KO E SAAME 89
89
Ko e Himi ki ha Faingata‘a‘ia ‘o e Fonuá
(Ko e Hiva-ako ‘a ‘Ētani, ko e ha‘a Sala.)
1TE U hiva ‘aki ‘o ta‘engata ‘a e ngaahi ‘ofa ‘a e ‘Eiki:
Ko hoku ngutu ni ‘e faka‘ilo ki he to‘utangata mo e to‘utangata ‘ene fai mo‘oni.
2He ne u pehē, ‘E hangē ha langa fale ta‘engata ‘a e ‘ofa,
‘E hangē ko ha me‘a tu‘u ‘i he langi ho‘o tauhi lea.
3“Kuo u fai kovinānite mo ia Kuo u fili,
Kuo u fuakava kia Tēvita ko ‘eku tamaio‘eiki;
4Te u fokotu‘u ma‘u ho hako ‘o ta‘engata,#2 Sām 7.12-16; 1 Kal 17.11-14; Saame 132.11; Ngā 2.30
Pea te u fa‘u ho taloni ke laui to‘utangata.” (Sila)
5Pea ‘e fakamālō‘ia ‘e he langi ho‘o fakaofo, ‘Eiki:
‘E fakamālō‘ia foki ‘e he fakataha ‘a e fa‘ahinga tapu ho‘o fai mo‘oni.
6He ko hai ‘i he langi ‘oku tu‘u pau mo Sihova?
Ko hai ‘e ala fakatatau kia Sihova ‘i ha‘a ‘Otua?
7Ko e ‘Otua ia ‘oku fakangeingei lahi ‘i he ‘alofi ‘o ha‘a tapu,
Pea ko hono manavahē‘ia kiate kinautolu ‘oku tu‘u takai ‘oku mamalu fau.
8‘E Sihova ‘a e ‘Otua Sāpaoti,
Ko hai ‘oku tatau mo koe, IAA, ko e fu‘u mafi?
Pea ‘oku ha‘ofia koe ‘e ho‘o fai mo‘oni.
9Ko koe ‘oku ke pule‘i ‘a e fakapupula ‘a e tahi:
Ka hake hono ngaahi ngalu ko koe ‘oku ke lolomi.
10Ko koe na‘a ke laiki ‘a Lēhapi#89.10 Lēhapi; Ko e manu fakailifia ‘i he ngaahi talatupu‘a ‘o ono‘ahó. Na‘e faka‘ilonga‘i‘aki ‘a e ngaahi mālohinga ‘o e koví mo e moveuveú. ke ne hangē ha taha kuo te‘ia;
Na‘a ke veteki ‘aki ho nima mālohi ho ngaahi fili na.
11‘Oku ‘o‘ou ‘a e langi, ‘o‘ou foki ‘a e fonua:
Ko māmani mo hono mahu ko ho‘o fokotu‘u pē ia.
12Ko e tokelau mo e tonga ko ha‘a u pē ngaohi:
‘Oku kalanga‘aki ho huafa ‘e Tepoa mo Heamoni.
13Ko ho‘ou ē nima ‘oku kofu ‘aki ha ngū:
‘Oku kaukaua ho‘o kuku, ‘oku mahiki ho to‘omata‘u.
14Ko Fai totonu mo Fakakonisitūtone ko e pou ia ho ‘afio‘anga:
Ko ‘Ofa mo Mo‘oni ‘oku na fakamelomelo ki ho fofonga.
15Monū‘ia ā ka ko e fa‘ahinga ‘oku ‘ilo ‘a e ongo fakafiefia:
‘Oku nau hā‘ele, ‘e Sihova,
‘I he maama ‘o ho fofonga.
16‘Oku nau hākahaka ‘i ho huafa he ‘aho kotoa:
Pea ‘i ho‘o faitotonu ‘oku hiki kinautolu ke mā‘olunga.
17He ko e manumanumelie ‘o honau ivi ‘a ho‘o ‘Afio:
Pea ‘i ho‘o tokanga mai kuo ke fakamā‘olunga homau nifo.
18He ‘oku ‘o Sihova homau fakaū;
Pea ‘oku ‘o e Tāpuhā ‘o ‘Isileli homau hau.
19Ko e taimi ko ē na‘a ke tala fakavīsone ki ho‘o kau pele, ‘o ke folofola mai,
“Kuo u hilifaki ‘a e ivi tokoni ki ha mafi;
Kuo u hākeaki‘i ha taha fili mei he kakai.
20Kuo u ma‘u ‘a Tēvita ko ‘eku tamaio‘eiki;#1 Sām 13.14; Ngā 13.22; 1 Sām 16.12
Ko e lolo tapu Kuo u pani ‘aki:
21‘A ia ‘e ma‘u ki ai ‘eku puke;
Ko hoku nima foki te ne poupou pē.
22‘E ‘ikai tata‘o mai ha fili;
Pea ko e fa‘ahinga pau‘u ‘e ‘ikai te nau fakamamahi.
23Pea te u tulaki mei hono ‘ao hono ngaahi fili,
Pea te u tuku atu ha mala kiate kinautolu ‘oku fehi‘a mai.
24Pea ‘e fe‘ao mo ia ‘a ‘eku mo‘oni mo ‘eku ‘ofa;
Pea ‘e mā‘olunga hono nifo ‘i hoku hingoa.
25Pea te u ‘ai hono nima ki he tahi,
Pea ko hono to‘omata‘u ki he vaitafe lahi.
26Te ne tautapa mai, ‘o pehē,
“Ko ‘eku tamai ‘a e ‘Afiona,
Ko hoku ‘Otua, mo hoku makatu‘u fakamo‘ui‘anga.”
27Ko au foki te u ‘uluaki foha ‘aki,#Fkhā 1.5
Ko e taupotu ‘i he ngaahi tu‘i ‘o māmani.
28‘E ta‘ofi ai pē ‘eku ‘ofa ma‘ana,
Pea ‘a‘ana mo‘oni ‘eku fuakava.
29Pea te u ‘ai ke ta‘engata hono fāmili,
Pea ko hono taloni ke hangē ko e ngaahi ‘aho fakalangi.
30Kapau ‘e li‘aki ‘eku lao ‘e he‘ene fānau,
‘O ‘ikai te nau fou ‘i he konisitūtone Kuo u fokotu‘u;
31Kapau te nau va‘inga‘aki ‘eku ngaahi fekau,
‘O ‘ikai te nau tauhi ‘a e ngaahi tu‘utu‘uni ‘a‘aku;
32Te u ‘eke ‘aki ‘a e me‘a kinisi ‘enau angahala,
Pea te u ‘eke ‘enau kovi ‘aki ‘a e ngaahi tā.
33Ka ‘e ‘ikai te u motuhi ‘eku ‘ofa meiate ia,
Pea ‘e ‘ikai te u tuku ‘eku fakamo‘oni lea.
34‘E ‘ikai te u va‘inga‘aki ‘eku kovinānite,
Pea ko e me‘a kuo ‘alu atu ‘i hoku ngutu ‘e ‘ikai te u fakakehe.
35Kuo taha ai pē ‘eku fuakava;
Tangi ‘eku mā‘oni‘oni ‘e ‘ikai te u loi kia Tēvita:
36Ko hono hako ‘e ta‘engata,
Pea ko hono taloni ‘e fe‘ao mo au ‘o hangē ko e la‘ā.
37‘E fokotu‘u ‘o ta‘engata hangē ko e māhina,
Mo e fakamo‘oni lea ‘i he ‘atā.” (Sila)
38Ka kuo ke li‘aki pē mo fakatale‘i,
Kuo ke takataka ‘ita ki ho‘o pani.
39Kuo ke fakama‘ama‘a ‘a e kovinānite mo ho‘o tamaio‘eiki:
Kuo ke lī ki he kelekele hono kalauni.
40Kuo ke hae kotoa hono ngaahi ‘ā;
Pea kuo ke ‘ai ke koto maumau pē hono ngaahi taua.
41Kuo vete ia ‘e he fononga noa ‘i he hala:
Kuo ne hoko ko e luma‘anga ‘o e nofo ‘i he ngaahi fonua.
42Ko e to‘omata‘u ‘o ho ngaahi fili kuo ke fakamahiki;
Kuo ke ‘ai ke fiefia hono kau fakamamahi.
43Ko e mata ‘o ‘ene heletā foki na‘a ke pale‘i,
‘O ‘ikai te ke fakamatu‘u ia ‘i he fepaki.
44Kuo ke fakangata ‘ene fetapaki,#89.44 fetapaki; Ko hono faka-Hepeluú ia, ka ‘oku ngali tonu hono hiki ‘o: tokotoko fakatu‘í.
Kuo ke fulihi ki he kelekele hono taloni.
45Kuo ke fakangata vave hono ivi fakatalavou:
Kuo ke ‘ufi‘ufi ia ‘aki ‘a e mā hangē ha kofu. (Sila)
46‘E ‘osi ‘afē, ‘Eiki, ho‘o fufū koe ‘o ta‘engata?
‘E kohu ho‘o ‘ita hangē ha vela?
47Manatu ki he si‘i ‘o e taimi ‘o‘ota:
Hono ko e muna kuo ke ngaohi ki ai ‘a e hako‘i tangata kotoa!
48Hono ai ha to‘a ‘e mo‘ui ai pē, ‘o ‘ikai a‘usia ‘a e mate,
Te ne hamusi ‘ene mo‘ui mei he puke ‘a Hētesi, ‘inē? (Sila)
49‘E ‘Ātonai Kofa‘ā ho‘o ngaahi ‘ofa mu‘a,
Ko e fua ho‘o fuakava kia Tēvita mo fakamo‘oni lea?
50Manatu, ‘Ātonai, ki he manukia ho‘o kau tamaio‘eiki;
Hono ‘oku ou ‘aikona ‘a e koto manuki ‘a e kakai lahi;#89.50 manukia… lahi; ‘Oku ngali tonu hono hiki ‘o: ki he‘eku kātaki‘i kotoa ‘a e ngaahi talatuki mai ‘a kakai kei fakapo‘ulí, ka ‘oku pehē he faka-Hepeluú: ki he‘eku kātaki‘i kotoa ‘a e ngaahi fu‘u laulauta ‘o e kakai kei fakapo‘ulí.
51‘A ia ‘oku manuki ‘aki koe, ‘Eiki, ‘e ho ngaahi fili;
‘Io, ‘a ‘enau manukia ‘a e ngaahi laka ‘a ho‘o pani.
52Ko e fakamālō ‘o Sihova
Ke fai pē ‘o lauikuonga.
‘Ēmeni, mo ‘Ēmeni.
KO HONO FĀ ‘O E PUKA
Currently Selected:
KO E SAAME 89: TMB
Highlight
Copy
Compare
Share
Want to have your highlights saved across all your devices? Sign up or sign in
Tongan Moulton Bible © Bible Society of the South Pacific, 2011.
