KO E SAAME 76
76
Ko e ‘Otua Mohu Ikuna
(Ki he Pule ‘o e Hiva. Ke fai mo e ngaahi me‘a helefilo. Ko e Saame ‘a ‘Ēsafe, Ko e ta‘anga.)
1KUO ‘iloa ‘i Siuta ‘a ‘Elohimi:
‘Oku mā‘olunga hono huafa ‘i ‘Isileli,
2Pea ‘oku ‘i Salema hono toi‘anga,
Pea ‘i Saione hono ‘ana.
3Ko e potu ko ia na‘a ne laiki ai ‘a e ngaahi ngahau;
‘A e pā, mo e heletā, mo e ‘ū mahafu. (Sila)
4‘Oku ke hā ngingila mo tu‘utai
Mei he ngaahi mo‘unga na ‘oku ke hahalu ai.
5Ko e kau to‘a tete‘e kuo nau tuku kinautolu ke vetea,
Kuo nau fakatuletulemohea,
Pea ko e fu‘u fa‘ahinga kaukaua kuo fevāleaki honau nima.
6Na‘a ke valoki leva, ‘e ‘Otua ‘o Sēkope,
Pea ko e sāliote mo e hoosi na‘e mape‘e, ‘o mohe mate.
7Ko koe, ko koe pē ‘a Manavahē‘ia:
Pea ko hai ‘e matu‘u ‘i ho ‘ao ‘oka ‘iloange kuo ke ‘ita?
8Na‘a ke tala mei langi ‘a e fakamaau ke ongona;
Manavahē leva ‘a māmani ‘o mo‘ulongoa.
9‘I he tu‘u ke fai fakamaau ‘e ‘Elohimi,
Ke taukapo‘i ‘a e kau ngaohikovia ‘o māmani. (Sila)
10He ko e ‘ita ‘a e tangata te ne fakaongolelei koe:
Ka ke tau ‘a e fu‘u houhau ‘oku toe.#76.10 ‘Oku ‘ikai ke mahino ‘a hono faka-Hepeluú, ka ‘oku pehē he hiki fuoloa ‘e taha: Ko kinautolu te nau hao mai mei ho‘o ngaahi taú, te nau tauhi ho‘o ngaahi kātoanga lotú.
11Fai tukumo‘ui, mo fakaai foki,
Kia Sihova ko homou ‘Otua:
‘A e nofo fua pē ‘i he fonua takatakai ki he‘ene ‘Afio,
‘Omi tukuhau kia Manavahē‘ia.
12‘Oku ne ‘auhani ‘a e finangalo ‘o e hou‘eiki;
‘Oku taau ke manavahē ki ai ‘a e ngaahi tu‘i ‘o māmani.
Currently Selected:
KO E SAAME 76: TMB
Highlight
Copy
Compare
Share
Want to have your highlights saved across all your devices? Sign up or sign in
Tongan Moulton Bible © Bible Society of the South Pacific, 2011.
