‘ao ‘o e taloni ‘o e ‘Otua, pea ‘oku nau tauhi kiate ia ‘i hono temipale ‘i he ‘aho mo e pō: pea ko Ia ‘oku ne ‘afio ‘i he taloni te ne folahi ‘a e Tāpanekale ‘o hono Sikaina ‘iate kinautolu. 16‘E ‘ikai te nau toe fiekaia, ‘uma‘ā ha‘anau toe fieinua, ‘uma‘ā ha momo‘i lave kiate kinautolu ‘a e la‘ā, pe ko e ngaahi me‘a fakavelehia.#‘Ais 49.10 17He ko e Lami ‘oku ‘i he loto taloni, te ne tauhi kinautolu ‘o hangē ha fanga sipi, pea te ne tataki kinautolu ki he ngaahi matavai ‘o e Vaiola: pea ‘e holoholo ‘e he ‘Otua ‘a e lo‘imata kotoa pē mei honau mata.#Saame 23.1; ‘Isi 34.23; Saame 23.2; ‘Ais 49.10; 25.8

Currently Selected:

KO E ME‘A FAKAHĀ 7: TMB

Highlight

Copy

Compare