KO E SAAME 78
78
Ko e ‘Otuá mo Hono Kakaí
(Ko e Hiva-ako ‘a ‘Ēsafe.)
1TOKANGA, ‘a hoku kakai, ki he lao ‘oku ou ‘atu:
Fokotu‘u telinga mai ki he ngaahi lea ‘a hoku ngutu.
2Ka u to‘o hoku ngutu ‘i ha paloveepi;#Māt 13.35
Ka u pu‘aki ‘ani misiteli ‘o e mu‘aki taimi:
3Ko e ngaahi me‘a kuo tau ongona mo ‘ilo‘i,
Pea kuo fakamatala mai ‘e he‘etau ngaahi kui.
4‘E ‘ikai te tau fufū ia mei he‘enau fānau,
Kae tala ki he to‘utangata kaha‘u ‘a e ngaahi mālō ‘o Sihova,
Mo hono fu‘u ivi, mo e ngaahi ngāue fakaofo kuo ne feia.
5He na‘a ne fokotu‘u ‘i ha‘a Sēkope ha fakamo‘oni,
Pea ne tu‘utu‘uni ha lao ‘i ha‘a ‘Isileli,
‘A ia na‘a ne tu‘utu‘uni ki he ngaahi kui ‘atautolu,
Ke nau faka‘ilo ki he‘enau fānau:
6Koe‘uhi ā ke ‘ilo ia ‘e he to‘utangata kaha‘u,
‘A e fānau toki fā‘ele‘i;
Ke nau tu‘u ‘o fakamatala ki he fānau ‘anautolu:
7Ka nau tu‘u ‘ia ‘Elohimi ‘enau falala,
‘O ‘ikai ngalo ‘a e ngaahi ngāue ‘a ‘Ela,
Pea nau tauhi ‘a e ngaahi tu‘utu‘uni ‘a‘ana:
8‘O ‘oua te nau hangē ko e ngaahi kui ‘anautolu,
Ko e to‘utangata talangata‘a mo pau‘u;
Ko e to‘utangata na‘e ‘ikai angatonu honau loto,
Pea ko honau laumālie na‘e ‘ikai ma‘u ki he ‘Otua ‘o ne nofo.
9Ko ha‘a ‘Ifalemi, neongo ko ‘enau mahafu ke fana mama‘o,
Ka nau fulitu‘a ‘i he ‘aho ‘o e fakahoko.
10Na‘e ‘ikai te nau tauhi ‘a e kovinānite ‘o e ‘Otua,
Pea ko ‘ene lao na‘e ‘ikai te nau fie foua;
11Pea na‘e ngalo ‘iate kinautolu ‘ene fa‘a fai,
Mo e ngaahi me‘a fakaofo na‘a ne tuku ke nau māta‘i.
12‘I he ‘ao ‘o ‘enau ngaahi kui na‘a ne fai me‘a lalahi,#‘Eki 7.8–12.32
‘I he fonua ko ‘Isipite, ‘i he tuku‘uta ‘o Soani.
13Na‘a ne vaeua ‘a e tahi, ‘o ne tuku ke nau hā‘ele ai:#‘Eki 14.21-22
Pea ne fokotu‘u hono vai hangē ha ‘esi.
14Pea ne taki kinautolu ‘aho ‘aki ha ‘ao,#‘Eki 13.21-22
Mo e maama afi ke ‘osi ‘a e pō.
15Na‘a ne foa ‘ani maka ‘i he Toafa,#‘Eki 17.1-7; Nōm 20.2-13
Pea ko ‘ene fakainu kinautolu ko e ngaahi moana ‘atā.
16Na‘a ne ‘omi vaitafe mei he makatu‘u,
‘O ne ‘ai ke ‘oho hifo hangē ko e ngaahi vaitafe ‘oku ‘au.
17Ka na‘a nau mōia atu he fai angahala kiate ia,
‘O nau angatu‘u kia ‘Elioni ‘i he Toafa.
18Pea nau ala‘aki kia ‘Ela ‘i honau loto,#‘Eki 16.2-15; Nōm 11.4-23,31-35
He kole me‘akai na‘e ‘ao mo ‘enau manako.
19‘Io, na‘a nau lau‘i ‘a e ‘Otua;
Na‘a nau pehē, “E lava koā ‘a ‘Ela
Ke teuteu ha tēpile ‘i he Toafa?
20Mo‘oni na‘a ne taa‘i ‘a e makatu‘u,
Pea puna mei ai ‘a e vai,
Pea koni ngaahi vaifā na‘e ‘oho mai:
Ka he te ne lava foki ke ‘omi me‘akai?
Pe tokonaki kakano ma‘a hono kakai?
21Ko ia, na‘e ongo‘i ‘e Sihova, ‘o ne tuputāmaki:
Pea na‘e tutu ‘ia ha‘a Sēkope ha afi,
Pea kohu foki ‘a e ‘ita ‘i ha‘a ‘Isileli,
22Koe‘uhi na‘e ‘ikai te nau tui kia ‘Elohimi,
Pea na‘e ‘ikai te nau falala ki he‘ene fakamo‘ui.
23Pea ne fai tu‘utu‘uni ki he ngaahi ‘ao ‘i ‘olunga,
Pea ko e ngaahi matapā ‘o langi na‘a ne fakaava.
24Pea ne faka‘uha hifo kiate kinautolu ‘a e mana ma‘anau kai,#Sioné 6.31
‘Io, na‘a ne ‘ange ma‘anautolu ‘a e koane ‘o langi.
25Ko e mā ‘a ha‘a mā‘olunga#78.25 Ko e… mā‘olunga; ‘Oku hiki he Sepituakiní: ko e mā ‘a e kau ‘āngelo. na‘a nau kai kotoa:
Na‘a ne ‘ange ha‘anau me‘akai ke mākona.
26Na‘a ne fakafononga ‘a e matangi hahake ‘i he langi:
Pea ne fakaangi ‘a e matangi tonga ‘aki hono māfimafi.
27Pea ne faka‘uha kiate kinautolu ‘a e kakano hangē ha efu,
‘Io, hangē ko e ‘one‘one ‘o e matātahi ‘a e manu kapakau:
28Pea ne fakatō ia ki he lotolotonga ‘o honau ‘apitanga,
‘O takatakai ki honau ngaahi nofo‘anga.
29Ko ia na‘a nau kai ‘o mākona ‘aupito:
He kuo ne ‘omi kiate kinautolu honau manako.
30Kuo te‘eki lahi ‘ene vovo,
Kei ‘i honau ngutu ‘a e kakano.
31Mo e kohu hake kiate kinautolu ‘a e ‘ita ‘a ‘Elohimi,
Pea ne tāmate‘i hanau kau sino lalahi,
Mo ne tulaki ‘a e kau molumalu#78.31 kau molumalú pe kau vou. ‘o ‘Isileli,
32Ka neongo ia kotoa, ka nau fai atu ‘enau angahala,
‘O ‘ikai te nau tui ki he‘ene ngāue mana.
33Ko ia na‘a ne ngaohi ke ‘osi honau ngaahi ‘aho hangē ha “hoi!”
Mo honau ta‘u hangē ha fakapoongi.
34Ka ne ka tāmate‘i kinautolu, pea nau toki kumi kiate ia:
‘Io, na‘a nau foki, ‘o ha‘ao kia ‘Ela.
35‘Io, na‘a nau manatu ko honau makatu‘u ‘a ‘Elohimi,
Pea ko honau koeli ‘a ‘Ela ‘Elioni.
36Ka nau ngutu fakalai ki he‘ene ‘Afio,
Pea nau kākaa‘i ‘aki honau ‘elelo.
37He ko honau loto na‘e ‘ikai ma‘u ‘i he fakafeangai kiate ia,
Pea na‘e ‘ikai te nau piki ki he‘ene fuakava.
38Ka ko ‘ene ‘Afio, ‘i he‘ene manava‘ofa,
‘Oku ne ‘ufi‘ufi angahala,
Pea ‘oku ‘ikai te ne faka‘auha:
‘Io, ‘oku tu‘o lahi ‘ene mapuke ‘ene ‘ita,
Pea ‘oku ‘ikai te ne langa‘i ‘ene houhau kotoa.
39Pea ne manatu ko e kakano pē kinautolu;
Ko e matangi ‘oku ‘alu atu pē ‘o ‘ikai toe ha‘u.
40Hono tu‘o fiha nai ‘enau langa‘i ‘ene ‘ita ‘i he Toafa,
‘Enau faka‘ī‘ī ki he‘ene ‘Afio ‘i he lala!
41Pea nau toutou ala‘aki kia ‘Ela,
Pea ko e Tāpuhā ‘o ‘Isileli na‘a nau fakangatangata.
42Na‘e ‘ikai te nau manatu hono nima,
‘A e taimi na‘a ne huhu‘i ai kinautolu mei he faingata‘a.
43‘A ‘ene tuku ‘ene ngaahi faka‘ilonga ‘i ‘Isipite,
Mo ‘ene ngaahi me‘a fakaofo ‘i he tuku‘uta ‘o Soani:
44Pea ne liliu ke toto honau ngaahi fu‘u vai,#‘Eki 7.17-21
Ko ia, na‘e ‘ikai te nau lava ke inu mei honau ngaahi vaitaki.
45Na‘a ne tuku atu ki ai ‘a e mongomonga, ‘o ne keina kinautolu;#‘Eki 8.1-6,20-24
Mo e fanga poto na‘e faka‘auha kinautolu.
46Pea ne tuku ‘a e tupu ‘o ‘enau ngoue ki he ‘unufe,#‘Eki 10.12-15
Mo e me‘a kuo nau kakava ai ki he he‘e.
47Na‘a ne tāmate‘i ‘enau vaine ‘aki ‘a e ‘uha maka,#‘Eki 9.22-25
Mo ‘enau ngaahi fu‘u sukamino ‘aki ‘a e taufa maka kāfakafa.
48Pea ne tukuange ‘a e mata ‘o ‘enau monumanu ke fa‘iteliha ai ‘a e ‘uha maka,
Pea ko ‘enau tākanga iiki ki he ‘uhila tā.#78.48 ‘uha maka… ‘uhila tā; pe mahaki fakalilifu… mahaki faka‘auha.
49Na‘a ne tukuange kiate kinautolu ‘a e kakaha ‘o ‘ene ‘ita,
Hono mahua, mo hono fiho, mo hono ha‘aha‘a,
Ko e veteange ha kau ‘āngelo ‘omi mala.
50Na‘a ne tofa ha hala ki he‘ene tuputāmaki;
Na‘e ‘ikai ke ne mamae‘i mei he mate ‘enau mo‘ui,
Ka ne tuku ‘a e mahaki faka‘auha ke fa‘iteliha ai;
51Pea ne taa‘i kotoa ‘a e kau ‘olopo‘ou ‘o ‘Isipite#‘Eki 12.29
‘a e fuatapu ‘o honau ivi ‘i he ngaahi tēniti ‘o Hami ē:
52Pea ne fakafononga hangē ha sipi ‘a e kakai ‘a‘ana,#‘Eki 13.17-22
‘O ne taki ‘i he Toafa hangē ha tākanga.
53‘Io, na‘a ne taki fakataukei, pea na‘e ‘ikai te nau ilifia:#‘Eki 14.26-28
Ka ko honau ngaahi fili–na‘e ‘ufi‘ufi kinautolu ‘e he tahi na.
54Pea ne a‘utaki kinautolu ki hono feitu‘u tapu,#‘Eki 15.17; Sios 3.14-17
‘A e mo‘unga ni kuo fakatau ‘e hono nima to‘omata‘u.
55Pea ne kapusi mei honau ‘ao ‘ani pule‘anga,#Sios 11.16-23
Pea ne fua talotalo ‘aki ha afa moonau tofi‘a,
Pea ne tuku ‘a e ngaahi matakali ‘Isileli
Ke nofo ‘i honau tēniti.
56Ka nau ala‘aki mo angatu‘u kia ‘Elohimi ‘Elioni,#Fkm 2.11-15
Pea na‘e ‘ikai te nau tauhi ‘ene ngaahi fakamo‘oni.
57Ka na‘a nau holomui mo kākā, hangē ko ‘enau ngaahi kui:
‘Iloange kuo nau hanga kehe, ‘o hangē ha kaufana loi.
58Pea nau faka‘ita‘i ia ‘aki honau ngaahi ‘esi,
Pea nau fakafua‘a‘i ia ‘aki ‘enau ngaahi ‘īmisi.
59Fanongo ‘a ‘Elohimi ki ai, ‘o ne ‘ita lahi,
Pea ne mātu‘aki fakalili‘a ki ‘Isileli:
60Pea ko e Tāpanekale ‘i Sailo#78.60 Sailo; Ko e tefito‘i fai‘anga lotu ia ‘o e kakai ‘Isilelí kimu‘a atu he kuonga ‘o e tu‘i ko Tēvitá. #Sios 18.1; Sel 7.12-14; 26.6 na‘a ne li‘aki,
Si‘i tēniti kuo ne fokotu‘u ‘i he lotolotonga ‘o e kakai:
61Pea ne tuku hono mālohinga#78.61 mālohingá; Ko hono hiki ‘e taha ko e: ‘A‘ake ‘o e Fuakavá. #1 Sām 4.4-22 ke ‘ave pōpula,
Pea ke ma‘u ‘e he fili hono toulekeleka.
62Pea ne tukuange hono kakai ki he heletā;
Pea ne tuputāmaki ki hono tofi‘a.
63Ko honau kau talavou na‘e keina ‘e he afi:
Pea ko honau kau finemui na‘e ‘ikai hiva‘aki ‘i he mali.
64Ko honau kau taula‘eiki na‘e tō ‘i he heletā;
Pea ko honau kau fefine uitou na‘e ‘ikai fai ha tēngihia.
65Toki ofo ‘a ‘Ātonai hangē ha taha na‘e mohe,
Hangē ha to‘a ‘oku kaila ‘i he‘ene inu uaine.
66Pea ne taa‘i hono ngaahi fili mei tu‘a:
Na‘a ne ‘ai honau manuki‘anga ta‘engata.
67Pea ko e tēniti ‘o Siosifa na‘a ne fakalili‘a ki ai,
‘O ‘ikai te ne fili ‘a e matakali ‘o ‘Ifalemi;
68Ka ne fili pē ‘a e matakali ‘o Siuta,
‘A Mo‘unga Saione na‘a ne manakoa.
69Pea ne langa hono potu tapu ke hangē ko ‘olunga na,
Hangē ko e fonua kuo ne ‘ai ke ma‘uma‘uluta ‘o ta‘engata.
70Na‘a ne fili foki ‘a Tēvita ko ‘ene tamaio‘eiki,#1 Sām 16.11-12; 2 Sām 7.8; 1 Kal 17.7
‘O ne to‘o ia mei he ngaahi loto‘ā sipi:
71Na‘a ne ‘omi ia mei he muimui ki he sipi toutama,
Ke tauhi ki ha‘a Sēkope ko e kakai ‘a‘ana.
Pea ki ha‘a ‘Isileli ko hono tofi‘a.
72Ko ia na‘a ne tauhi kinautolu ‘o taau mo e haohaoa hono loto;
‘O ne taki kinautolu ‘aki hono nima poto.
Currently Selected:
KO E SAAME 78: TMB
Highlight
Copy
Compare
Share
Want to have your highlights saved across all your devices? Sign up or sign in
Tongan Moulton Bible © Bible Society of the South Pacific, 2011.
