KO E SAAME 10
10
Ko e Lotu Kole ki he ‘Otuá ke ne Fai ‘ene Fakamāú
1KO E hā ‘oku ke fakamama‘o ai, ‘Eiki?
Ko e hā ‘oku ke hanga kehe ai ‘i he taimi ‘efi‘efi?
2‘I he fielahi ‘a e angakovi kuo mohongia ‘a si‘i ngaohia;
Kuo nau mo‘ua ‘i he ngaahi fakakaukau kuo puleaki‘i ‘e he fa‘ahinga na.#10.2 Kuo nau… fa‘ahinga na; Ko hono hiki ‘e taha ‘a ‘eni: ‘Ofa ke nau mo‘ua ‘i he ngaahi fakakaukau kuo nau puleaki‘i ‘e kinautolu.
3He ko e holi ‘o hono loto, ko e pōlepole‘anga ia ‘o e angakovi;
Pea kuo ne fakamālō kiate ia ‘oku ma‘u me‘a ‘i he fakamālohi:
‘Oku ne mā‘imoa ‘aki ‘a e ‘Eiki.
4Ko e angakovi–ko ‘ene matahiki ‘oku lea,
“‘E ‘ikai te ne ‘eke ‘a e me‘a:
‘Oku ‘ikai ha ‘Otua”–
Ko e lau ia ‘a ‘ene ngaahi fakakaukau kotoa.
5‘Oku mālohi ai pē ‘ene ngaahi laka;
‘Oku mā‘olunga ho‘o ngaahi fakamaau, ‘o mama‘o mei hono mata:
Ko e me‘a ki hono ngaahi fili ‘oku ne ifi‘i kinautolu kotoa.
6‘Oku ne pehē ‘i hono loto, “E ‘ikai maue‘i kita:
‘E ‘ikai te u tō ki ha kovi ‘i ha to‘utangata mo ha to‘utangata.”
7‘Oku fonu hono ngutu ‘i he tuki, mo e kākā, mo e fakaehaua;#Lom 3.14
Ko e fakamamahi mo e pau‘u ‘oku ‘i hono lalo ‘elelo na.
8‘Oku ne nofo ‘i he ngaahi toitoi‘anga ‘o e ngaahi vilisi;
‘Oku ne tāmate‘i ‘a e ta‘ehalaia ‘i he ngaahi potu ‘oku puli;
Ko hono mata ‘oku lamalama fufū ki he vaivai.
9Hangē ha laione ‘i hono vao pehē ‘ene toitoi ‘i hono toitoi‘anga;
‘Oku ne toi pē ke pō ‘a e ta‘eli‘ekina:
‘Oku ne ma‘u ‘a e ta‘eli‘ekina he ha‘o ‘aki hono kupenga.
10Ko ia, kuo laiki ia pea hinga,
Pea ‘oku tō ‘a si‘i kau vaivai ‘i he ngaahi fu‘u mahafu ‘a‘ana.
11‘Oku ne pehē ‘i hono loto, “Kuo ngalo ‘i he ‘Otua:
Kuo ne hanga kehe; ‘e ‘ikai te ne sio ki ai ‘o ta‘engata.”
12‘Eiki, tu‘u hake; ‘e ‘Otua, ofa ho nima:
‘Oua na‘a ngalo ‘a e ngaohikovia!
13Ko e pehē koā ke mā‘imoa ‘aki ‘e he angakovi ‘a e ‘Otua!
Ke ne pehē ‘i hono loto, “E ‘ikai te ke ‘eke ia!”
14Kuo ke sio ki ai; he ‘oku vakai‘i ‘e he ‘Afiona ‘a e ongosia mo e hoha‘a;
Koe‘uhi ke ala ki ai ho nima;
‘Oku tuku ‘e he vaivai ‘enau me‘a kiate koe,
He ko koe ai pē ‘a e tokoni ‘o e tamai mate.
15Laiki ‘e koe ‘a e nima ‘o e faihala:
Pea ko e me‘a ki he tangata kovi, ‘eke ‘ene fai hala,
Kae‘oua ke ‘ikai kei ‘ilo ha me‘a.
16‘Oku Tu‘i ‘a Sihova ‘o lauikuonga pea ta‘engata:
Kuo ‘auha ‘a e hīteni mei hono fonua.
17Ko e holi ‘a e ngaohikovia kuo ke ongo‘i, ‘e Sihova,
‘Oku ke poupou honau loto; ‘oku ke fakatokanga‘i ho fofonga;
18Ka ke fai fakamaau ma‘a e tamai mate mo si‘i havehave,
Kae‘oua na‘a toe fakailifia mai ‘e ha me‘a vaivai ‘a ia ko e kelekele pē.
Currently Selected:
KO E SAAME 10: TMB
Highlight
Share
Compare
Copy
Want to have your highlights saved across all your devices? Sign up or sign in
Tongan Moulton Bible © Bible Society of the South Pacific, 2011.
