KO E SAAME 86
86
Ko e Lotu Kole Tokoni
(Ko e Lotu ‘a Tēvita)
1OFE‘I ho fofonga, ‘Eiki, ‘o tali kita;
He ko e tu‘utāmaki au, mo masiva.
2Tauhi hoku laumālie, he ko ho‘o pele kita:
Fakamo‘ui ho‘o tamaio‘eiki, ‘a e ‘Afiona ko hoku ‘Otua;
He ko e falala au ki he ‘Afiona.
3‘Alo‘ofa mai, ‘Ātonai ē;
He ko e ‘aho kotoa ‘oku ou tautapa kiate koe.
4Fakafiefia‘i ‘a e loto ‘o ho‘o tamaio‘eiki;
He ‘oku ou hapai hake hoku laumālie kiate koe, ‘Ātonai.
5He ko e lelei koe, ‘Ātonai, mo e fa‘a fakamolemole,
Pea ke mohu meesi ki he kakai kotoa ‘oku tautapa kiate koe.
6Ongo‘i, ‘Eiki, ‘eku lotu;
Pea fofonga ki he le‘o ‘o ‘eku hū tōtōaki atu.
7‘I he ‘aho ‘o ‘eku faingata‘a‘ia te u tautapa atu;
He te ke tali au.
8‘Oku ‘ikai ha taha ‘i ha‘a ‘Otua ‘oku tatau, ‘Ātonai, mo Koe;
Pea ‘oku ‘ikai ha ngāue ‘e tatau mo ho‘o ngāue.
9Ko e pule‘anga kotoa kuo ke ngaohi#Fkhā 15.4
Te nau omi ‘o punou ‘i ho ‘ao, ‘Ātonai:
Pea ko ho huafa te nau fakahīkihiki‘i.
10He ko e lahi ‘a e ‘Afiona,
Pea mo e fai me‘a mana;
Ko koe ‘a e ‘Otua toko taha.
11Huluhulu au ‘i ho hala, ‘Eiki;
Ka u ha‘ele ‘i ho‘o mo‘oni.
Ko hoku loto ē ke ke fā‘ūtaha
Ke ‘apasia ki ho huafa.
12Ka u fakafeta‘i ki he ‘Afiona ‘aki hoku loto kotoa,
‘E ‘Ātonai ko hoku ‘Otua;
‘O fakahīkihiki‘i ho huafa ‘o ta‘engata.
13He kuo lahi kiate au ho‘o meesi
Pea kuo ke hamusi hoku laumālie mei he takele ‘o Hētesi.
14Kuo tu‘u mai ha kakai pau‘u, ‘Elohimi,
Pea ko e fakataha ‘a kau fakamālohi kuo nau tuli ki he‘eku mo‘ui:
Pea ‘oku ‘ikai te nau fai ki he ‘Afiona ‘enau fakafeangai.
15Ka ko koe, ‘Ātonai, ko e ‘Otua ‘alo‘ofa mo angalelei,
Tuai ki he houhau, pea fonu ‘i he kelesi mo e mo‘oni.
16Tafoki kiate au, pea ke ‘alo‘ofa;
Foaki ho ivi ki ho‘o tamaio‘eiki ko kita,
Pea fakamo‘ui ‘a e tama ‘a ho‘o kaunanga.
17Fai ma‘aku ha faka‘ilonga monū,
Ke sio ki ai pea mā ‘a kinautolu ‘oku fehi‘a kiate au,
He ko koe, Sihova, kuo ke tokoni mai, ‘o fai ha fakalelu.
Currently Selected:
KO E SAAME 86: TMB
Highlight
Copy
Compare
Share
Want to have your highlights saved across all your devices? Sign up or sign in
Tongan Moulton Bible © Bible Society of the South Pacific, 2011.
