KO E SAAME 83
83
Ko e Lotu Kole ke Ikuna‘i e ngaahi Fili ‘o ‘Isileli
(Ko e Ta‘anga. Ko e Saame ‘a ‘Ēsafe.)
1‘E ‘Elohimi, ‘oua te ke fakalongo pē;
‘Io, ‘oua te ke fakaongonoa, pea ‘oua te ke nofo pē, ‘Ela ē.
2He vakai ‘oku ‘u‘ulu ho ngaahi fili:
Pea ko kinautolu ‘oku fehi‘a kiate koe ‘oku nau ‘ulu mahiki.
3‘Oku nau ‘ai fakalilolilo ‘a e tu‘utu‘uni ki ho kakai,
‘Oku nau puleaki‘i ha me‘a ki ho kau malu‘i.
4‘Oku nau pehē, Ha‘u ā ke tau tu‘usi kinautolu ke ‘oua na‘a toe lau ko e kakai:
‘Io, ke ‘oua na‘a kei manatua ‘a e hingoa ‘o ‘Isileli,
5He kuo nau alea loto taha;
Kuo nau fuakava ke fai ha kovi ki he ‘Afiona.
6Ko e ‘ū tēniti ‘o ‘Ītomi mo e kau ‘Isime‘eli;
Ko Moape mo ha‘a Heka‘ā:
7Ko Kīpeli, mo ‘Āmoni, mo ‘Amaleki:
Ko Filisitia, fakataha mo e ha‘a nofo Taia:
8Ko ‘Āsilia foki ‘oku kau mo kinautolu ē;
Kuo nau hoko ko e nima ‘o ha‘a Lote. (Sila)
9Fai kiate kinautolu ‘o hangē ko ho‘o fai ki Mitiani;#Fkm 4.6-22; 7.1-23
‘O hangē ko ho‘o fai kia Siselā,
‘O hangē ko ho‘o fai kia Siapini ‘i vaitafe Kīsoni:
10‘A ia na‘e faka‘auha ‘i ‘Enitoa;
Na‘a nau hoko ko e kinoha‘a ki he ngoue‘anga.
11Ngaohi kinautolu, ‘a honau hou‘eiki, ke hangē ko ‘Ōlepi mo Sī‘ipi;#Fkm 7.25; 8.12
‘Io, ke hangē ko Sipa mo Salamuna ‘a honau kau pilinisi:
12‘A ia na‘a nau pehē, Tau to‘o mai mu‘a
‘a e fanga‘anga manu ‘a ‘Elohimi mootau tofi‘a.
13‘E hoku ‘Otua, ngaohi kinautolu ke hangē ko e ‘akau ko e teka;
Hangē ha kafukafu ‘oku vilingia.
14Ke hangē ha afi ‘oku ne keina ha vao tātā;
‘Io, ke hangē ha maama ‘oku ne puho he ngaahi mo‘unga;
15Ke pehē ho‘o tuli kinautolu ‘aki ho‘o taufa,
Mo faka‘ohovale‘i ‘aki ho‘o afā.
16Fakafonu honau mata ‘i he mā:
Ke nau kumi ki ho huafa, ‘e Sihova.
17Ke nau mā mo manavahē ‘o lauikuonga;
‘Io, ke nau puputu‘u pea ‘auha;
Pea ke nau ‘ilo ko e ‘Afiona tofu pē taha–
18‘Io, ko ho huafa ko Sihova ‘oku hope atu ‘i māmani kātoa.
Currently Selected:
KO E SAAME 83: TMB
Highlight
Copy
Compare
Share
Want to have your highlights saved across all your devices? Sign up or sign in
Tongan Moulton Bible © Bible Society of the South Pacific, 2011.
