KO E SAAME 84
84
Ko e Vivili e Fie Lotu ‘i he Temipalé
(Ki he Pule ‘o e Hiva, Ko e Faka-Kati. Ko e Saame ‘a ha‘a Kola.)
1‘E Sihova Mohu-hōsitē,
hono ‘ikai faka‘ofo‘ofa ‘a ho ngaahi nofo‘anga!
2‘Oku holi hoku laumālie, ‘io, ‘oku ne pongia
He fiema‘u ‘a e ngaahi loto‘ā ‘o Sihova:
Ko hoku loto mo hoku kakano ni ‘oku na tangi ki he ‘Otua mo‘ui.
3Seuke, kuo ma‘u fale ai ‘e he ki‘i manupuna,
Mo e pekepeka hano pununga;
Pea kuo ne tuku ki ai hono fānganga,
‘O ofi ki ho ngaahi feilaulau‘anga,
‘Eiki Sāpaoti, ‘a hoku Tu‘i mo hoku ‘Otua.
4Monū‘ia ā ka ko ha‘a nofo ‘i ho fale:
Te nau fai ai pē ‘a e fakamālō kiate koe. (Sila)
5Monū‘ia ā ka ko e kau tangata.
‘Oku ‘i he ‘Afiona ‘enau falala,
‘Oku nau loto‘aki ‘a e ngaahi hala.
6Si‘enau ‘alu ‘i he Tele‘a Tangi
‘Oku nau ngaohi ia ko e pupunga matavai;
‘Io, ‘oku ‘ufi‘ufi ia ‘e he ‘uhamu‘a ‘aki ‘a e ngaahi tāpuaki.
7‘Oku nau ‘alu ‘i he mālohi ki ha mālohi,
‘Oku nau hū ‘i Saione ‘i he ‘ao ‘o ‘Elohimi.
8Fanongo mai ki he‘eku lotu ē,
‘A Sihova, ‘Otua ‘o e ngaahi Hōsitē!
Ofe‘i mai ho fofonga ē,
‘A e ‘Otua ‘o Sēkope! (Sila)
9‘E ‘Otua ko homau Fakaū, hanga mai,
‘O ‘afio ki he fofonga ‘o ho‘o Pani.
10He ko ha fo‘i ‘aho ‘i ho loto‘ā ‘oku lelei hake
‘I ha afe‘i ‘aho ‘i ha potu ange.
Te u fili mu‘a ke u le‘o matapā ‘i he fale ‘o hoku ‘Otua,
‘I ha‘aku nofo ‘i he ngaahi tēniti ‘o e angahala.
11He ko Sihova ‘Elohimi ko e la‘ā mo e fakaū ia;
‘Oku foaki ‘e Sihova ‘a e kelesi mo e kolōlia:
‘E ‘ikai te ne mamae‘i ha lelei ‘e taha
Meiate kinautolu ‘oku laka haohaoa.
12‘E Sihova Mohu-hōsitē,
Monū‘ia ā ka ko e tangata ‘oku falala kiate koe!
Currently Selected:
KO E SAAME 84: TMB
Highlight
Copy
Compare
Share
Want to have your highlights saved across all your devices? Sign up or sign in
Tongan Moulton Bible © Bible Society of the South Pacific, 2011.
