KO E SAAME 77
77
Ko e Fakafiemālie ‘i he Vā‘ihala ‘o e Faingata‘a
(Ki he Pule ‘o e Hiva. Ke fai faka-Situtuni. Ko e Saame ‘a ‘Ēsafe.)
1‘OKU hake hoku le‘o kia ‘Elohimi, ka u tautapa mu‘a;
Kuo hake hoku le‘o kia ‘Elohimi, pea ‘ofa ke ne fanongoa.
2‘I he ‘aho ‘o ‘eku faingata‘a na‘a ku kumi kia ‘Ātonai ē:
Na‘e mafao atu hoku nima ‘i he pō, ‘o ‘ikai mamate:
Na‘e ‘ikai tali ‘a e fakalelu ‘e hoku laumālie.
3Ka u ka manatu kia ‘Elohimi, pea u to‘e:
Ka u ka fakalaulauloto, pea pongia hoku laumālie. (Sila)
4‘Oku ke puke hoku laumata:
Kuo u mafatukituki, ‘o ‘ikai te u malea.
5Kuo u fakamanatu ki he ngaahi ‘aho fuoloa,
Ki he ngaahi ta‘u ‘a e ngaahi kuonga.
6Na‘a ku pehē, Ka u manatua ‘eku fa‘a hiva#77.6 hiva; Ko hono faka-Hepeluú ia, ka ‘oku pehē ‘i he ngaahi hiki fuoloa ‘e ni‘ihi: fakalaulaulauloto.
Ka u talanoa mo hoku loto:
Ka na‘e hanga hoku laumālie ‘o fai ‘a e ngaahi ‘eke.
7‘E ta‘engata koā hoto li‘aki ‘e ‘Ātonai?
‘O ‘ikai te ne toe hāngai fofonga mai?
8Kuo ‘osi ‘ene ‘ofa ‘o ta‘engata?
Kuo tuku ‘a e fai ‘ene tala‘ofa ki he ngaahi to‘utangata?
9Kuo ngalo ‘ia ‘Ela ‘a e angalelei?
Pe kuo ne tāpuni ‘i he‘ene ‘ita ‘a e fai meesi?
10Pea u pehē, Ko hoku mahaki ia foki,
‘A e lau kuo liliu ‘a e to‘omata‘u ‘o ‘Elioni.#77.10 kuo… ‘Elioni; pe ‘ikai ke kei kaukaua ‘a ‘Elioni. ‘Oku fihi ‘aupito.
11Ka u fakamatala ‘a e ngaahi ngāue ‘a IAA:
He ‘oku ou fie fakamanatu ho‘o fai mana talu mei mu‘a.
12Pea u fakakaukau ki ho‘o fai kātoa pē,
‘O fakalaulauloto ki ho‘o ngaahi ngāue.
13Ko ho hala, ‘Elohimi, ‘oku fou ‘i mā‘oni‘oni:
Ko hai ha ‘Otua ‘oku lahi tatau mo ‘Elohimi?
14Ko koe ‘a e ‘Otua fai me‘a lalahi:
Kuo ke fakahā ho ivi ‘i he lotolotonga ‘o e ngaahi kakai.
15Kuo ke huhu‘i ho kakai ‘aki ho nima,
‘A ha‘a Sēkope mo Siosifa. (Sila)
16Na‘e sio atu ‘a e fu‘u vai, ‘Elohimi, na‘e sio atu ‘a e fu‘u vai, ‘o fifiho:
Seuke, na‘e mātu‘aki ngā‘ehu ‘a e ngaahi loloto.
17Na‘e lingi vai ‘e he ngaahi ‘ao;
Ko e ‘atā na‘e tuku atu ha le‘o:
Ko ho‘o ngaahi ngahau foki na‘e puna holo.
18Na‘e ‘i he ‘ahiohio ‘a e le‘o ho‘o mana;
Na‘e fakamana ‘a māmani ‘e he ngaahi ‘uhila:
Na‘e tete mo ngalulu ‘a e fonua.
19Na‘e fou ‘i he vai ho hala,
Pea ‘i he vai lahi ho hā‘ele‘anga,
Pea ko ho ngaahi topuva‘e na‘e ‘ikai hā.
20Na‘a ke taki ho kakai hangē ha fanga sipi pē,
‘O nima ‘aki ‘a Mōsese mo ‘Ēlone.
Currently Selected:
KO E SAAME 77: TMB
Highlight
Copy
Compare
Share
Want to have your highlights saved across all your devices? Sign up or sign in
Tongan Moulton Bible © Bible Society of the South Pacific, 2011.
