KO E SAAME 85
85
Ko e Lotu Kole ke Tu‘umālie ‘a e Fonuá
(Ki he Pule ‘o e Hiva. Ko e me‘a ‘a ha‘a Kola, Ko e Saame)
1‘EIKI, kuo ke hōifua mai ki ho kelekele:
Kuo ke fakafoki ‘a e pōpula ‘o Sēkope.
2Ko e hia ‘a ho kakai kuo ke ‘ave,
Kuo ke ‘ufi‘ufi ‘enau angahala kotoa pē. (Sila)
3Kuo ke fakamā‘opo‘opo mai ‘a e mahua ‘o ho‘o ‘ita:
Kuo ke tafoki mei he kakaha ‘o ho‘o tuputāmaki na.
4Fakatafoki kimautolu, ‘e homau ‘Otua fakamo‘ui‘anga;
Pea ko ho houhau kiate kimautolu ke ke fakangata.
5Ko ho‘o mamahi kiate kimautolu ‘e fai ‘o ta‘engata koā?
Te ke toloaki ho‘o ‘ita ki he to‘utangata mo e to‘utangata?
6‘Ikai koā te ke fakaake kimautolu,
Kae fiefia ‘i he ‘Afiona ‘a e kakai ‘o‘ou?
7‘Eiki, ke hā kiate kimautolu ho‘o meesi
Pea ‘omi kiate kimautolu ho‘o fakamo‘ui.
8Ka u fanongo mu‘a
Pe ko e hā ‘a e folofola ‘a ‘Ela Sihova:
He te ne tala melino ki hono kakai, ‘io, ‘a ‘ene fanga pele:
Kae ‘oua te nau toe foki ki he‘enau sesele.
9Kuo pau ‘oku ofi ‘ene fakamo‘ui kiate kinautolu ‘oku ‘apasia kiate ia;
Kae nofo ‘a e Sikaina ‘i hotau fonua.
10Ko ‘Alo‘ofa mo Mo‘oni kuo na fetāiaki kinaua;
‘A Angatonu mo Melino kuo na fekita.
11Ko Mo‘oni ‘oku tupu hake mei māmani,
Pea ko Angatonu ‘oku fakasio hifo mei langi.
12‘E ‘omi foki ‘e Sihova ‘a e me‘a ‘oku lelei;
Pea ‘e ‘omi hono fua ki hotau fonua
13‘E mu‘omu‘a ‘a Angatonu ‘iate ia
Pea te ne ngaohi hono topuva‘e ko e hala.#85.13 Ko e hiki ia he Sepituakiní, ka ‘oku fihi.
Currently Selected:
KO E SAAME 85: TMB
Highlight
Copy
Compare
Share
Want to have your highlights saved across all your devices? Sign up or sign in
Tongan Moulton Bible © Bible Society of the South Pacific, 2011.
