KO E SAAME 90
90
Ko e Saame he ‘Otuá mo e Tangatá
KO HONO FĀ ‘O E PUKA
(Saame 90–106)
(Ko e Lotu ‘a Mōsese, ko e tangata ‘o ‘Elohimi.)
1‘EI, ko koe ko homau nofo‘anga
‘i he to‘utangata mo e to‘utangata.
2Te‘eki fakatupu ‘a e ngaahi mo‘unga,
Pe fanau‘i ‘a māmani mo e fonua;
‘Io, talu mei mu‘a ‘o lauikuonga ko e ‘Otua pē ‘a e ‘Afiona.
3‘Oku ke fakafoki ki he efu ‘a e tangata me‘a vaivai,
Pea ke pehē, Hako ‘o ‘Ātama, foki mai.
4He ko e ta‘u ‘e afe ‘i ho‘o vakai
‘Oku hangē ko e ‘aneafi, ‘ene ‘osi,#2 Pit 3.8
Pe ha fo‘i uasi he po‘uli.
5‘Oku ke ‘ave kinautolu hangē ha vai fā;
‘Oku hangē ha mohe honau kotoa:
6Pongipongi ‘oku nau hangē ha muka‘i musie–
Pongipongi lanumata mo televave,
Efiafi tu‘usi hifo pea mae.
7He ko ho houhau ‘oku mau ‘osi ai,
Pea mau mo‘utāfu‘ua ‘i ho tuputāmaki:
8Kuo ke fokotu‘u ‘emau ngaahi hia ‘i ho ‘ao na,
Ko ‘emau ngaahi me‘a fufū ‘i he maama ‘o ho fofonga.
9He kuo pale homau ngaahi ‘aho kotoa pē ‘i ho houhau:
‘Oku mau faka‘osi homau ngaahi ta‘u ‘o hangē ha talanoa ‘oku lau.
10Ko e ngaahi ‘aho ‘o homau ta‘u
Ko e ta‘u ‘e fitungofulu;
Pea ka lahi hoto ngū,
‘E a‘u nai ki he valungofulu:
Pea ko hoto viki‘anga ko e ongosia mo e muna,
He ‘oku tu‘usi vave pea tau puna.
11Ko hai ‘oku ne ‘ilo‘i ho houhau hono mamafa,
Pe ko e lahi ‘o ho tuputāmaki, ‘o taau mo ho ngeia?
12Ako mai ke mau fakafuofua pehē homau ngaahi ‘aho,
Ka mau utu mai ha loto poto.
13Liliu, ‘Eiki–ko futu!
‘O lolou telia ho‘o kau tamaio‘eiki ko kimautolu.
14Fakamākona kimautolu kei pongipongi ‘aki ho‘o ‘alo‘ofa;
Ke mau mavava mo fiefia ‘i homau ngaahi ‘aho kotoa.
15‘Omi ha fiefia ke hoa mo e fuoloa
‘O homau fakavaivai‘i ‘e he ‘Afiona,
‘A e ngaahi ta‘u kuo mau feangainga ai mo e kovi na.
16Ke hā ho‘o ngāue ki ho‘o kau tamaio‘eiki,
Pea ki he‘enau fānau ho lāngilangi.
17‘Io, ke ‘iate kimautolu ‘a e faka‘ofo‘ofa ‘o e ‘Eiki ko homau ‘Otua,
Pea ‘ai ke tu‘u ma‘u ‘iate kimautolu ‘a e ngāue ‘a homau nima:
‘Io, ko e ngāue ‘a homau nima ke ke fokotu‘u ma‘u ia.
Currently Selected:
KO E SAAME 90: TMB
Highlight
Copy
Compare
Share
Want to have your highlights saved across all your devices? Sign up or sign in
Tongan Moulton Bible © Bible Society of the South Pacific, 2011.
