KO E SAAME 9
9
Ko e Fakafeta‘i ki he ‘Otuá koe‘uhi ko ‘Ene Fakamāu Faitotonú
(Ki he Pule ‘o e Hiva. Ke fai‘aki ‘a e fasi ko Mate-ma‘a-e-‘alo. Ko e Saame ‘a Tēvita.)
1TE U fakamālō kia Sihova ‘aki hoku loto kotoa;
Te u ‘a‘au kotoa ho‘o ngaahi ngāue mana.
2Te u fiefia mo hākailangitau ‘i he ‘Afiona.
Te u hiva‘aki, ‘Elioni, ho huafa.
3He foki hoku ngaahi fili, ‘o sītu‘a;
Nau humu pea mole ‘i he hā ho fofonga.
4He kuo ke taukapo‘i hoku fakamāu‘i mo ‘eku totonu;
Kuo ke nofo ‘i he taloni ko e Fakamaau Fai totonu.
5Kuo ke valoki‘i ‘a e ngaahi kakai, kuo ke faka‘auha ‘a e angahala.
Kuo ke tāmate‘i honau hingoa ‘o lauikuonga pea ta‘engata.
6Ko e fili!–kuo tu‘usi kinautolu; ko e koto lusa ma‘u ai pē;
Pea ko e ngaahi kolo na‘a ke fulihi, na‘a mo e manatu ki ai kuo mole
7Ka ‘oku ‘afio ai pē ‘a e ‘Eiki,
Kuo ne teuteu ki he fakamaau ‘a hono taloni.
8Pea te ne fai ‘e ia ‘a e fakamaau ‘o māmani ke ‘au‘autotonu,
Te ne pule‘i ‘a e ngaahi kakai, ‘o ‘atu hono taau.
9Ka ‘e hoko ‘a Sihova ko e kolo mo‘unga ma‘a si‘i have‘i:
Ko e hūfanga ki he ngaahi taimi ‘efi‘efi.
10Pea ‘e falala kiate koe ‘a ha‘a maheni ki ho huafa;
He tala‘ehai kuo ke li‘aki, ‘e Sihova, ‘a e kau kumi ki he ‘Afiona.
11Hiva himi kia Sihova ‘oku ‘afio ‘i Saione:
Faka‘ilo ki he ngaahi kakai ‘ene ngaahi ngāue.
12He ‘i he‘ene ‘eke toto ‘oku ne manatu ‘a e fa‘ahinga ko ia;
‘Oku ‘ikai ngalo ‘a e tangi ‘a si‘i ngaohia.
13‘Alo‘ofa mai, ‘Eiki;
Me‘a ki hoku ngaohi ‘e he kakai ‘oku fehi‘a mai,
‘A e ‘Afiona ‘oku ke hapai hake
‘A au mei he matapā ‘o mate;
14Koe‘uhi ke u ‘a‘au kotoa ho fakamālō
‘I he ngaahi matanikolo ‘o e ta‘ahine Saione,
Te u tome‘e ‘i ho‘o fakamo‘ui.
15Kuo tō ‘a e hīteni ‘i he luo na‘a nau ngaohi:
Ko e kupenga na‘a nau tau, ko honau va‘e kuo mo‘ua ai.
16‘Oku fakahā ia ‘e Sihova, ‘oku ne fakamaau ‘o ‘osi:
Ko e ngāue ‘a hono ‘aofi nima ‘oku ne mo‘ua ai ‘a e tangata kovi. (Hikaione. Sila.)
17‘E foki ‘a e kau angakovi ki Lolofonua,
‘A e kakai kotoa ‘oku fakangalongalo‘i ‘a e ‘Otua.
18He ‘e ‘ikai ngalo ma‘u ai pē ‘a e kau masiva,
‘E ‘ikai mate ta‘engata ‘a e ‘amanaki ‘a si‘i ngaohikovia.
19Tu‘u mai, Sihova, mo e fiemālohi ‘a e tangata me‘a vaivai:
Tuku ke fai ki ho ‘ao ‘a e fakamaau ‘o e ngaahi kakai.
20‘Ai, ‘Eiki, ke nau manavahē fu‘u:
Ke ‘ilo ‘e he ngaahi kakai ko e fa‘ahinga vaivai ‘a kinautolu. (Sila)
Currently Selected:
KO E SAAME 9: TMB
Highlight
Share
Compare
Copy
Want to have your highlights saved across all your devices? Sign up or sign in
Tongan Moulton Bible © Bible Society of the South Pacific, 2011.
