KO E SAAME 88
88
Ko e Lotu Tautapa ki ha Tokoni
(Ko e Ta‘anga Saame ‘a ha‘a Kola. Ki he Pule ‘o e Hiva. Ke Hiva ‘aki ‘a e fasi fakaminu. Ko e hiva-ako ‘a Hēmani ko e ha‘a Sala.)
1‘E Sihova ko hoku ‘Otua fakamo‘ui,
‘Oku ou fakafe‘ao kiate koe ‘aho mo e pō mo ‘eku tangi:
2Ke a‘u ‘eku lotu ki ho ‘ao na;
Ofe‘i ho fofonga ki he le‘o ‘o ‘eku kalanga.
3He ‘oku fonu hoku laumālie ‘i ha koto mamahi,
Pea ko ‘eku mo‘ui ‘oku fakaofiofi ki Hētesi.
4‘Oku lau au fakataha mo kinautolu ‘oku hifo ki vanu:
‘Oku ou tatau mo ha tangata kuo ‘osi hono ngū.#88.4 kuo ‘osi hono nguú; pe ‘oku ‘ikai ha tokoni ‘e fai mai.
5‘Oku ‘i he kau mate ‘oku mohe na,
Hangē ko e kau tō ‘oku tokoto ‘i fa‘itoka,
‘A ia ‘oku ‘ikai te ke kei manatua;
‘Io, ko e fa‘ahinga kuo motuhi mei ho nima.
6Kuo ke ‘ai au ki he takele ‘o e luo,
Ki he po‘uli lōlō, ki he loloto taumama‘o.
7‘Oku tata‘o mai ho houhau,
‘Io, ko ho‘o ngaahi peau kotoa ‘oku fakavaivai‘i ‘aki au. (Sila)
8Kuo ke hiki ke mama‘o hoku ngaahi kaume‘a;
Kuo ke ngaohi au ko honau fakalili‘a‘anga:
Kuo tapui au, kuo ‘ikai te u lava ke ‘alu ki tu‘a.
9Ko e me‘a ‘i he‘eku mamahi ‘oku ‘osi‘osi hoku mata:
Kuo u tautapa atu he ‘aho kotoa pē, ‘e Sihova,
Kuo u mafao hoku nima ki he ‘Afiona.
10Te ke fai ha mana ki he kau mate?
‘E tu‘u ‘a e kau ‘ata na, ‘o fakafeta‘i kiate koe? (Sila)
11‘E tala koā ho‘o ‘ofa ‘e fa‘itoka?
Ho‘o tauhi ho‘o lea ‘i loto Faka‘auha?
12‘E toki hā koā ‘i he po‘uli ho‘o fai fakaofo?
Mo ho‘o faitotonu ‘i he fonua ‘o e fakangalo?
13Ka ko au ē, ‘e Sihova, ‘oku ou kaila atu,
Pea ‘oku fakafetaulaki atu he pongipongi ‘eku lotu.
14Ko e hā ‘oku ke li‘aki ai hoku laumālie, ‘e Sihova?
Ko e hā ‘oku ke fufū meiate au ho fofonga?
15Ko e vaivai au mo e tei mate talu ‘eku tupu hake,
‘I he fua ho‘o ngaahi fakailifia ‘oku ou mo‘umateā pē.#88.15 fakailifia… pē; ‘Oku ‘ikai ke mahino ‘a hono faka-Hepeluú. ‘Oku ngali tonu hono hiki ‘o: tauteá kuo ‘osi hoku iví.
16Kuo lōmekina au ‘e ho‘o fu‘u tuputāmaki;
Kuo tu‘usi au ‘e ho‘o ngaahi fakalele mo‘ui.
17Kuo nau takai au hangē ha tahi ‘i he ‘aho kotoa;
Kuo nau kāpui au fakataha.
18Kuo ke hiki ke mama‘o ‘a e ‘ofa‘anga mo e kaume‘a,
Ko hoku kau fe‘iloaki ko e po‘uli lōlō na.
Currently Selected:
KO E SAAME 88: TMB
Highlight
Copy
Compare
Share
Want to have your highlights saved across all your devices? Sign up or sign in
Tongan Moulton Bible © Bible Society of the South Pacific, 2011.
