KO E ME‘A FAKAHĀ 2
2
Ko e Tohi ki ‘Efesō
1TOHI ki he ‘āngelo ‘o e siasi ‘i ‘Efesō, ‘o pehē;
Ko eni ‘a e folofola ‘a e To ko Taha ‘a ia ‘oku ne kuku ‘a e fetu‘u ‘e fitu ‘i hono nima to‘omata‘u, ‘a ia ‘oku ne hā‘ele ‘i he lotolotonga ‘o e tu‘unga maama koula ‘e fitu.
2‘Oku ou ‘ilo pē ho‘o ngaahi ngāue, ‘a ho‘o fakaongosia, mo kātaki; mo e ‘ikai te ke makātaki‘i ‘a e kau kovi; mo ho‘o sivi ‘a kinautolu ‘oku taukave ko e ‘aposetolo ‘a kinautolu, ka ‘oku ‘ikai, ‘o ke ‘ilo tā ko e koto loi: 3pea ‘oku ke kei kātaki pē, pea kuo ke fua kavenga koe‘uhi ko hoku hingoa, ‘o ‘ikai te ke fiu. 4Ka neongo ia, ka ‘oku ai ha me‘a ‘oku ou kovi‘ia ai kiate koe; ko ho‘o hiki mei ho‘o ‘uluaki ‘ofa. 5Ko ia, ke ke fakamanatu ki he me‘a kuo ke hinga mei ai, pea fakatomala leva, ‘o fai ‘a e ngaahi ‘uluaki ngāue; ka ‘ikai, ko ‘eku ‘alu atu ‘eni kiate koe, pea te u hiki ho‘o tu‘unga maama mei hono potu, ‘o kapau ‘e ‘ikai te ke fakatomala. 6Ka ‘oku ‘i ai ho‘o me‘a ko eni, ‘a ho‘o fehi‘a‘ia ki he ngaahi ngāue ‘a e kau Nīkolaitani, ‘a ia ‘oku ou fehi‘a ki ai mo au.
7Ko ia ‘oku telinga, ke ne fakafanongo ki he me‘a ‘oku folofola‘aki ‘e he Laumālie ki he ngaahi siasi.#Sēn 2.9; Fkhā 22.2; ‘Isi 28.13; 31.8 (LXX)
Ko ia ia te ne ikuna, te u tuku kiate ia ke kai mei he ‘akau ‘o e mo‘ui, ‘a ia ‘oku tu‘u ‘i he Palataisi ‘o e ‘Otua.
Ko e Tohi ki Sīmana
8Pea tohi ki he ‘āngelo ‘o e siasi ‘i Sīmana, ‘o pehē;#‘Ais 44.6; 48.12; Fkhā 1.17; 22.13
Ko eni ‘a e folofola ‘a ‘Uluaki-mo-Kimui, ‘a e To ko Taha na‘a ne mate pea toe mo‘ui.
9‘Oku ou ‘ilo pē ho‘o mamahi‘ia, mo ho‘o masiva, (ka ‘oku ke koloa‘ia pē) pea ‘oku ou ‘ilo ‘a e laukovi ‘oku fai ‘e he fa‘ahinga ‘oku taukave ko e Siu kinautolu, ka ‘oku ‘ikai, ka ko e sinakoke ‘o Sētane. 10‘Oua te ke manavahē ki he ngaahi mamahi ‘oku ene ke ho ko kiate koe: ko eni ‘oku teu lī homou ni‘ihi ‘e he Tēvolo ki he pilīsone, ko homou ‘ahi‘ahi‘i; pea te mou mo‘ua ‘i he mamahi ‘o ‘aho hongofulu: ka ke pīkitai kiate au, ‘o a‘u ki he mate, pea te u ‘atu kiate koe ‘a e kalauni ‘o e mo‘ui.
11Ko ia ‘oku telinga, ke ne fakafanongo ki he ngaahi me‘a ‘oku folofola‘aki ‘e he Laumālie ki he ngaahi siasi;#Fkhā 20.14; 21.8 ko ia ia te ne ikuna, ‘e ‘ikai ‘aupito momo‘i lavea ia ‘i he Mate ‘Angaua.
Ko e Tohi ki Peakamosi
12Pea tohi ki he ‘āngelo ‘o e siasi ‘i Peakamosi, ‘o pehē;
Ko eni ‘a e folofola ‘a e To ko Taha ‘oku ‘iate ia ‘a e heletā fakatoumata ‘oku māsila.
13‘Oku ou ‘ilo pē ‘a e anga ‘o e potu ‘oku ke nofo ai, ‘a ia ‘oku tu‘u ai ‘a e taloni ‘o Sētane: pea ‘oku ou ‘ilo pē ‘oku ke kuku hoku hingoa, pea na‘e ‘ikai te ke fakaikai‘i ‘a e tui kiate au, ‘io, na‘a mo e ngaahi ‘aho ‘o ‘Anitipasa ko si‘eku mā‘ata, mo si‘oku mateaki, ‘a ia na‘e tāmate‘i ‘i homou lotolotonga–‘a e potu ‘oku nofo‘anga ai ‘a Sētane. 14Ka ‘oku ‘i ai ha me‘a ni‘ihi ‘oku ou kovi‘ia ai kiate koe, ko ho‘o ma‘u hena ‘a kinautolu ‘oku nau kuku ‘a e akonaki ‘a Pēlami, ‘a ia na‘a ne fale‘i ‘a Pēlaki ke ‘ai ha tūkia‘anga ‘i he ‘ao ‘o ha‘a ‘Isileli, ke nau kai me‘a kuo ‘oatu ki he ‘aitoli, pea ke nau fe‘auaki.#Nōm 22.5,7; 31.16; Teu 23.4; Nōm 25.1-3 15Pehē ‘oku ‘iate koe foki ‘a kinautolu ‘oku nau kuku ‘a e akonaki ‘a e kau Nīkolaitani, ‘a ia ‘oku hangē ko e fa‘ahinga ko ē. 16Ko ia, ke ke fei mo fakatomala; ka ‘ikai, ko ‘eku ‘alu atu leva kiate koe, pea te u tau‘i kinautolu ‘aki ‘a e heletā ‘e hoku ngutu.
17Ko ia ‘oku telinga, ke ne fakafanongo ki he me‘a ‘oku folofola‘aki ‘e he Laumālie ki he ngaahi siasi;#‘Eki 16.14-15; 16.33-34; Sioné 6.48-50; ‘Ais 62.2; 65.15
Ko ia ia te ne ikuna, te u ‘atu kiate ia ‘a e mana ne fufū, pea te u ‘atu kiate ia ha maka hinehina, pea mo ha hingoa fo‘ou kuo tohi ki he maka, ‘a ia ‘oku ‘ikai ke ‘ilo ki ai ‘e ha taha, ka ko ia pē ‘oku ne ma‘u.
Ko e Tohi ki Taiataila
18Pea tohi ki he ‘āngelo ‘o e siasi ‘i Taiataila ‘o pehē;
Ko eni ‘a e folofola ‘a e ‘Alo ‘o e ‘Otua, ‘a e To ko Taha ko ia ‘a ia ko hono ongo mata ‘oku hangē ha ulo‘i afi, pea ko hono va‘e ‘oku hangē ko ha palasa ‘afu hina.
19‘Oku ou ‘ilo pē ho‘o ngaahi ngāue, ‘a ho‘o ‘ofa, mo ho‘o tui, mo ho‘o tokoni, mo ho‘o kātaki, mo e lahi hake ho‘o ngāue ki mui ‘i ho‘o ngāue mu‘a. 20Ka neongo ia ka ‘oku ‘i ai ha me‘a ‘oku ou kovi‘ia ai kiate koe, ko ho‘o kātaki ‘a e fefine ko Sisipeli,#2.20 ‘Oku tu‘u he tohi ‘e ni‘ihi: ‘a ho uaifi ko Sisipelí. ‘a ia ‘oku ne taukave ko e palōfita ia, mo ne akonekina mo takihee‘i ‘eku kau tamaio‘eiki, ke nau fe‘auaki mo kai me‘a kuo ‘oatu ki he ‘aitoli.#1 Tu‘i 16.31; 2 Tu‘i 9.22,30 21Pea na‘a ku tuku hano taimi ke fakatomala; ka ‘oku ‘ikai te ne loto ke fakatomala ‘o tafoki mei he‘ene fe‘auaki. 22Vakai, te u lī ia ki ha mohenga, pea te u lī ‘a kinautolu ‘oku kau mo ia ‘i he fe‘auaki ki ha mamahi lahi, ‘o kapau ‘e ‘ikai te nau fakatomala ‘o tafoki mei he ngaahi ngāue ‘a‘ana. 23Pea te u tāmate‘i ‘ene fānau ‘aki ‘a e mahaki faka‘auha; pea ‘e ‘ilo ‘e he ngaahi siasi kotoa pē, ko au ia ‘oku hakule ‘a e ngaahi holi mo e loto: pea te u ‘atu kiate kimoutolu takitaha ‘o fakatatau ki ho‘omou ngāue.#Saame 7.9; Sel 17.10; Saame 62.12
24Ka ko ‘eku lea ki hono toe ‘o e kakai ‘o Taiataila, ‘a kimoutolu ‘oku ‘ata‘atā mei he akonaki ko eni, ‘a e fa‘ahinga kuo ‘ikai te nau ‘ilo ‘a e ngaahi loloto ‘o Sētane, ‘o hangē ko e lau ‘e kinautolu na; ko eni ‘oku ‘ikai te u hilifaki kiate kimoutolu mo ha kavenga. 25Ko eni pē, ko e me‘a ‘oku mou ma‘u, kuku pē kae‘oua ke u ‘alu atu. 26Pea ko ia ia te ne ikuna, pea te ne tauhi ‘eku ngāue ‘o a‘u ki he ngata‘anga, te u tuku kiate ia ‘a e pule ki he ngaahi kakai: 27pea te ne pule‘i kinautolu ‘aki ha sēpita ukamea; ‘o hangē ko e laiki ke lailai ‘a e ngaahi ipu ‘umea: ‘o hangē ko ia foki na‘a ku ma‘u ‘e au mei he‘eku Tamai. 28Pea te u tuku kiate ia ‘a e Fetu‘u Pongipongi.#Saame 2.8-9 (LXX)
29Ko ia ‘oku telinga, ke ne fakafanongo ki he me‘a ‘oku folofola‘aki ‘e he Laumālie ki he ngaahi Siasi.
Currently Selected:
KO E ME‘A FAKAHĀ 2: TMB
Highlight
Copy
Compare
Share
Want to have your highlights saved across all your devices? Sign up or sign in
Tongan Moulton Bible © Bible Society of the South Pacific, 2011.
